ADផ្ទាំងផ្សព្វផ្សាយពាណិជ្ជកម្ម

UN ស្នើឱ្យបង្កើតរដ្ឋពីរដើម្បីបញ្ចប់ជម្លោះអ៊ីស្រាអែល-ប៉ាឡេស្ទីន

1 ឆ្នាំ មុន

៣០ ខែ វិច្ឆិកា ឆ្នាំ ២០២៣ ម៉ោង ០១:២៣

ទីក្រុងហ្សឺណែវ៖ អង្គការសហប្រជាជាតិអំពាវនាវឱ្យសហគមន៍អន្តរជាតិបន្តដំណើរឆ្ពោះទៅមុខនៅក្នុងការបង្កើតរដ្ឋពីរដើម្បីដោះស្រាយជម្លោះអ៊ីស្រាអែល និងប៉ាឡេស្ទីន។ អង្គការសហប្រជាជាតិយល់ថាទីក្រុងយេរូសាឡឹមគួរតែបែងចែកជាពីរចំណែកឱ្យទៅប៉ាឡេស្ទីនមួយចំណែក និងអ៊ីស្រាអែលមួយចំណែកសម្រាប់ឱ្យរដ្ឋទាំង២នេះធ្វើជារដ្ឋធានីរបស់ខ្លួន។ នាយកការិយាល័យអង្គការសហប្រជាជាតិប្រចាំទីក្រុងហ្សឺណែវ លោកស្រីថាធាណា (Tatiana) ថ្លែងថាពេលវេលាបានកន្លងផុតទៅជាយូរ។ ដូច្នេះ…

ទីក្រុងហ្សឺណែវ៖ អង្គការសហប្រជាជាតិអំពាវនាវឱ្យសហគមន៍អន្តរជាតិបន្តដំណើរឆ្ពោះទៅមុខនៅក្នុងការបង្កើតរដ្ឋពីរដើម្បីដោះស្រាយជម្លោះអ៊ីស្រាអែល និងប៉ាឡេស្ទីន។ អង្គការសហប្រជាជាតិយល់ថាទីក្រុងយេរូសាឡឹមគួរតែបែងចែកជាពីរចំណែកឱ្យទៅប៉ាឡេស្ទីនមួយចំណែក និងអ៊ីស្រាអែលមួយចំណែកសម្រាប់ឱ្យរដ្ឋទាំង២នេះធ្វើជារដ្ឋធានីរបស់ខ្លួន។

នាយកការិយាល័យអង្គការសហប្រជាជាតិប្រចាំទីក្រុងហ្សឺណែវ លោកស្រីថាធាណា (Tatiana) ថ្លែងថាពេលវេលាបានកន្លងផុតទៅជាយូរ។ ដូច្នេះ គេត្រូវតែបន្តបេសកកម្មស្វែងរកដំណោះស្រាយមួយដើម្បីបង្កើតរដ្ឋពីរដែលជារដ្ឋមានស្ថិរភាពជាអចិន្ត្រៃយ៍។ ការបង្កើតរដ្ឋពីរធ្វើឡើងដោយផ្អែកទៅលើគោលការណ៍របស់អង្គការសហប្រជាជាតិ និងច្បាប់អន្តរជាតិ។

លោកស្រីថ្លែងបន្តទៀតថាតាមរយៈដំណោះស្រាយនេះ អ៊ីស្រាអែល និងប៉ាឡេស្ទីនអាចរួមរស់ក្បែរគ្នាដោយសុខដុមរមនាប្រកបដោយសន្តិសុខពេញលេញ និងមានទីក្រុងយេរូសាឡឹមជារដ្ឋធានីនៃរដ្ឋទាំងពីរ។ ការថ្លែងដូច្នេះស្របពេលដែលអង្គការសហប្រជាជាតិរៀបចំទិវាសាមគ្គីជាអន្តរជាតិជាមួយប្រជាជនប៉ាឡេស្ទីនដែលតែងតែរៀបចំធ្វើឡើងជារៀងរាល់ឆ្នាំ។

ទិវានេះរម្លឹកទៅដល់ថ្ងៃដែលមហាសន្និបាតអង្គការសហប្រជាជាតិអនុម័តគាំទ្រផែនការពុះច្រៀកទឹកដីប៉ាឡេស្ទីនជាពីរ។ ១ចំណែកជារដ្ឋជ្វីប និង១ចំណែកទៀតជារដ្ឋប៉ាឡេស្ទីន។ ចំណែកទីក្រុងយេរូសាឡឹមទុកឱ្យស្ថាប័នអន្តរជាតិជាអ្នកមើលការខុសត្រូវ។ ការអំពាវនាវឱ្យបង្កើតរដ្ឋពីរមិនមែនជារឿងថ្មីទេ។ ប៉ុន្តែលើកនេះមានលក្ខណៈផុសផុលខ្លាំងក្រោយព្រឹត្តិការណ៍ថ្ងៃទី៧ ខែតុលាដែលនាំទៅដល់ការវាយប្រហារសងសឹករបស់អ៊ីស្រាអែលស្លាប់មនុស្សជាង១៥០០០នាក់នៅតំបន់ហ្កាហ្សា។

