អ៊ីតាលីដកខ្លួនចេញពីគម្រោងគំនិតផ្តួចផ្តើមខ្សែក្រវាត់ និងផ្លូវដ៏មហាសាលរបស់ចិន
អ៊ីតាលី ៖ ប្រទេសអ៊ីតាលី បានប្រកាសនឹងដកខ្លួនចេញពីគំនិតផ្តួចផ្តើមខ្សែក្រវាត់ និងផ្លូវរបស់
អ៊ីតាលី ៖ ប្រទេសអ៊ីតាលី បានប្រកាសនឹងដកខ្លួនចេញពីគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន ដែលហៅកាត់ថា BRI ដោយរដ្ឋបាលលោកស្រីនាយករដ្ឋមន្ត្រី Giorgia Meloni បានជូនដំណឹងដល់ទីក្រុងប៉េកាំងថា ខ្លួននឹងឈប់ចូលរួមមុនពេលកំណត់នៅចុងឆ្នាំនេះ។
អ៊ីតាលី គឺជាប្រទេសលោកខាងលិចដ៏សំខាន់តែមួយគត់ ដែលបានចុះហត្ថលេខាលើគំនិតផ្តួចផ្តើមខ្សែក្រវាត់ និងផ្លូវ ដែលជាគម្រោងពាណិជ្ជកម្ម និងហេដ្ឋារចនាសម្ព័ន្ធដែលមានមហិច្ឆតាបំផុតមួយរបស់ប្រទេសចិនក្នុងឆ្នាំ ២០១៩ ខណៈដែលទង្វើនេះ ត្រូវបានសហរដ្ឋអាមេរិក និងប្រទេសផ្សេងទៀតរិះគន់យ៉ាងខ្លាំងនៅពេលនោះ។
បើកដំណើរការដោយប្រធានាធិបតីចិន ស៊ី ជីនពីង នៅក្នុងឆ្នាំ ២០១៣ BRI មានគោលបំណងវិនិយោគប្រមាណ១ទ្រីលានដុល្លារអាមេរិក នៅទូទាំងអាស៊ី និងអឺរ៉ុប ដោយគម្រោងរួមមានទាំងផ្លូវរថភ្លើង និងកំពង់ផែថ្មី ដើម្បីធ្វើឱ្យប្រសើរឡើង នៅក្នុងបំណងតភ្ជាប់ប្រទេសចិនជាមួយអឺរ៉ុប និងផ្នែកផ្សេងទៀតនៃអាស៊ី។ ប៉ុន្តែទោះយ៉ាងណាក៏ដោយ BRI ត្រូវបានសហរដ្ឋអាមេរិករិះគន់តាំងពីដើមមកថា «ឧទាហរណ៍នៃការទូតអន្ទាក់បំណុល» ដោយទីក្រុងវ៉ាស៊ីនតោនអះអាងថា ផែនការរបស់ចិនពាក់ព័ន្ធនឹងគម្រោងធំៗ ដែលគ្មាននិរន្តរភាព ដែលប្រទេសនានាមិនអាចផ្តល់ហិរញ្ញប្បទានបាន ដោយផ្តល់ឱ្យប៉េកាំងនូវអានុភាពសម្រាប់គោលដៅរបស់ខ្លួន។
អ៊ីតាលី គឺជាប្រទេសធំបំផុតក្នុងចំណោមសមាជិកសហភាពអឺរ៉ុបទាំង ១៨ ជាពិសេសនៅភាគខាងកើត និងភាគខាងត្បូងនៃទ្វីប ដែលបានចុះហត្ថលេខាលើគំនិតផ្តួចផ្តើមខ្សែក្រវាត់ និងផ្លូវរបស់ចិន។ សមាជិកភាពអ៊ីតាលី នឹងត្រូវបន្តដោយស្វ័យប្រវត្តិនៅខែមីនាឆ្នាំក្រោយ លុះត្រាតែអ៊ីតាលីជូនដំណឹងដល់ចិនថា នឹងដកខ្លួនចេញនៅចុងឆ្នាំនេះ។
លោកស្រី Meloni ធ្លាប់បានហៅការសម្រេចចិត្តរបស់អតីតរដ្ឋាភិបាលអ៊ីតាលីក្នុងការចូលរួមគឺជាកំហុសដ៏ធ្ងន់ធ្ងរបំផុត ដោយលោកស្រីបានបង្ហាញថា លោកស្រីមានចិត្តនៅក្នុងការដកខ្លួនចេញ ប៉ុន្តែរដ្ឋាភិបាលលោកស្រីបានសង្កត់ធ្ងន់ថា ខ្លួនកំពុងស្វែងរកការរក្សាទំនាក់ទំនងល្អជាមួយចិន បើទោះជាមានចំណាត់ការនេះយ៉ាងណាក៏ដោយ។ គេសង្កេតឃើញថា ចាប់តាំងពីឡើងកាន់តំណែងនាយករដ្ឋមន្ត្រីអ៊ីតាលីកាលពីឆ្នាំមុន លោកស្រី Meloni បានព្យាយាមដឹកនាំគោលនយោបាយការបរទេស ដែលគាំទ្រលោកខាងលិច និងគាំទ្រណាតូច្រើនជាងអ្នកកាន់អំណាចមុន៕ (ប្រភព ៖ BBC)
ចែករំលែកព័តមាននេះ