ប្រទេស​ថៃ ៖ គ្រូបង្វឹក​ក្រុមបាល់ទាត់​ជម្រើសជាតិ​ថៃ លោក Thawatchai Damrong-Ongtrakul បាន​សន្យា​ថា​នឹង​ចុះ​ចេញពី​តំណែង ប្រសិនបើ​ក្រុម​បុរស U22 បរាជ័យ​ក្នុង​ការ​ដណ្ដើម​បាន​មេដាយមាស​នៅ​ព្រឹត្តិការណ៍​ស៊ី​ហ្គេ​ម​លើក​ទី​៣៣ ដែល​ប្រទេស​ថៃ​ជា​ម្ចាស់ផ្ទះ​។ នេះ​បើ​តាម​ការ​ចេញផ្សាយ​ពី​សារព័ត៌មាន​វៀតណាម VnExpress កាលពី​ថ្ងៃ​ទី​១៦ ខែកក្កដា កន្លង​ទៅ​។

គោលដៅ​ដ៏​ធំ​របស់​លោក Thawatchai ដែល​ទើបតែ​ត្រូវ​បាន​តែងតាំង​ជំនួស​គ្រូបង្វឹក​ជនជាតិ​ជប៉ុន លោក Takayuki Nishigaya ដែល​ត្រូវ​បាន​បណ្តេញ​ពី​តំណែង​នោះ រួម​មានការ​ឈ្នះ​ជើងឯក​ពានរង្វាន់ ASEAN U23 Championship ឆ្នាំ​២០២៥ មេដាយមាស​នៅ​ព្រឹត្តិការណ៍​ស៊ី​ហ្គេ​ម​ឆ្នាំ​២០២៥ និង​វគ្គ​ជម្រុះ U23 Asian Cup ឆ្នាំ​២០២៦​។

លោក Thawatchai ទទួល​ជោគជ័យ​ក្នុង​អាជីព​ជា​កីឡាករ​ជាមួយ​ក្រុម​ជម្រើសជាតិ​ថៃ ដោយ​បង្ហាញខ្លួន​បាន​៧៣​ប្រកួត មុន​ពេល​ក្លាយជា​គ្រូបង្វឹក​ក្លិប​ជា​ច្រើន​នៅ​ក្នុង​លី​គ​ថៃ (Thai League)​។ ជាក់ស្តែង កាលពី​រដូវ​កាល ២០២៤-២៥ លោក​បាន​ដឹកនាំ​ក្រុម Chonburi ឱ្យ​ឈ្នះ​ជើងឯក​លី​គ​ទី​២ (Thai League 2) ដើម្បី​ឡើង​មក​កាន់​លី​គ​កំពូល (Thai League 1)​។

សម្រាប់​លោក Thawatchai ការ​ទទួល​បន្ទុក​ដឹកនាំ​ក្រុម U22 ថៃ គឺជា​កិត្តិយស​ដ៏​ធំ​បំផុត​ក្នុង​អាជីព​ជា​គ្រូបង្វឹក ហើយ​លោក​បាន​ផ្តោត​លើ​លទ្ធផល​ក្នុង​ការ​ប្រកួត​នា​ពេល​ខាង​មុខ ជា​ពិសេស​នៅ​ព្រឹត្តិការណ៍​ស៊ី​ហ្គេ​ម ៣៣ នៅ​លើ​ទឹកដី​ខ្លួនឯង ដែល​នឹង​ចាប់ផ្តើម​ពី​ថ្ងៃ​ទី​៩ ដល់​ថ្ងៃ​ទី​២០ ខែធ្នូ ដោយ​ការ​ប្រកួត​គ្រប់​វិញ្ញាសា​រៀបចំ​ឡើង​ក្នុង​ទីក្រុង​បាងកក ឈុ​ន​បុរី និង សុង​ក្លា​។ ថ្លែង​ទៅ​កាន់​គេហទំព័រ​ផ្លូវការ​របស់​សមាគម​បាល់ទាត់​ថៃ (FAT) លោក Thawatchai ថា «​យើង​ត្រូវ​តែ​ឈ្នះ​មេដាយមាស បន្ទាប់​ពី​ការ​ព្យាយាម​បរាជ័យ​បី​ដង​។ ប្រសិនបើ​យើង​មិន​ឈ្នះ​ទេ បុគ្គលិក​បង្វឹក ព្រមទាំង​ខ្ញុំ​ត្រៀមខ្លួន​ជា​ស្រេច​ដើម្បី​លាលែង​ពី​តំណែង​»​។

ក្រុមបាល់ទាត់​បុរស​ថៃ​ជា​ក្រុម​ឈ្នះ​មេដាយមាស​ព្រឹត្តិការណ៍ SEA Games ច្រើន​ជាងគេ​បង្អស់ ពោល​ចំនួន​១៦​ដង ខណៈ​ដែល​ការ​ឈ្នះ​ចុង​ក្រោយ​របស់​ពួក​គេ​កើតឡើង​ក្នុង​ឆ្នាំ ២០១៧ ហើយ​បន្ទាប់​ពី​នោះ វៀតណាម​ដណ្តើម​បាន​មេដាយមាស​ឆ្នាំ ២០១៩ និង ២០២១ ហើយ​ឥណ្ឌូ​ណេ​ស៊ី នៅ​ឆ្នាំ ២០២៣​។

ក្នុង​រយៈពេល​៨​ឆ្នាំ​កន្លង​មកនេះ ប្រទេស​ថៃ​បាន​ផ្លាស់​ប្តូរ​គ្រូបង្វឹក​ឈុត U22 និង U23 ចំនួន​១០​ដង ដោយ​ក្នុង​នោះ​រួម​ទាំង​គ្រូបង្វឹក​ជនជាតិ​ជប៉ុន លោក Akira Nishino និង​គ្រូបង្វឹក​ជនជាតិ​ប្រេ​ស៊ី​ល លោក Mano Polking ដែល​សុទ្ធតែ​បរាជ័យ​ក្នុង​ការ​នាំ​យក​ភាព​ជោគជ័យ​នៃ​ការ​ប្រកួត​ថ្នាក់​តំបន់​។

យ៉ាងណាមិញ មុន​ឈាន​ទៅ​ដល់​ការ​ប្រកួត​ព្រឹត្តិការណ៍​ស៊ី​ហ្គេ​ម​នៅ​ចុងឆ្នាំ​នេះ ក្រុម U22 របស់​ថៃ​នឹង​ត្រូវ​ចូលរួម​ការ​ប្រកួត​ពានរង្វាន់​ជើងឯក​អាស៊ាន​យុវជន​អាយុ​ក្រោម​២៣​ឆ្នាំ (SEAN U-23 Championship 2025) នៅ​ទីក្រុង​ហ្សា​កា​តា ប្រទេស​ឥណ្ឌូ​ណេ​ស៊ី ចាប់ពី​ថ្ងៃ​ទី​១៥ ដល់​ថ្ងៃ​ទី ២៩ ខែកក្កដា ជា​មុន​សិន ដោយ​ពួក​គេ​ស្ថិត​ក្នុង​ពូ​ល C រួម​ជាមួយនឹង​មី​យ៉ា​ន់​ម៉ា និង​ទី​ម័​រ​ខាងកើត ដោយ​ពួក​គេ​ត្រូវ​ប៉ះ​ទី​ម័​រ​ខាងកើត នៅ​ថ្ងៃ​ទី​១៩ មុន​បន្ត​ប៉ះ​មី​យ៉ា​ន់​ម៉ា នៅ​ថ្ងៃ​ទី​២២៕ រូបភាព ៖ FAT