ទាញកាំបិ.តកា.ប់បងថ្លៃ និងបងស្រីបង្កើត រួចព្យាយាមរត់គេចខ្លួន តែគេចមិនផុត
- កំពង់ស្ពឺ
ខេត្តកំពង់ស្ពឺ៖ បុរសជាប្អូនថ្លៃម្នាក់ត្រូវបានកម្លាំងនគរបាលស្រុកបសេដ្ឋតាមឃាត់ខ្លួនបាន
ខេត្តកំពង់ស្ពឺ៖ បុរសជាប្អូនថ្លៃម្នាក់ត្រូវបានកម្លាំងនគរបាលស្រុកបសេដ្ឋតាមឃាត់ខ្លួនបាន បន្ទាប់ពីប្អូនថ្លៃរូបនោះបានប្រើហិ.ង្សាដោយចេតនាប្រើកាំបិតផ្គាក់កាប់ទៅលើបងថ្លៃ និងបងស្រីបង្កើត បណ្តាលឱ្យរងរបួសដេរជាច្រើនថ្នេរ ព្រោះតែគំនុំគុំគួន។
ករណីខាងលើបានកើតឡើងកាលពីវេលាម៉ោង៨និង៣០យប់ថ្ងៃទី៦ ខែធ្នូ ឆ្នាំ២០២៣ នៅចំណុចក្រោមផ្ទះរបស់ជនរងគ្រោះ ស្ថិតក្នុងភូមិចំបក់រុនត្បូង ឃុំពោធិម្រាល ស្រុកបសេដ្ឋ ខេត្តកំពង់ស្ពឺ។
នគរបាលស្រុកបសេដ្ឋបាននិយាយឱ្យដឹងថា ជនសង្ស័យឈ្មោះជា ណុប ភេទប្រុស អាយុ៣៦ឆ្នាំ មុខរបរកសិករ រស់នៅភូមិ-ឃុំកើតហេតុខាងលើ ត្រូវជាប្អូនថ្លៃ ។ ចំណែកជនរងគ្រោះទាំង២នាក់ខាងលើ ក្នុងនោះម្នាក់ឈ្មោះឈួន នុ ភេទប្រុស អាយុ៣៣ឆ្នាំ រស់នៅភូមិ-ឃុំកើតហេតុខាងលើ (ត្រូវជាបងថ្លៃ)ចំនួន០១កាំបិត បណ្តាលឲ្យរងរបួសត្រូវចំក្បាលផ្នែកខាងស្តាំរងរបួសធ្ងន់ដេរចំនួន៧ថ្នេរ និងឈ្មោះជា ឡាត់ ភេទស្រី អាយុ៤០ឆ្នាំ រស់នៅភូមិឃុំកេីតហេតុ ត្រូវជាបងបង្កើតរបស់ជនសង្ស័យត្រូវរបួសចំកែងដៃខាងឆ្វេង ដេរចំនួន១០ថ្នេរ ។
នគរបាលស្រុកបសេដ្ឋបាននិយាយឱ្យដឹងថា នៅមុនពេលកើតហេតុ ជនសង្ស័យបានធ្វើសកម្មភាពប្រើកាំបិ.តផ្គាក់ដងឈើ ប្រវែងជាង៦សង់ទីម៉ែត្រ កាប់ទៅលើជនរងគ្រោះជាបងថ្លៃចំនួន១កាំបិត បណ្តាលឲ្យរងរបួសត្រូវចំក្បាលផ្នែកខាងស្តាំរងរបួសធ្ងន់ដេរចំនួន៧ថ្នេរ ខណៈពេលកំពុងតែធ្វើសកម្មភាពនោះ ស្ត្រីជាបងបង្កើតរបស់ជនសង្ស័យ បានរត់មកឃាត់ ក៏ត្រូវបានជនសង្ស័យកាប់ចំនួន០១កាំបិត ត្រូវចំកែងដៃខាងឆ្វេង ដេរចំនួន១០ថ្នេរ ពេលធ្វើសកម្មភាពរួច ជនសង្ស័យគេចខ្លួនបាត់ ។
នគរបាលស្រុកបសេដ្ឋបានបន្តទៀត បន្ទាប់ពីកើតហេតុ ជនរងគ្រោះឈ្មោះឈួន នុ និងឈ្មោះជា ឡាត់ ត្រូវបានបងប្អូនសាច់ញាតិបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកគង់ពិសី។
នគរបាលស្រុកបសេដ្ឋបានបញ្ជាក់ទៀតថា លុះព្រឹកឡើងចូលថ្ងៃទី៧ ខែធ្នូ ឆ្នាំ២០២៣ កម្លាំងជំនាញព្រហ្មទណ្ឌស្រុក បានសហការជាមួយកម្លាំងប៉ុស្តិ៍នគរបាលរដ្ឋបាលឃុំពោធិម្រាល ចុះទៅដល់កន្លែងកើតហេតុ ស្រាវជ្រាវរហូតឃាត់ខ្លួនជនសង្ស័យខាងលើបាន រួមនិងវត្ថុតាងកាំបិតផ្គាក់(កង៉ុកចំនួន០១ដើម) យកមកសាកសួរនៅអធិការដ្ឋាននគរបាលស្រុកបសេដ្ឋ និងកសាងសំណុំរឿងចាត់ការតាមនីតិវិធី។
បើតាមចម្លើយរបស់ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពទៅលើជនរងគ្រោះទាំង២នាក់ប្រាកដមែន ដោយសារតែមូលហេតុធ្លាប់ទាស់ពាក្យសម្ដី ជាមួយជនរងគ្រោះកន្លងមក ទើបនៅថ្ងៃកើតហេតុ ខ្លួនខឹងជនរងគ្រោះដែលត្រូវជាបងថ្លៃ រួចក៏ប្រើហិ.ង្សាកាប់ទៅលើជនរងគ្រោះ បណ្ដាលឲ្យរងរបួសតែម្ដង ។ កន្លងមកជនសង្ស័យរូបនេះ ធ្លាប់ធ្វើសកម្មភាពដេញកាប់ជនរងគ្រោះជាបងថ្លៃ ម្ដងរួចមកហើយ ប៉ុន្តែពេលនោះជនរងគ្រោះគេចខ្លួនទាន់ ទើបមិនបណ្ដាលឲ្យរងរបួស។
បច្ចប្បន្ន ជនសង្ស័យជាប្អូនថ្លៃត្រូវបានឃាត់ខ្លួនរួមជាមួយវត្ថុតាង កសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