រាជធានីភ្នំពេញ ៖ សិទ្ធិសេរីភាព ក្នុងការបញ្ចេញមតិ និងការជួបជុំតវ៉ា នៅក្នុងប្រទេសកម្ពុជា ដោយមិនមានការសហការ និងអនុញ្ញាតពីអាជ្ញាធរ ហើយបង្កចលាចល ឬបង្កអសន្តិសុខនោះ…
រាជធានីភ្នំពេញ ៖ សិទ្ធិសេរីភាព ក្នុងការបញ្ចេញមតិ និងការជួបជុំតវ៉ា នៅក្នុងប្រទេសកម្ពុជា ដោយមិនមានការសហការ និងអនុញ្ញាតពីអាជ្ញាធរ ហើយបង្កចលាចល ឬបង្កអសន្តិសុខនោះ គឺមិនមែនជាសិទ្ធិសេរីភាព ក្នុងការបញ្ចេញមតិទេ នេះបើតាមការបញ្ជាក់របស់អ្នកនាំពាក្យគណៈកម្មាធិការសិទ្ធិមនុស្សកម្ពុជា ។
ការបញ្ជាក់របស់អ្នកនាំពាក្យបែបនេះ បានធ្វើឡើងនៅក្នុងកិច្ចពិភាក្សាតុមូល លើប្រធានបទ «សេរីភាពបញ្ចេញមតិ និងការទទួលខុសត្រូវ» ដែលរៀបចំដោយក្លឹបអ្នកកាសែតកម្ពុជា កាលពីថ្ងៃទី០៧ ខែធ្នូ ឆ្នាំ២០២៣ ។
លោក ប៉ា ប៉ុណ្ណារ៉ាដា សមាជិកគណៈកម្មាធិការសិទ្ធិមនុស្សកម្ពុជា និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា បានបញ្ជាក់ដូច្នេះថា ៖ «ការជួបជុំតវ៉ា ដោយសន្តិវិធី សហការជាមួយសមត្ថកិច្ច ដោយគោរព នូវវិធានការច្បាប់ សុវត្ថិភាពសុខភាពសាធារណៈ គឺជាការអនុវត្តនូវសិទ្ធិ ដែលធានាដោយរដ្ឋធម្មនុញ្ញ និងច្បាប់យើងផងដែរ» ។
លោកបានលើកឡើងថា រាជរដ្ឋាភិបាល តែងរៀបចំ នូវវេទិកាសាធារណៈ ដើម្បីឱ្យប្រជាពលរដ្ឋ បានបញ្ចេញមតិ និងបង្ហាញកង្វល់ផ្សេងៗ ដែលចំណុចនេះ ជាការលើកកម្ពស់សិទ្ធិសេរីភាពបញ្ចេញមតិ ។
ក្នុងឱកាសនោះដែរ មន្ត្រីសិទ្ធិមនុស្សរូបនេះ បានបញ្ជាក់បន្ថែមថា «ប៉ុន្តែប្រសិនបើការជួបជុំតវ៉ា សម្តែងមតិ ដោយមិនមានការសហការ ដោយមិនមានការជូនដំណឹងដល់អាជ្ញាធរ ហើយប៉ះពាល់ទៅដល់វិធានការសន្តិសុខសាធារណៈ បង្កហិង្សា បង្កចលាចល នេះមិនមែនជាសេរីភាព នៃការបញ្ចេញមតិនោះទេ ប៉ុន្តែជាអំពើល្មើសច្បាប់ទៅវិញ ហើយសមត្ថកិច្ច ត្រូវតែមានវិធានការដើម្បីទប់ស្កាត់»។
លោកបានបញ្ជាក់បន្ថែមទៀតថា ការបញ្ចេញមតិ ដោយបំផ្លើស បំភ្លៃ លើព័ត៌មានមិនពិត មានចេតនាទុច្ចរិត បង្កចលាចល ដល់សន្តិសុខជាតិ ក៏ជាបទល្មើសដែរ ។
ចំណែកលោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានលើកឡើងថា សន្តិភាព គឺជាការធានារ៉ាប់រងសិទ្ធិជាមូលដ្ឋាន បើអត់មានសន្តិភាព សិទ្ធិរស់រានមានជីវិតរបស់យើងក៏ផុយស្រួយ ។
លោកបានបញ្ជាក់ដូច្នេះថា ៖ «សន្តិភាពនេះ ជាការធានារ៉ាប់រងសិទ្ធិជាមូលដ្ឋានរបស់យើង គឺសិទ្ធិរស់រានមានជីវិត ព្រោះថា បើសិនជាយើងអត់មានសន្តិភាព សិទ្ធិរស់រានមានជីវិតរ បស់យើងក៏ផុយស្រួយ» ។
ជាមួយគ្នានោះដែរអ្នកនាំពាក្យរាជរដ្ឋាភិបាល លើកឡើងបានបន្តថា សន្តិភាព ត្រូវបានចាត់ទុកថា ជារបស់សំខាន់ណាស់ សម្រាប់កម្ពុជា ដូច្នេះបេសកកម្មរបស់រាជរដ្ឋាភិបាល តាំងពីឆ្នាំ១៩៧៩ រហូតដល់ ឆ្នាំ១៩៩៨ គឺជាការផ្តល់ជូនប្រជាពលរដ្ឋខ្មែរ នូវសិទ្ធិរស់រានមានជីវិត និងសិទ្ធិផ្សេងៗទៀត ដែលជាសិទ្ធិចាំបាច់ក្នុងការរក្សាអាយុជីវិតប្រជាពលរដ្ឋ ។
ទោះជាយ៉ាងនេះក្តី លោក ប៉ែន បូណា បញ្ជាក់ថា «នៅពេលដែលយើងនិយាយពីការអភិវឌ្ឍប្រទេសគ្រប់បែបយ៉ាងនេះ គឺដើម្បីការស់នៅសេចក្តីថ្លៃថ្នូរ ភាពស៊ីវីល័យ របស់ប្រជាពលរដ្ឋខ្មែរ ហ្នឹងហើយជាបេសកកម្មសិទ្ធិមនុស្ស» ៕
ចែករំលែកព័តមាននេះ