ប្រទេសចិន ៖ ក្លិបបាល់ទាត់ Changchun Xidu នៅលីគលំដាប់ទី៣ចិន (League 2) ត្រូវបានពិន័យជាទឹកប្រាក់៣ម៉ឺនយ័ន ឬស្មើនឹង៤ពាន់ដុល្លារអាមេរិក…
ប្រទេសចិន ៖ ក្លិបបាល់ទាត់ Changchun Xidu នៅលីគលំដាប់ទី៣ចិន (League 2) ត្រូវបានពិន័យជាទឹកប្រាក់៣ម៉ឺនយ័ន ឬស្មើនឹង៤ពាន់ដុល្លារអាមេរិក បន្ទាប់ពីត្រូវបានរងឃើញថាប្រើផ្លូវក្នុងលួចបង្កប់យ័ន្ត ដើម្បីយកឈ្នះលើគូប្រកួតរបស់ខ្លួន។ នេះបើតាមប្រភពពីកាសែត South China Morning Post បានចេញផ្សាយកាលពីថ្មីៗនេះ។
រឿងរ៉ាវនេះបានកើតឡើងនៅមុនការប្រកួតដែលក្រុមម្ចាស់ផ្ទះ Changchun Xidu យកឈ្នះដោយលទ្ធផល ២-០ លើក្រុមភ្ញៀវ Shanxi Chongde Ronghai កាលពីថ្ងៃទី២៨ ខែមិថុនា ឆ្នាំ២០២៥ កន្លងទៅ។ ប្រភពពីកាសែត South China Morning Post បានរាយការណ៍ថា មុនចាប់ផ្តើមការប្រកួតក្រុមម្ចាស់ផ្ទះ Changchun Xidu ដែលក្រោយមកត្រូវបានរកឃើញថាបានលួចបង្កប់ក្រដាសយ័ន្តពណ៌លឿង នៅក្នុងបន្ទប់ផ្លាស់សំលៀកបំពាក់របស់ក្រុមភ្ញៀវ Shanxi Chongde ខណៈដែលក្រដាសយ័ន្តបានរំលេចអក្សរក្នុងន័យផ្តល់សំណាងអាក្រក់ឱ្យក្រុម Shanxi Chongde ទទួលបរាជ័យការប្រកួត។
ការប្រើប្រាស់ក្រដាសយ័ន្តត្រូវបានគេស្គាល់ថា «ហ្វូ» (Fu) នៅក្នុងភាសាចិន ដែលបានចាក់ឫសនៅក្នុងជំនឿខាងវិញ្ញាណប្រពៃណីរបស់ចិន ដែលជារឿយៗមានបំណងនាំមកនូវសំណាងល្អ ឬការពារពីអំពើអាក្រក់។ ទោះជាយ៉ាងណាក៏ដោយ ក្រដាសយ័ន្តនេះក៏ត្រូវបានគេជឿថា នឹងនាំមកនូវសំណាងអាក្រក់ដល់អ្នកដទៃ នៅពេលដែលយកទៅប្រើប្រាស់លើផ្លូវខុស ឬផ្លូវអាក្រក់។
យោងតាមប្រព័ន្ធផ្សព្វផ្សាយក្នុងស្រុកក៏បានរាយការណ៍ថា នេះមិនមែនជាលើកទី១ទេ ដែលក្រុម Changchun Xidu ធ្វើបែបនេះ ដោយកន្លងមកក្រុមផ្សេងទៀតក្នុងការប្រកួតលីគលំដាប់ទី៣ចិន ក៏បានរាយការណ៍ថា ពួកគេបានរកឃើញក្រដាសយ័ន្តស្រដៀងគ្នានេះ នៅពេលប្រកួតជាមួយក្រុមម្ចាស់ផ្ទះ Changchun Xidu។
សូមជម្រាបថា ការប្រកួតក្របខណ្ឌលីគលំដាប់ទី៣ចិន (League 2) រដូវកាល ២០២៥ បានដំណើរការប្រកួតដល់សប្តាហ៍ទី១៨រួចហើយ ដោយក្រុម Changchun Xidu កំពុងឈរនៅចំណាត់ថ្នាក់លេខ២ ដោយមាន៣៤ពិន្ទុ គម្លាត៣ពិន្ទុពីក្រុមកំពូលតារាង Wuxi Wugo។ ក្រុមចំណាត់កំពូលទាំង ៤ នឹងឈានទៅកាន់ការប្រកួតវគ្គ Play-off ដណ្តើមកៅអីឡើងទៅលីគលំដាប់ទី២ (League 1) រដូវកាលក្រោយ។ ចំណែកក្រុមដែលនៅសេសសល់ចំនួន ៨ ក្រុម នឹងត្រូវប្រកួតប្រជែងគ្នា គេចផុតការកាត់ចោលទៅលីគលំដាប់ទី៤ (Chinese Champions League)។
បើតាមប្រភពពី South China Morning Post បានរាយការណ៍ថា នេះមិនមែនជាលើកទី១ទេ ដែលវិស័យបាល់ទាត់របស់ចិន ត្រូវបានដាក់ចំណងជើងពាក់ព័ន្ធនឹងការប៉ុនប៉ងប្រើប្រាស់ផ្លូវក្នុង ដើម្បីឈ្នះការប្រកួត។ ជាក់ស្តែងក្នុងឆ្នាំ២០១៧ ក្លិប Henan Jianye នៅលីគកំពូលចិន (CSL) បានអញ្ជើញចារ្យ Taoist ១៥នាក់ ដើម្បីធ្វើពិធីនៅលើទីលានកីឡដ្ឋានរបស់ពួកគេ មុនពេលការប្រកួតដ៏សំខាន់ជាមួយក្រុមភ្ញៀវ Shandong Luneng Taishan ដោយនៅពេលនោះ ពួកគេបានបន្តឈ្នះលទ្ធផល ២-១ ដោយគេចផុតពីតំបន់ការកាត់ចោលត្រឹមមួយចំណាត់ថ្នាក់ប៉ុណ្ណោះ៕ ប្រភព ៖ VnExpress
ចែករំលែកព័តមាននេះ