ទីក្រុងឌូបៃ ៖ រដ្ឋមន្ត្រីក្រសួងបរិស្ថានកម្ពុជា និង ADB បើកកិច្ចប្រជុំទ្វេភាគី ក្នុងព្រឹត្តិការណ៍ នៃសន្និសីទគូភាគី លើកទី២៨ COP-28…
ទីក្រុងឌូបៃ ៖ រដ្ឋមន្ត្រីក្រសួងបរិស្ថានកម្ពុជា និង ADB បើកកិច្ចប្រជុំទ្វេភាគី ក្នុងព្រឹត្តិការណ៍ នៃសន្និសីទគូភាគី លើកទី២៨ COP-28 នៅទីក្រុងឌូបៃ ។
ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន តំណាងសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំសហការីចូលរួមកិច្ចប្រជុំទ្វេភាគីជាមួយ Mr Winfried Wicklein, Director General of Southeast Asia Department, ADB ដើម្បីពង្រឹង និងពង្រីកកិច្ចសហប្រតិបត្តិការ។ ក្នុងកិច្ចប្រជុំដ៏មានសារសំខាន់នេះ ភាគីទាំងពីរ បានឯកភាពគ្នា លើចំណុច ៖
១-បន្តពិភាក្សា ដើម្បីរៀបចំគម្រោងគាំទ្រទៅដល់មូលធនមនុស្ស ដែលបន្សាំទៅនឹងការប្រែប្រួលអាកាសធាតុ (human resilient) ក្នុងនោះចាប់ផ្តើមពីការយកចិត្តទុកដាក់ទៅលើសិស្សានុសិស្ស ដោយត្រូវបំពាក់ប្រព័ន្ធចម្រោះទឹកបរិភោគ បំពាក់ធុងទុកដាក់ និងញែកសំរាម ព្រមទាំងដាំដើមឈើ នៅតាមសាលារៀន និងទីកន្លែងសាធារណៈនានាទូទាំងប្រទេស ។
២-ប្រើប្រាស់យន្តការក្រុមប្រឹក្សាជាតិអភិវឌ្ឍន៍ដោយចីរភាព ដើម្បីតម្រង់ទិសការរៀបចំគម្រោង និងវាយតម្លៃការអនុវត្តគម្រោង សំដៅពង្រឹងប្រសិទ្ធភាពគម្រោង និងពង្រីកការចូលរួមពីក្រសួងស្ថាប័ន សំដៅទទួលបាននូវការអភិវឌ្ឍដោយចីរភាព និងភាពធន់ទៅនឹងការប្រែប្រួលអាកាសធាតុ ។
៣-បង្កើតឱកាសកៀរគរ ជំនួយឥតសំណង និងកម្ចីមានការប្រាក់ទាប មកបន្តការអភិវឌ្ឍថាមពល កកើតឡើងវិញ ព្រោះកម្ពុជាបានប្ដេជ្ញាចិត្តបង្កើនថាមពលបៃតងឱ្យដល់ ៧០ភាគរយ ។
ក្នុងកិច្ចប្រជុំទ្វេភាគីនេះ ភាគី ADB បានបង្ហាញជំហរគាំទ្រយ៉ាងពេញទំហឹង ចំពោះយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា និងជាពិសេសគាំទ្រចំពោះយុទ្ធសាស្ត្រចក្រាវិស័យបរិស្ថាន ដែលបានផ្តល់អាទិភាពទៅលើភាពស្អាត ភាពបៃតង និងចីរភាព ៕
ចែករំលែកព័តមាននេះ