ខេត្តសៀមរាប ៖ ថ្លែងបែបចំអក ទៅកាន់ក្រុមប្រឆាំង ក៏ដូចជាអ្នករិះគន់ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងយ៉ាងដូច្នេះថា…
ខេត្តសៀមរាប ៖ ថ្លែងបែបចំអក ទៅកាន់ក្រុមប្រឆាំង ក៏ដូចជាអ្នករិះគន់ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងយ៉ាងដូច្នេះថា «ខ្ញុំចង់ឱ្យអ្នករិះគន់ ចុះមកមើលតំបន់រុនតាឯក ដោយផ្ទាល់ ក្រោយរិះគន់ថា យកប្រជាពលរដ្ឋ មកទុកចោល ខណៈតំបន់នេះមានការអភិវឌ្ឍន៍ឥតឈប់ឈរ» ។
ថ្លែងនាឱកាសអញ្ជើញជាអធិបតីជួបសំណេះសំណាលជាមួយប្រជាពលរដ្ឋរស់នៅតំបន់រុនតាឯក ស្ថិតនៅស្រុកបន្ទាយស្រី ខេត្តសៀមរាប នាព្រឹកថ្ងៃទី៨ ខែធ្នូ ឆ្នាំ២០២៣ សម្ដេចធិបតី ហ៊ុន ម៉ាណែត បានណែនាំដល់គ្រប់ភាគីពាក់ព័ន្ធកែប្រែផ្លូវទាំងអស់ នៅរុនតាឯក ពីផ្លូវដី ទៅជាផ្លូវបេតុង និងកៅស៊ូ។ កម្ពុជាមិនមែនជាប្រទេសអ្នកមាននោះទេ ដូច្នេះត្រូវធ្វើអ្វីជាជំហាន និងដំណាក់កាលផងដែរ ។
សម្ដេចធិបតី នាយករដ្ឋមន្ត្រី បានគូសបញ្ជាក់ថា «កន្លងទៅ ខ្ញុំឃើញមានអង្គការអន្ដរជាតិមួយចំនួន អ្នកនយោបាយមួយចំនួន ឆ្លៀតឱកាស មកវៃប្រហាលរាជរដ្ឋាភិបាល ថា យកប្រជាជន យកមកបោះចោល។ លោកតា លោកយាយ អ្នកនិយាយនឹងគួរឱ្យមកមើល នឹងចុះមកមើលខ្លួនឯង ហើយមើលក្នុងរយៈពេលមួយឆ្នាំនេះ ប្រទេសកម្ពុជា មិនមែនប្រទេសអ្នកមាន ដូច សហរដ្ឋអាមេរិក តែប្រទេសមួយនេះ មានរាជរដ្ឋាភិបាល មានថ្នាក់ដឹកនាំ ដែលមិនអត់ចិត្តទេ គឺខិតខំដើម្បីធ្វើយ៉ាងណា ឱ្យបានលឿន មិនទុកប្រជាពលរដ្ឋចោលទេ» ។
ជាមួយគ្នានោះដែរ សម្ដេចនាយករដ្ឋមន្ដ្រី បានណែនាំដល់ក្រសួងរៀបចំដែនដី ត្រូវបន្ត រៀបចំប្លង់គោលប្រើប្រាស់ដីសម្រាប់តំបន់រុនតាឯក និងពាក់ស្នែង ដើម្បីប្រើប្រាស់ធនធាន ដីធ្លីឱ្យអស់សក្តានុពល ឱ្យស្របតាមប្រភេទដីសម្រាប់កសិកម្ម ការចិញ្ចឹមសត្វ និងសកម្មភាពសេដ្ឋកិច្ច ។
ក្នុងឱកាសនោះដែរ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចផ្តល់ ក្របខណ្ឌដល់លោកគ្រូ អ្នកគ្រូ ជាមន្ត្រីជាប់កិច្ចសន្យា នៃក្រសួងអប់រំ យុវជន និងកីឡា ចំនួន២៤នាក់ ដែលបម្រើការងារនៅបឋមសិក្សា ២កន្លែង នៅតំបន់អភិវឌ្ឍរុនតាឯក ឲ្យក្លាយជា មន្ត្រីពេញសិទ្ធិតែម្តង។
សម្តេចធិបតី បានគូសបញ្ជាក់ថា ការផ្តល់ជូននេះ ដើម្បីលើកទឹកចិត្ត ដល់លោកគ្រូ អ្នកគ្រូ ជាមន្ត្រីកិច្ចសន្យា ដែលបានរួមចំណែក ក្នុងការកសាងធនធានមនុស្ស នៅតំបន់អភិវឌ្ឍ រុនតាឯក និងដើម្បីឲ្យលោកគ្រូ អ្នកគ្រូ បន្តយកចិត្តទុកដាក់ ផ្តល់ការអប់រំដល់សិស្សានុសិស្ស ។
សូមរំលឹកថា លោកគ្រូ អ្នកគ្រូ ដែលទទួលបានក្របខណ្ឌពេញសិទ្ធិ មកពីសាលា បឋមសិក្សា ប៊ុនរ៉ានី ហ៊ុន សែន រុនតាឯក(សាលាបង្កើតថ្មី) ក្របខណ្ឌ១០នាក់ និងសាលាបឋម សិក្សា ជាលា ធំ (សាលាចាស់) នៅតំបន់រុនតាឯក ក្របខណ្ឌ១៤នាក់ ៕
ចែករំលែកព័តមាននេះ