ខេត្តបាត់ដំបង ៖ បក្សពួកក្រុមចោរលួចគោម្នាក់ ក្នុងចំណោមបីនាក់ ត្រូវម្ចាស់គោនិងអ្នកភូមិដេញចាប់បានភ្លាមៗ ពេលកំពុងនាំគ្នាធ្វើសកម្មភាពដេញគោរបស់អ្នកភូមិចំនួន០៦ក្បាលឱ្យឡើងរថយន្ត កាលពីរសៀលថ្ងៃទី០៤ ធ្នូ នៅចំណុចភូមិដង្គត់ ឃុំស្ដៅ…
ខេត្តបាត់ដំបង ៖ បក្សពួកក្រុមចោរលួចគោម្នាក់ ក្នុងចំណោមបីនាក់ ត្រូវម្ចាស់គោនិងអ្នកភូមិដេញចាប់បានភ្លាមៗ ពេលកំពុងនាំគ្នាធ្វើសកម្មភាពដេញគោរបស់អ្នកភូមិចំនួន០៦ក្បាលឱ្យឡើងរថយន្ត កាលពីរសៀលថ្ងៃទី០៤ ធ្នូ នៅចំណុចភូមិដង្គត់ ឃុំស្ដៅ ស្រុករតនមណ្ឌល ហើយអ្នកភូមិបានរាយការណ៍ប្រាប់សមត្ថកិច្ចឲ្យជួយអន្តរាគមន៏ភ្លាមៗដែរ ដើម្បីប្រគល់ជនដៃដល់ឲ្យចាត់ការតាមច្បាប់ ។
យោងតាមរបាយការណ៍បឋមរបស់លោកមេភូមិដង្តត់បានឲ្យដឹងថា ក្រុមចោរចំនួន០៣នាក់ ជិះរថយន្តមួយគ្រឿងប្រភេទទេសចរណ៍ទួរីស ពណ៌ស ពាក់ស្លាកលេខបាត់ដំបង 2A-7546 បានបើកចូលទៅក្នុងចំការមៀនមួយកន្លែង ចម្ងាយពីផ្លូវកៅស៊ូប្រហែល៥០ម៉េត្រ ។ ពេលនោះ ក្រុមចោរបាននាំគ្នាដេញគៀងគោអ្នកភូមិចំនួន០៦ក្បាល ឡើងរថយន្តរបស់ខ្លួន តែចៃដន្យត្រូវម្ចាស់គោតាមទាន់ សួរនាំក៏ផ្អើលរត់ចូលព្រៃបាត់ពីរនាក់ រីឯតៃកុងឡានត្រូវបានម្ចាស់គោនិងអ្នកភូមិក្របួចកជាប់ ខណៈព្យាយាមបើកឡានរត់គេចដែរ។
នៅក្នុងរបាយការណ៍ លោកមេភូមិមិនបានបង្ហាញអត្តសញ្ញាណម្ចាស់គោទេ ហើយក៏មិនបានប្រាប់ពីអត្តសញ្ញាចោរម្នាក់ដែលត្រូវចាប់ខ្លួនបានភ្លាមៗដែរ តែលោកមេភូមិបាននិយាយពីសកម្មភាពក្រុមចោរលួចគោ និងអំពាវនាវឲ្យអ្នកភូមិត្រូវមានការប្រុងប្រយ័ត្នចំពោះសត្វគោដែលលេងឲ្យស៊ីស្មៅ ឬចងឆ្ងាយពីផ្ទះ។ លោកមេភូមិបានស្រង់សម្ដីម្ចាស់គោថា ពេលគាត់កំពុងដើររកគោ ស្រាប់តែប្រទះឃើញជនម្នាក់បក្សពួកចោរ ដែលអង្គុយយាមច្រកចូលកន្លែងលួចគោ។
ពេលម្ចាស់គោសួររកគោ ស្រាប់តែជននោះឆ្លើយបង្វែងដានថា «គោដើរទៅខាងលិចហើយ» តែតាមការពិត ពួកវាកំពុងដឹកគោឡើងឡាន ។ បើតាមម្ចាស់គោបាននិយាយថា ពេលគាត់ជិះម៉ូតូទៅដល់ គាត់មិនបានឃើញគោទេ តែពេលនោះស្រាប់តែហ្វូងគោឮ និងហាក់ស្គាល់សំឡេងម៉ូតូគាត់ ពួកវាក៏អើតករកមើល ហើយក៏រត់ចេញពីព្រៃសំដៅមកគាត់ ខណៈត្រៀមឡើងឡានចោរទៅហើយ ។
ពេលនោះ ម្ចាស់គោពីរនាក់ប្ដីប្រពន្ធបានស្រែកឆោឡោឲ្យអ្នកភូមិក្បែរនោះជួយចាប់ចោរ។ ម្ចាស់គោបាននិយាយប្រាប់មេភូមិថា ពេលនោះ ម្ចាស់គោបានស្រែកហៅអ្នកភូមិផង អ្នកដំណើរផងឲ្យជួយចាប់ចោរលួចគោ និងទូរស័ព្ទសុំជំនួយពីសមត្ថកិច្ចផង ។ ស្ថិតក្នុងស្ថានភាពបែបនេះ ចោរម្នាក់ដែលយាមផ្លូវ និងម្នាក់ទៀតលោតចុះពីក្នុងឡាន រត់ចូលព្រៃបាត់ឈឹង រីឯម្នាក់ទៀតជាបើកបរឡាន បានព្យាយាមបើករត់គេច ។
ប៉ុន្តែពេលបើកឡើងផ្លូវកៅស៊ូក៏ជ្រុលហូសទៅធ្លាក់ប្រឡាយ ទើបត្រូវម្ចាស់គោនិងអ្នកក្របួចកជាប់ និងបានប្រគល់ឲ្យកម្លាំងនគរបាលប៉ុស្ដិ៍រដ្ឋបាលស្ដៅ ទាំងមនុស្ស ទាំងរថយន្ត ដើម្បីចាត់វិធានការតែម្ដង ។ បើតាមសមត្ថកិច្ច បានប្រាប់ថា បើតាមការស្រាវជ្រាវ ក្រុមចោរលួចគោខាងលើនេះ និង ភិនភាគនៃរថយន្ត ធ្លាប់ត្រូវបានកម្លាំងជំនាញកំណត់ជាមុខសញ្ញា និងតាមដានសកម្មភាពក្រុមនេះរហូតមក ។
ក្រុមនេះ ធ្លាប់ធ្វើសកម្មភាពលួចគោច្រើនលើកហើយ តែលើកនេះត្រូវអស់លក្ខណ៍ដោយសារម្ចាស់គោតាមទាន់ពេលកំពុងធ្វើសកម្មភាពដេញគោឡើងឡានទាំងថ្ងៃ ។ យ៉ាងណាក្ដី ពេលនេះមន្ត្រីជំនាញ អធិការស្រុករតនមណ្ឌលកំពុងសួរនាំ ចាត់ការតាមនីតិវីធីហើយ ៕
ចែករំលែកព័តមាននេះ