ADផ្ទាំងផ្សព្វផ្សាយពាណិជ្ជកម្ម

Picture

សង្វេគ​ណាស់​! ស្ត្រី​កម្សត់​ម្នាក់​កើត​មហារីក​ដោះ ជីវភាព​ក្រីក្រ និង​មានកូន​២​នាក់​ក្នុង​បន្ទុក (​វី​ដេ​អូ​)

3 ខែ មុន
  • កំពង់ចាម

​ស្ត្រី​ម្នាក់​មានឈ្មោះ ណ​យ សាយ អាយុ​៥៤​ឆ្នាំ ត្រូវជា​អ៊ំ​ស្រី​បង្កើត​របស់​ក្មេង​ប្រុស​ទាំង​២​នាក់​ខាងលើ បាន​រៀបរាប់​ទាំង​អួល​ដើម​.​កថា «​រាល់​ថ្ងៃនេះ គាត់​តែងតែ​ទៅ​ស៊ីឈ្នួល​ចាប់​នំ​បញ្ចុក​ឲ្យ​គេ​នៅ​ក្នុងភូមិ ដោយ​មួយ​ព្រឹក​ទទួល​បាន​ថវិកា​ចាប់ពី

ខេត្តកំពង់ចាម ៖ ដោយ​មើលឃើញ​ពី​ការ​លំបាក​របស់​ស្ត្រី​មេម៉ាយ មាន​ជីវភាព​ក្រីក្រ និង​មានកូន​ប្រុស​២​នាក់​រស់នៅ​ភូមិ​បឹង​ជ្រោយ ឃុំ​សូ​ទិព្វ ស្រុក​ជើងព្រៃ​នោះ ត្រូវ​បាន​បងប្អូន​អាណិកជន​ខ្មែរ​រស់នៅ​សហរដ្ឋអាមេរិក និង​ប្រទេស​អូស្ត្រាលី បាន​ផ្ដល់​កង់​១​គ្រឿង ព្រមទាំង​សម្ភារៈ​ការ​សិក្សា​អម​ដោយ​ថវិកា​មួយ​ចំនួន​ប្រគល់​ជូន​នា​ព្រឹក​ថ្ងៃ​ទី​២៨ ខែវិច្ឆិកា ឆ្នាំ​២០២៣​។ ជាមួយ​នោះ ក្មេង​ប្រុស​ជា​កូន​បង​អាយុ​១២​ឆ្នាំ មាន​ទឹកមុខ​ស្រស់ញញឹម និង​ប្ដេជ្ញា​ចិត្ត​ប្រឹងប្រែង​រៀនសូត្រ​ឱ្យ​ពូកែ​យក​លេខ​មួយ​ឲ្យ​បាន​។

បើ​តាម​ស្ត្រី​ម្នាក់​មានឈ្មោះ ណ​យ សាយ អាយុ​៥៤​ឆ្នាំ ត្រូវជា​អ៊ំ​ស្រី​បង្កើត​របស់​ក្មេង​ប្រុស​ទាំង​២​នាក់​ខាងលើ បាន​រៀបរាប់​ទាំង​អួល​ដើម​.​កថា «​រាល់​ថ្ងៃនេះ គាត់​តែងតែ​ទៅ​ស៊ីឈ្នួល​ចាប់​នំ​បញ្ចុក​ឲ្យ​គេ​នៅ​ក្នុងភូមិ ដោយ​មួយ​ព្រឹក​ទទួល​បាន​ថវិកា​ចាប់ពី​៥០០០​រៀល​ទៅ​៦០០០​រៀល​តែ​ប៉ុណ្ណោះ សម្រាប់​យក​មក​ដោះស្រាយ​ជីវភាព​គ្រួសារ​»​។

