តម្លៃដំឡូងមីអាចនឹងធ្លាក់ថ្លៃទៅវិញ ខណៈដល់រដូវកាលកំពុងប្រមូលផល
- ស្ទឹងត្រែង
ខេត្តស្ទឹងត្រែង ៖ កសិករនៅខេត្តស្ទឹងត្រែង បាននិយាយថា ពិតជាមានការប្រែប្រួល ឡើងចុះមិន
ខេត្តស្ទឹងត្រែង ៖ កសិករនៅខេត្តស្ទឹងត្រែង បាននិយាយថា ពិតជាមានការប្រែប្រួល ឡើងចុះមិនទៀង តាមខែនីមួយៗស្រេចតែលើទីផ្សារជាអ្នកកំណត់តម្លៃ ចំពោះដើមខែដំឡូងមីបានថ្លៃ ដល់ពេលដែលដល់ខែប្រជាពលរដ្ឋប្រមូលផលដំឡូងមីគ្រប់ៗគ្នា ដំឡូងមីសំបូរ បែរជាធ្លាក់តម្លៃទៅវិញ ។
លោកចែម វឿន កសិករនៅភូមិរំដេង ឃុំចំការលើ ស្រុកថាឡាបរិវ៉ាត់ បានឱ្យដឹងថា ឆ្នាំនេះគ្រួសារគាត់ដាំដំឡូងមីបានជាង៤ហិចតា តម្លៃដំឡូងមីស្រស់បច្ចុប្បន្ន ក្នុងខែធ្នូ ឆ្នាំ២០២៣ លក់បាន៣៩០ទៅ៤០០រៀលក្នុង១គីឡូក្រាម ។
ស្រីអូន នៅភូមិចំការលើ ឃុំចំការលើ ស្រុកថាឡាបរិវ៉ាត់ បានឱ្យដឹងផងដែរថា គ្រួសាររបស់នាងនាឆ្នាំនេះដាំដំឡូងបានជិត៣ហិចតា ហើយលក់ចេញនៅពេលនេះបាន៤២០រៀល ក្នុង១គីឡូក្រាម ។
ក្រុមកសិករទាំងនោះបន្តថា តម្លៃដំឡូងមីមានការប្រែប្រួលមិនទៀងទៅតាមខែនីមួយៗ កាលពីដើមដៃកំឡុងខែវិច្ឆិកា ដំឡូងមីស្រស់លក់បាន៤៦០ ទៅ៤៧០រៀលក្នុង១គីឡូក្រាមឯណោះ តែពេលដល់ខែដំឡូងសំបូរ កសិករប្រមូលផលគ្រប់គ្នាបែរជាដំឡូងធ្លាក់ថ្លៃទៅវិញ ។ ពួកគាត់បន្តថា ការធ្វើដំឡូងប្រើរយៈពេលចន្លោះពី៥ទៅ៦ខែ ទើបបានផល ។ ចំណាយលើថ្នាំកសិកម្ម ដូចជាថ្នាំបាញ់ស្មៅ ជីរបំប៉នមើម ថ្លៃភ្ជួរ ថ្លៃដាំ ជាដើម ដូច្នេះនៅសល់បានប្រាក់បន្តិចបន្តួចប៉ុណ្ណោះ ។
លោកប្រុញ ពិសី ប្រធានសហគមន៍ដំឡូងមីចំការលើ ស្រុកថាឡាបរិវ៉ាត់ក៏បានឱ្យដឹងផងដែរថា ដំឡូងមីក្នុងរដូវដែលប្រជាកសិករកំពុងប្រមូលផលនេះ ពិតជាធ្លាក់ថ្លៃពិតមែន ។ លោកបន្តថា ពេលនេះដំឡូងមីស្រស់តម្លៃ៤០០រៀល ទៅ៤២០រៀលក្នុង១គីឡូក្រាម ហើយដំឡូងមីក្រៀមតម្លៃ៨៥០រៀលក្នុង១គីឡូក្រាម ។
លោកប្រុញ ពិសី បន្តថា កសិករបានចំណាយទុនច្រើនគួរសមដែរទៅលើការដាំ ការថែទាំ ការដាក់ជីរ ដូច្នេះពួកគាត់អាចបានប្រាក់កម្រៃតិចតួចសល់ពីការចំណាយ ដើម្បីដោះស្រាយជីវភាព ។លោកបន្តថា បច្ចុប្បន្នសហគមន៍ដំឡូងមីរបស់លោកមានសមាជិក១៤២គ្រួសារ និងផ្ទៃដីដាំដំឡូងមីសរុបចំនួន៦០០ហិចតា ៕
ចែករំលែកព័តមាននេះ