អ្នកទោសប៉ាឡេស្ទីន២៤០នាក់ និងចំណាប់ខ្មាំងអ៊ីស្រាអែល១១០នាក់ដោះលែងរួចហើយ
សង្គ្រាមអ៊ីស្រាអែល និងហាម៉ាស់ ៖ អាជ្ញាធរពន្ធនាគារអ៊ីស្រាអែលប្រកាសថា អ្នកទោសប៉ាឡេស្ទីន៣០
សង្គ្រាមអ៊ីស្រាអែល និងហាម៉ាស់ ៖ អាជ្ញាធរពន្ធនាគារអ៊ីស្រាអែលប្រកាសថា អ្នកទោសប៉ាឡេស្ទីន៣០នាក់ទៀត ដែលសុទ្ធតែជានារីនិងអនីតិជន ជាប់ឃុំឃាំងក្នុងបណ្ដាពន្ធនាគារអ៊ីស្រាអែល ត្រូវបានដោះលែង កាលពីយប់ថ្ងៃទី៣០ វិច្ឆិកា មកថ្ងៃទី១ ធ្នូ ដោយអនុវត្តកិច្ចព្រមព្រៀងឈប់បាញ់រវាងអ៊ីស្រាអែលនិងក្រុមហាម៉ាស់។
អ្នកទោសទាំងនេះត្រូវបានដោះលែងប៉ុន្មានម៉ោង មុនផុតកំណត់នៃបទឈប់បាញ់គ្នា បន្ទាប់ពីក្រុមហាម៉ាស់ដោះលែង នាពេលមុននេះចំណាប់ខ្មាំងអ៊ីស្រាអែល៨នាក់ដែលជាប់ឃុំឃាំងនៅជ្រោយហ្គាហ្សា។ មុននេះប្រទេសកាតាជាអាជ្ញាកណ្ដាលសំខាន់នៃការចរចាឈប់បាញ់គ្នាប្រកាសថា អ្នកទោសប៉ាឡេស្ទីនដែលត្រូវដោះលែងថ្មី មាននារី៧នាក់និងអនីតិជន២៣នាក់។
ចាប់តាំងពីចូលជាធរមានពីថ្ងៃទី២៤ វិច្ឆិកាមក កិច្ចព្រមព្រៀងឈប់បាញ់គ្នា រវាងអ៊ីស្រាអែលនិងក្រុមហាម៉ាស់ បាននាំទៅដល់ការដោះលែងចំណាប់ខ្មាំង១១០នាក់ ក្នុងនោះមាននារី៨០នាក់ កុមារនិងយុវជនមានអាយុក្រោម១៩ឆ្នាំជាជនជាតិអ៊ីស្រាអែលឬសញ្ជាតិ២។ ជាថ្នូរវិញអ្នកទោសប៉ាឡេស្ទីន២៤០នាក់ទទួលបានការដោះលែង។ ម្យ៉ាងវិញទៀតជនបរទេស ៣០នាក់ភាគច្រើនជាជនជាតិថៃដែលធ្វើការនៅអ៊ីស្រាអែល ត្រូវបានដោះលែងក្រៅក្របខណ្ឌនៃកិច្ចព្រមព្រៀងនេះ៕
ចែករំលែកព័តមាននេះ