ស្ត្រី​រូប​នេះ​បាន​រៀបរាប់​បន្ត​ថា «​ប្អូនស្រី​របស់​គាត់​ឈ្មោះ ណ​យ សាម អាយុ​៤៤​ឆ្នាំ បាន​កើត​ជំងឺមហា​រីក​ដោះ​ខាងឆ្វេង​តាំង​តែ​ពី​អំឡុង​មុន​បុណ្យ​ភ្ជុំបិណ្ឌ​ឆ្នាំ​២០២៣ ដោយ​ដំបៅ​ចេះ​តែ​រីក​ធំ​ឡើង​ធ្វើ​ឲ្យ​ប្អូនស្រី​របស់​គាត់​មានការ​លំបាក ដេក​មិន​បាន បាយ​មិន​ឆ្ងាញ់​…​។ មាន​ពេល​មួយ គាត់​ក៏​បាន​នាំ​ប្អូនស្រី​ទៅ​មន្ទីរពេទ្យ​បង្អែក​ស្រុក ហើយ​ត្រូវ​បាន​គេ​តម្រូវ​ឲ្យ​បង់​ថវិកា​ចំនួន​២០​ម៉ឺន​រៀល សម្រាប់​វះកាត់ ប៉ុន្តែ​ដោយសារ​កត្តា​ជីវភាព​ក្រីក្រ គាត់​មិន​មាន​លុយ​ឱ្យ ក៏​សម្រេចចិត្ត​ត្រឡប់​មក​ផ្ទះ​វិញ​»​។

ស្ត្រី​រូប​នេះ​បាន​រៀបរាប់​បន្ត​ថា «​មក​ទល់​ពេល​នេះ ជំងឺមហារីក​ដោះ​របស់​ប្អូនស្រី​គាត់​កាន់តែ​រីក​ធំ​ឡើង និង​ធំ​ក្លិនស្អុយ ធ្វើ​ឱ្យ​កម្លាំង​របស់​ប្អូន​ចេះ​តែ​ថមថយ​ខ្សោយ​ទៅ​ៗ ដោយ​ស្ថិត​ក្នុង​ជីវភាព​ក្រីក្រ​លំបាក គឺ​មាន​តែ​ដេក​រង់ចាំ​ថ្ងៃ​ស្លា​.​ប់​តែ​ប៉ុណ្ណោះ​»​។

គួរ​បញ្ជាក់​ថា ពេល​ដែល​កំពុង​ជួប​ការ​លំបាក​បែប​នេះ ស្ត្រី​អភ័ព្វ​ខាងលើ ត្រូវ​បាន​សប្បុរសជន​ផ្ដល់​អំណោយ​តាម​រយៈ​លោក ចាន់ ថេ​ត ភ្នាក់ងារ​កោះសន្តិភាព ក្នុង​នោះ​រួម​មាន ៖

១- ថវិកា​ចំនួន​១០០​ដុល្លារ​របស់​អ្នកស្រី សុផល ញាន ព្រមទាំង​ស្វាមី ជា​អាណិកជន​ខ្មែរ​រស់នៅ​សហរដ្ឋ​អាមេរិក ដោយ​យក​ទៅ​មក​ទិញ​សម្ភារៈ​សិក្សា​ក្នុង​នោះ រួម​មាន ៖ ប៊ិ​ច​, សៀវភៅ​, ខ្មៅ​ដៃ​, កង្ហារ ព្រមទាំង​សម្ភារៈ​មួយ​ចំនួន​ទៀត និង​ប្រេងសាំង​សម្រាប់​ចាក់​រថយន្ត​។

២- កង់​មួយ​គ្រឿង ព្រមទាំង​ស្បែកជើង​ច្រើន​គូរ សំពាធ​ដាក់​សៀវភៅ ព្រមទាំង​ខោអាវ​ជា​ច្រើន​កំ​ប្លេ​។

៣- ថវិកា​ចំនួន​១៥​ម៉ឺន​រៀល បាន​មក​ពី​មិត្ត​រួម​ថ្នាក់រៀន​នៅ​វិទ្យាល័យ​ព្រះ​សីហ​នុ ក្រុង​កំពង់ចាម (​ជំនាន់​ឆ្នាំ​១៩៩៣-១៩៩៥) ដោយ​ពួក​គាត់​តែងតែ​នាំ​គ្នា​ធ្វើអំពើ​ល្អ​ក្នុង​សង្គម​។ ជាក់ស្ដែង​កន្លង​ទៅ​ថ្មី​ៗ ក៏​បាន​នាំ​គ្នា​រៃ​អង្គាស​ថវិកា​មួយ​ចំនួន ព្រមទាំង​ផ្ដល់​អាហារ​ឆ្ងាញ់​មួយ​ពេល ជូន​ដល់​ក្មួយ​ៗ​កុមារ​កំព្រា​នៅ​មជ្ឈមណ្ឌល​កុមារ​កំព្រា​ខេត្តកំពង់ចាម​ផង​ដែរ​។