យោងតាមសេណារីយោនៃការបង្កើតរដ្ឋពីរ ប៉ាឡេស្ទីននឹងមានតំបន់ត្រួតត្រានៅវេសស្បេង (West Bank) និងហ្កាហ្សាស្ទ្រីប (Gaza Strip)។ ចំណែកអ៊ីស្រាអែលមានតំបន់ត្រួតត្រានៅលើទឹកដីអ៊ីស្រាអែលសព្វថ្ងៃ។ តាមពិត អ៊ីស្រាអែលមិនជំទាស់ទេនឹងការបង្កើតរដ្ឋពីរ។ សំខាន់កុំឱ្យតែប៉ាឡេស្ទីនមានកងទ័ព និងមានក្រសួងការពារជាតិ។ អ៊ីស្រាអែលទាមទារឱ្យប៉ាឡេស្ទីនជារដ្ឋដែលគ្មានកងទ័ព ឬកងកម្លាំងប្រដាប់អាវុធ។ បើមិនអីចឹងទេនឹងគំរាមកំហែងចំពោះសន្តិសុខជាតិរបស់អ៊ីស្រាអែល។

ប៉ាឡេស្ទីនចង់បានទីក្រុងយេរូសាឡឹមខាងកើតធ្វើជារដ្ឋធានីរបស់ខ្លួន។ តំបន់នោះរួមបញ្ចូលទាំងដែនដីដ៏ពិសិដ្ឋរបស់ប៉ាឡេស្ទីនកាលពីសម័យបុរាណ។ ជនជាតិជ្វីប និងអ្នកកាន់សាសនាគ្រិស្តក៏ចាត់ទុកទីនេះជាដែនដីពិសិដ្ឋរបស់ខ្លួនដែរ។ ដូច្នេះ អ៊ីស្រាអែលមិនព្រមលះបង់យេរូសាឡឹមខាងកើតទៅឱ្យប៉ាឡេស្ទីនទេ។ ឯកអគ្គរដ្ឋទូតប៉ាឡេស្ទីនប្រចាំអង្គការសហប្រជាជាតិថ្លែងថាជម្លោះនាពេលបច្ចុប្បន្ននេះជាការរម្លឹកឱ្យសហគមន៍អន្តរជាតិដឹងថាពួកគេចាំបាច់ត្រូវតែគាំទ្រការបង្កើតរដ្ឋពីរ។

គំនិតផ្ដួចផ្ដើមបង្កើតរដ្ឋពីរ បើតាមឯកអគ្គរដ្ឋទូតរូបនេះ ជារឿងដែលពិបាកបន្ទាប់ពីអ៊ីស្រាអែលបញ្ជូនមនុស្សទៅតាំងទីលំនៅនៅលើទឹកដីប៉ាឡេស្ទីន ហើយធ្វើឱ្យទឹកដីប៉ាឡេស្ទីនកាន់តែរួមតូចទៅៗ។ ប៉ុន្តែលោកនៅតែមានសុទិដ្ឋិនិយមថាមិនទាន់ហួសពេលនៅឡើយទេនៅក្នុងការបង្កើតរដ្ឋពីរ។ សំខាន់ឱ្យតែយើងមានឆន្ទៈពិតប្រាកដ។ លោកយល់ថាយើងត្រូវចាប់យកឱកាសនេះឱ្យបាន។ អ៊ីស្រាអែលក៏ត្រូវគិតទៅដល់ចំណុចនេះផងដែរទាន់ឱកាសហុចឱ្យ។ បើពួកគេ (អ៊ីស្រាអែល) មិនព្រមទទួលយកសំណើនេះនៅក្នុងពេលនេះទេ បណ្ដោយយូរៗទៅអ្វីៗនឹងហួសពេលសម្រាប់ពួកគេ។ សម្រាប់យើងអត់បញ្ហាទេ៕

ប្រភព៖ Reuters
https://www.reuters.com/world/middle-east/un-calls-irreversible-move-toward-two-state-solution-israel-crisis-2023-11-29/#:~:text=GENEVA%2C%20Nov%2029%20(Reuters),the%20capital%20of%20both%20states