គណបក្សប្រជាជនកម្ពុជា ជ្រើសតាំងសម្តេចធិបតី ហ៊ុន ម៉ាណែត ជាអនុប្រធានគណបក្ស
- ភ្នំពេញ
ភ្នំពេញ៖ មហាសន្និបាតវិសាមញ្ញគណបក្សប្រជាជនកម្ពុជា រយៈពេល ២ថ្ងៃ នាថ្ងៃទី៩-១០ ខែធ្នូ ឆ្នាំ២០២៣ បានសម្រេចជ្រើសតាំងសម្តេចធិបតី នាយករដ្ឋមន្ត្រី ហ៊ុន…
ភ្នំពេញ៖ មហាសន្និបាតវិសាមញ្ញគណបក្សប្រជាជនកម្ពុជា រយៈពេល ២ថ្ងៃ នាថ្ងៃទី៩-១០ ខែធ្នូ ឆ្នាំ២០២៣ បានសម្រេចជ្រើសតាំងសម្តេចធិបតី នាយករដ្ឋមន្ត្រី ហ៊ុន ម៉ាណែត ជាអនុប្រធានគណបក្សប្រជាជនកម្ពុជា។ គណបក្សប្រជាជនកម្ពុជា មានអនុប្រធាន ៤រូបរួចហើយ គឺសម្តេច ស ខេង សម្តេច សាយ ឈុំ សម្តេច ទៀ បាញ់ និងសម្តេច ម៉ែន សំអន។ រីឯសម្តេចតេជោ ហ៊ុន សែន នៅតែជាប្រធានគណបក្សប្រជាជនកម្ពុជា ខណៈដែលសម្តេច ហេង សំរិន ជាប្រធានកិត្តិយស។
មហាសន្និបាតរយៈពេល ២ថ្ងៃនេះ បានចេញសេចក្តីសម្រេចចិត្ត ៩ចំណុច។ ក្នុងនោះ មានការបោះឆ្នោតជ្រើសតាំងបន្ថែមសមាជិកគណៈកម្មាធិការកណ្តាល ចំនួន ៤៩៦រូប ដែលធ្វើឱ្យបរិមាណសមាជិកគណៈកម្មាធិការកណ្តាល មានចំនួន ១៣១២រូប។
នៅក្នុងមហាសន្និបាតនេះ ក៏បានបោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍នៃគណៈកម្មាធិការកណ្តាល ចំនួន ២៣រូប ព្រមទាំងបោះឆ្នោតជ្រើសតាំងប្រធាន និងសមាជិកគណៈកម្មាធិការហិរញ្ញវត្ថុនៃគណៈកម្មាធិការកណ្តាល ចំនួន ៧រូប៕
ចែករំលែកព័តមាននេះ