ហើយ​នៅ​ពេល​ដែល​ក្មេង​ប្រុស​ឈ្មោះ រ៉េ​ត សុខ​ឃាង អាយុ​១២​ឆ្នាំ ពេល​ទទួល​បាន​សៀវភៅ ប៊ិ​ច ខ្មៅ​ដៃ ព្រមទាំង​របស់របរ​មួយ​ចំនួន​ទៀត ធ្វើ​ឲ្យ​រូបគេ​មានចិត្ត​សប្បាយ​រីករាយ​យ៉ាង​ខ្លាំង ដោយ​ឆ្នាំ​សិក្សា​២០២២-២០២៣ រូបគេ​រៀន​ថ្នាក់​ទី​៥ នៅ​សាលា​បឋម​សិក្សា​សូ​ទិព្វ ទទួល​បាន​ចំណាត់ថ្នាក់​លេខ​៥ ប្រចាំ​ឆ្នាំ​។ ជាមួយ​គ្នា​នោះ គេ​នឹង​ប្ដេជ្ញា​ប្រឹងប្រែង​រៀនសូត្រ​យក​ចំណាត់ថ្នាក់​លេខ​១ ឲ្យ​បាន​។ មួយវិញទៀត សូ​ម្បី​តែ​រៀន​ភាសា​អង់គ្លេស នៅ​សាលា​ឯកជន ស្រុក​ជើងព្រៃ ក៏​គេ​មិន​យក​ថវិកា​ដែរ ដោយសារ​តែ​ឃើញ​ជីវភាព​ក្រីក្រ​។

គួរ​បញ្ជាក់​ទៀត​ថា ក្មួយ​ប្រុស និង​អ៊ំ​ស្រី​ឈ្មោះ ណ​យ សាយ បាន​លើកដៃ​សំពះ​បួងសួង សូម​ឱ្យ​ទេវតា និង​វត្ថុ​ស័ក្តិសិទ្ធិ​តាម​ជួយ​ថែរក្សា​ម្ចាស់​អំណោយ ដែល​បាន​ផ្ដល់​មក​ឲ្យ​ក្រុម​គ្រួសារ​របស់​គេ ពោល​គឺ​ឲ្យ​ជួប​តែ​សុភមង្គល​ក្នុង​ក្រុម​គ្រួសារ​។

គួរ​រំលឹក​ថា ស្ត្រី​មេម៉ាយ​ឈ្មោះ ណ​យ សាម បាន​រៀបរាប់​ប្រាប់​ទាំង​អូ​ល​ដើម​.​ក​នា​រសៀល​ថ្ងៃ​ទី​២៨ ខែ​វិច្ឆិកា ឆ្នាំ​២០២៣​នេះ​ថា ក្នុង​គ្រា​ដែល​គាត់​នៅ​ក្រមុំ​បាន​រក​ប្រាក់​សន្សំ​ធ្វើ​ផ្ទះ​ឈើ​មួយ​ខ្នង ទុក​គ្រាន់​នៅ​នឹង​គេ គឺ​ធ្វើ​អំពី​ជញ្ជាំង​បាំង​ស័ង្កសី ដំបូល​ក៏​ប្រក់​ស័ង្កសី​។ គាត់​មានកូន​២​នាក់ ក្នុង​នោះ​កូន​បង​ឈ្មោះ រ៉េ​ត សុខ​ឃាង អាយុ​១២​ឆ្នាំ រៀន​ថ្នាក់​ទី​៥ និង​កូនពៅ​ឈ្មោះ រ៉េ​ត គាង អាយុ​៨​ឆ្នាំ រៀន​ថ្នាក់​ទី​៣ ចំពោះ​កូនពៅ​ពេល​ទៅ​រៀន គឺ​បាន​បងស្រី​ឈ្មោះ ណ​យ សាយ អាយុ​៥៤​ឆ្នាំ ឌុ​ប​ទៅ​សាលា​ទាំង​ទៅ​ទាំង​មក ហើយ​ណាមួយ​បងស្រី ក៏​មាន​សុខភាព​មិនសូវ​ល្អ​ផង​ដែរ​។

