សហរដ្ឋអាមេរិក ៖ ខ្សែប្រយុទ្ធ​ឆ្នើម Kylian Mbappé បាន​បង្កើត​ប្រវត្តិសាស្ត្រ​ថ្មី​ប្រចាំ​ក្លិប Real Madrid មុន​ពេល​ត្រូវ​ប្រឈម​មុខ​នឹង​ក្រុម​ចាស់​របស់​ខ្លួន PSG នៅ​ក្នុង​ការ​ប្រកួត​វគ្គ​ពាក់កណ្តាល​ផ្តាច់ព្រ័ត្រ​ពានរង្វាន់ FIFA Club World Cup ឆ្នាំ​២០២៥ នៅ​លើ​ទឹកដី​សហរដ្ឋអាមេរិក​។

ខ្សែប្រយុទ្ធ​ឆ្នើម​សញ្ជាតិ​បារាំង Kylian Mbappé ជា​កីឡាករ​ដំបូង​គេ​បង្អស់ ដែល​រក​គ្រាប់​បាល់​បញ្ចូល​ទី​ក្នុង​ការ​ប្រកួតប្រជែង​ពានរង្វាន់​ចំនួន ៧ ផ្សេង​គ្នា​ក្នុង​មួយ​រដូវ​កាល​សម្រាប់ Real Madrid​។ កំណត់​ត្រា​ជា​ប្រវត្តិសាស្ត្រ​មិន​ធ្លាប់​មាន​សម្រាប់​ក្លិប Real Madrid មួយ​នេះ កើតឡើង​នៅ​ពេល​ដែល​ខ្សែប្រយុទ្ធ​កំពូល​ល្បឿន​វ័យ​២៦​ឆ្នាំ​រូប​នេះ រក​បាល់​បញ្ចូល​ទី​១​គ្រាប់​លើ​ក្រុម Borussia Dortmund ក្នុង​ការ​ប្រកួត​វគ្គ​៨​ក្រុម​ចុង​ក្រោយ ពានរង្វាន់ FIFA Club World Cup ឆ្នាំ​២០២៥ ដែល​បាន​បញ្ចប់​ទៅ​ដោយ​លទ្ធផល Real Madrid យកឈ្នះ ៣-២ កាលពី​ថ្ងៃ​ទី​៥ ខែកក្កដា កន្លង​ទៅ​។

មក​ទល់​ពេល​នេះ Mbappé រក​គ្រាប់​បាល់​បញ្ចូល​ទី​ក្នុង​ពានរង្វាន់ UEFA Super Cup, La Liga, Champions League, FIFA Intercontinental Cup, Spanish Super Cup, Copa del Rey និង​នៅ​ពេល​ថ្មី​ៗ​នេះ​នៅ FIFA Club World Cup ។ ខ្សែប្រយុទ្ធ​រួមចំណែក​ជួយ​ក្រុម​មាន់គក​បារាំង​ឈ្នះ​ពានរង្វាន់ FIFA World Cup ឆ្នាំ​២០១៨ រូប​នេះ បាន​បំបែក​កំណត់​ត្រាតែ​មួយ​គត់​របស់​ខ្សែប្រយុទ្ធ​រួម​សញ្ជាតិ Karim Benzema ដែល​ជា​កីឡាករ​ស៊ុត​បញ្ចូល​ទី​ក្នុង​ការ​ប្រកួតប្រជែង​ពានរង្វាន់ ៦ ផ្សេង​គ្នា​ក្នុង​រដូវ​កាល ២០២២-២៣ ដ្បិត​បច្ចុប្បន្ន​អតីត​ខ្សែប្រយុទ្ធ​ក្រុម​មាន់គក​បារាំង​វ័យ​៣៧​ឆ្នាំ​រូប​នេះ កំពុង​ប្រកប​អាជីព​នៅ​ក្លិប Al-Ittihad នៃ​លី​គ​កំពូល​ប្រទេស​អា​រ៉ា​ប៊ី​សា​អូឌីត​។

សូម​ជម្រាប់​ថា ក្រុម​ស្តេច​ស Real Madrid នឹង​ត្រូវ​តទល់​ជាមួយ​ក្រុម​សេដ្ឋី​បារាំង PSG នៅ​វេលា​ម៉ោង​២​នាទី​រំលង​អា​ធ្រា​ត្រ​ឈាន​ចូល​ថ្ងៃ​ទី​១០ ខែកក្កដា ឆ្នាំ​២០២៥ (​ម៉ោង​នៅ​កម្ពុជា​) ដើម្បី​ដណ្តើម​កៅអី​វគ្គ​ផ្តាច់ព្រ័ត្រ​ពានរង្វាន់ FIFA Club World Cup ឆ្នាំ​២០២៥ ដែល​សហរដ្ឋអាមេរិក​ធ្វើ​ជា​ម្ចាស់ផ្ទះ​។

Mbappé នឹង​ជួប​ជាមួយ​ក្រុម​ចាស់​របស់​ខ្លួន​ក្នុង​នាម​ជា​គូប្រជែង​វិញ​ម្តង ដ្បិត​កីឡាករ​រូប​នេះ​ធ្លាប់​ចំណាយពេល​៦​ឆ្នាំ​ជាមួយ PSG មុន​ពេល​ផ្លាស់​មក​ចូលរួម​ជាមួយ Real Madrid កាលពី​ឆ្នាំ​២០២៤៕ ប្រភព ៖ Sports Illustrated និង Onefootball