កីឡាការិនីអូស្ត្រាលីសាម៉ាន់ថា ស្តូសួទទួលបានជោគជ័យមួយជំហានបន្ទាប់ពីបានឆ្លងផុតជុំទី១ប្រកួតតឺន្នីសក្របខណ្ឌធំFrench Openនៅទីលានដីក្រហមរ៉ូឡង់ ហ្គារ៉ូសស្ថិតក្នុងទីក្រុងប៉ារីស ប្រទេសបារាំងកាលពីថ្ងៃអាទិត្យទី២២ខែឧសភាកន្លងមក ។
ប្រកួតក្នុងជុំទី១នេះនាងស្តូសួបានយកឈ្នះកីឡាការិនីឆែកអ៊ីវេតា បេណេសូវ៉ាក្នុងលទ្ធផល២សិតជាប់ៗគ្នា៦-២និង៦-៣ ។ នៅទីនេះកាលពីឆ្នាំទៅមិញដែលស្តូសួបានបរាជ័យក្រោមថ្វីដៃកីឡាការិនីអុីតាលី ហ្វ្រង់សេស្កា ស្គៀវ៉ូនក្នុងវគ្គផ្តាច់ព្រ័ត្រ។
ថ្លែងបន្ទាប់ពីទទួលបានជ័យជម្នះ នាងស្តូសួបានបញ្ជាក់ថា៖«ពេលនេះឆ្នាំទៅមិញ គឺនៅទីនេះការប្រកួតរបស់ខ្ញុំបានល្អខ្លាំងណាស់។ សង្ឃឹមថានៅឆ្នាំនេះខ្ញុំធ្វើបានល្អដូចជាឆ្នាំមុនទៀត»។
នៅជុំបន្ទាប់នាងស្តូសួនឹងជួបប្រកួតជាមួយកីឡាការិនីរ៉ូម៉ានីស៊ីម៉ូណា ហាឡេបដែលនាងបានយកឈ្នះក្នុងជុំទី១កាលពីឆ្នាំទៅមិញ ។
កីឡាការិនីស៊ែប៊ីជែឡេណា ជែនកូវិចក៏បានឆ្លងផុតជុំទី១ផងដែរបន្ទាប់ពីបានយកឈ្នះកីឡាការិនីអ៊ុយក្រែនអាឡូណា បុនដារិនកូក្នុងលទ្ធផល៦-៣និង៦-១ ។ នៅជុំបន្ទាប់ជែនកូវិចនឹងជួបប្រកួតជាមួយកីឡាការិនីរុស្ស៊ីវេរ៉ា ឌូសេវីណាដែលបានយកឈ្នះកីឡាការិនីអូស្ត្រាលីជេឡេណា ដូគិចក្នុងលទ្ធផល៤-៦,៦-៣និង៦-២។
ចំណែកលទ្ធផលការប្រកួតឯកត្តជនផ្នែកបុរសវិញ អតីតកីឡាករលំដាប់ទី១ពិភពលោកឡីតុន ហេវីតបានធ្វើឲ្យបណ្តាអ្នកគាំទ្រអស់សង្ឃឹមយ៉ាងខ្លាំងបន្ទាប់ពីរូបគេបានប្រកាសដកខ្លួនពីការប្រកួត។ ក្នុងជុំទី១កីឡាករហេវីតតម្រូវជួបជាមួយកីឡាករអេស្ប៉ាញអាល់បឺត ម៉ុងតានេស។ ការដកខ្លួនមិនប្រកួតរបស់ហេវីតនេះត្រូវបានគេគិតថាប្រហែលមកពីរបួសប្រអប់ជើងរបស់គេដែលបានរើឡើងវិញ ៕
ចែករំលែកព័តមាននេះ