ស្ត្រី​មេម៉ាយ​រូប​នេះ​បាន​រំលឹក​ថា គាត់​បាន​រៀប​ការ​ជាមួយ​បុរស​ម្នាក់​ឈ្មោះ ដេ​កា ដែល​មាន​អាយុ​ស​ប្បាល​នឹង​គាត់​ដែរ​។ តែ​ជា​មនុស្ស​មិន​ចេះ​រកស៊ី​ទំនុកបម្រុង​ដល់​គ្រួសារ​ទេ គឺ​ពឹងផ្អែក​មក​លើ​ប្រពន្ធ​ជា​អ្នក​ដោះស្រាយ​ទៅ​វិញ​។ ក្រោយមក ក៏​បាន​លែងលះ​គ្នា ហើយ​ខាង​ប្ដី បើ​តាម​ដំណឹង​ឮ​ថា មាន​ប្រពន្ធ​ទៀត ព្រមទាំង​មានកូន​ផង​ដែរ​។ ចំពោះ​ចំណងដៃ​អាពាហ៍ពិពាហ៍​នេះ បាន​បន្សល់​ទុក​កូនប្រុស​ចំនួន​២​នាក់ ហើយ​ចាប់តាំងពី​ថ្ងៃ​លែងលះ​គ្នា​មក​ដល់​សព្វ​ថ្ងៃនេះ ប្ដី​របស់​គាត់​មិន​ដែល​មក​សួរសុខទុក្ខ​កូន និង​ប្រពន្ធ​ម្ដងណា​ឡើយ​។

ស្ត្រី​មេម៉ាយ​រូប​នេះ​បាន​រំលឹក​បន្ត​ថា ជីវិត​ត្រូវ​តែ​តស៊ូ គាត់​បាន​ធ្វើ​ជា​កម្មការិនី​រោងចក្រ​កាត់ដេរ​មួយ​ក្នុងស្រុក​ជើងព្រៃ បាន​ជាង​១​ឆ្នាំ និង​សន្សំ​លុយ​ទិញ​កង់​មួយ​គ្រឿង​ឲ្យ​កូន​បង​សម្រាប់​ជិះ​ទៅ​សាលារៀន​រាល់ថ្ងៃ​។ ប៉ុន្តែ​ដោយសារ​សុខភាព​របស់​គាត់​មិន​អំណោយផល ក៏​បាន​ឈប់​ធ្វើការ​ពី​រោងចក្រ​តែ​ម្ដង​ទៅ ចំណែក​កូន​ប្អូន​វិញ គឺ​មិន​មាន​កង់​ជិះ​ទៅ​រៀន​នឹង​គេ​នោះ​ទេ​។

ស្ត្រី​មេម៉ាយ​រូប​នេះ​បាន​រំលឹក​បន្ត​ទៀត​ថា ស្ថិត​នៅ​ក្នុង​ជីវភាព​ដែល​មានការ​លំបាក ក៏​ត្រូវ​បាន​អាជ្ញាធរ​មូលដ្ឋាន​ជួយ​ឧបត្ថម្ភ​ទំនុកបម្រុង ដោយ​មាន​អង្ករ​ជា​ហូរហែ សម្រាប់​ដាំបាយ​ទទួលទាន​។ ហើយ​មួយ​រយៈ​ចុង​ក្រោយ​នេះ ប្រហែលជា​៤​ទៅ​៥​ខែ មិនដឹង​ជា​យ៉ាងម៉េច​នោះ​ទេ គឺ​ដោះ​ខាងឆ្វេង​ឡើង​ដុំ​រឹង ក្រោយមក​ស្រាប់តែ​ធំ​ឡើង​ៗ ដំបៅ​ហូរ​ឈា​.​ម​ធ្វើ​ឲ្យ​គាត់​សម្រាក​មិន​លក់​។ ហើយ​មាន​ពេល​មួយ គាត់​បាន​ទៅ​មន្ទីរពេទ្យ​បង្អែក​ស្រុក​ជើងព្រៃ ដើម្បី​ពិនិត្យ​មើល​អាកា​រៈ​ជំងឺ តែ​មិន​មាន​អ្នក​កំដរ ដោយសារ​បងស្រី​មាន​សុខភាព​ខ្សោយ​ដែរ មិន​អាច​មើលថែ​ទាំ​បាន​នោះ​ឡើយ​។

