រាជវង្សអារ៉ាប៊ីសាអូឌីតមួយព្រះអង្គសោយទិវង្គតក្នុងហេតុការណ៍ធ្លា.ក់យន្តហោះ
អារ៉ាប៊ីសាអូឌីត ៖ រាជវង្សអារ៉ាប៊ីសាអូឌីត កាលពីថ្ងៃទី៧ ខែធ្នូ កន្លងទៅ បានប្រកាសដំណឹងដ៏ក្រៀម
អារ៉ាប៊ីសាអូឌីត ៖ រាជវង្សអារ៉ាប៊ីសាអូឌីត កាលពីថ្ងៃទី៧ ខែធ្នូ កន្លងទៅ បានប្រកាសដំណឹងដ៏ក្រៀមក្រំ ដោយព្រះអង្គម្ចាស់ Talal bin Abdulaziz bin Bandar bin Abdulaziz Al Saud បានសោយទិវង្គតក្នុងព្រះជន្ម ៦២ព្រះវស្សា នៅក្នុងហេតុការណ៍ធ្លាក់យន្តហោះ អំឡុងពេលសមយុទ្ធហ្វឹកហាត់ជាមួយកងទ័ពអាកាស។ នេះបើយោងតាមសេចក្តីរាយការណ៍នៅក្នុងប្រព័ន្ធផ្សព្វផ្សាយអារ៉ាប់ និងចេញផ្សាយដោយទីភ្នាក់ងារសារព័ត៌មានរដ្ឋរុស្ស៊ី RT ។
តុលាការរាជវង្សអារ៉ាប៊ីសាអូឌីតបានប្រកាសពីការសោយទិវង្គតរបស់ព្រះអង្គម្ចាស់ នៅក្នុងសេចក្តីថ្លែងការណ៍ខ្លីមួយដោយបញ្ជាក់ថា ព្រះរាជពិធីអធិស្ឋានដល់ព្រះសពទ្រង់នឹងធ្វើឡើងនៅវិហារអ៊ីស្លាម Imam Turki bin Abdullah នៅក្នុងទីក្រុងរីយ៉ាដ (Riyadh) ។
ព្រះអង្គម្ចាស់ Talal bin Abdulaziz គឺជាព្រះរាជបុត្រព្រះអង្គម្ចាស់ Bandar និងត្រូវជាព្រះរាជនត្តោស្តេចអារ៉ាប៊ីសាអូឌីតទី១ គឺព្រះអង្គម្ចាស់ Abdulaziz។ ទ្រង់ប្រសូតនៅឆ្នាំ ១៩៦១ ទ្រង់គឺជាវរសេនីយ៍ឯកនៅក្នុងកងទ័ពអាកាសអារ៉ាប៊ីសាអូឌីត ព្រមទាំងបានបម្រើការជាជំនួយការប្រធានផ្នែកចារកម្មនៅ GIP ដែលជាទីភ្នាក់ងារស៊ើបការណ៍សម្ងាត់អារ៉ាប៊ីសាអូឌីតចាប់ពីឆ្នាំ ២០០៤ ដល់ឆ្នាំ ២០១២ ។
សេចក្តីថ្លែងការណ៍របស់តុលាការរាជវង្សអារ៉ាប៊ីសាអូឌីតពុំបានបង្ហាញពីមូលហេតុនៃការសោយទិវង្គតរបស់ព្រះអង្គម្ចាស់ Talal bin Abdulaziz នោះទេ ប៉ុន្តែសារព័ត៌មាន Al Mashhad របស់ប្រទេសលីបង់បានរាយការណ៍ថា ព្រះអង្គម្ចាស់សោយទិវង្គតនៅពេលយន្តហោះចម្បាំង F-15 របស់ទ្រង់បានធ្លាក់អំឡុងពេលសមយុទ្ធជាមួយកងទ័ពអាកាស កាលពីថ្ងៃទី៧ ខែធ្នូ ឆ្នាំ២០២៣៕ (ប្រភព ៖ RT)
ចែករំលែកព័តមាននេះ