ស្ត្រី​មេម៉ាយ​រូប​នេះ​បាន​រំលឹក​បន្ត​ទៀត​ថា នៅ​ពេល​ដែល​ជំងឺមហារីក​ដោះ​យាយី​លើ​រាង​កាយ​រួម​ទាំង​កើត​ជំងឺ​ឈា​.​ម​.​ស​ស៊ី​ឈា​.​ម​ក្រហម​ទៀត ដែល​ធ្វើ​ឲ្យ​សុខភាព​របស់​គាត់​ចេះ​តែ​ដុនដាប​ទៅ​ៗ ដេក​មិន​លក់ និង​ក្តៅ​ក្នុង​ខ្លួន តែ​ចេះ​តែ​ទ្រាំ​ទៅ​។ តាម​ពិត គាត់​ចង់​ព្យាបាល​ជំងឺ​នេះ​ណាស់ តែ​មិន​មាន​អ្នក​កំដរ​ពេល​ដែល​ទៅ​ដេកពេទ្យ​។ ជាមួយ​គ្នា​នោះ​បងស្រី ក៏​សូម​អំពាវនាវ​ដល់​សប្បុរសជន​ជិត​ឆ្ងាយ​មេត្តា​ជួយ​សង្គ្រោះ​ជីវិត​គាត់​ឲ្យ​ផុត​ពី​គ្រោះថ្នាក់​ដល់​អាយុជីវិត​ផង​។

ចំណែក​លោក កែវ ហុ​ក​គ្រី មេឃុំ​សូ​ទិព្វ​វិញ ក៏​មាន​ប្រសាសន៍​ឲ្យ​ដឹង​ដែរ​ថា កន្លង​ទៅ អាជ្ញាធរ​បាន​ជួយ​ឧបត្ថម្ភ​អង្គរ​ដល់​គ្រួសារ​ក្រីក្រ​នេះ​ជា​ហូរហែ ហើយ​ថែម​ទាំង​ផ្ដល់​ប័ណ្ណ​ក្រីក្រ​ជូន​ទៀត​ផង​។ ក្នុង​នាម​អាជ្ញាធរ​ឃុំ សូម​ថ្លែងអំណរគុណ​ដល់​សប្បុរសជន​ទាំង​ក្នុង និង​ក្រៅប្រទេស​ឲ្យ​ជួប​តែ​សេចក្តីសុខ​សាន្ត​គ្រប់ពេលវេលា​។

បើ​តាម​លោក​វេជ្ជបណ្ឌិត គី​ម សួរ​ភិ​រុណ ប្រធាន​មន្ទីរ​សុខាភិបាល​ខេត្ត​វិញ មាន​ប្រសាសន៍​ឲ្យ​ដឹង​ដែរ​ថា រូប​លោក​កំពុង​តែ​ធ្វើការ​ទំនាក់ទំនង​ជាមួយ​ប្រធាន​មន្ទីរពេទ្យ​បង្អែក​ស្រុក​ជើងព្រៃ ដើម្បី​បង្ក​លក្ខណៈ​ងាយស្រួល​ឱ្យ​ស្ត្រី​មាន​ជំងឺមហារីក​ដោះ​នេះ បាន​ចូល​មក​វះកាត់​ដោយ​ឥត​គិតថ្លៃ ដោយសារ​តែ​កត្តា​ជីវភាព​ក្រីក្រ​របស់​គាត់​។

គួរ​បញ្ជាក់​ទៀត​ថា ឥឡូវនេះ ប្រធាន​មន្ទីរ​សុខាភិបាល​ខេត្ត បាន​នាំ​ស្ត្រី​កើត​ជំងឺមហារីក​ដោះ​រូប​នេះ មក​ធ្វើការ​វះកាត់​នៅ​មន្ទីរពេទ្យ​ខេត្តកំពង់ចាម​ដោយ​ឥត​គិតថ្លៃ​ហើយ​។ បើ​គិត​ត្រឹម​ព្រឹក​ថ្ងៃ​ទី​២៩ ខែវិច្ឆិកា ឆ្នាំ​២០២៣​នេះ​។

អត្ថបទសរសេរ ដោយ

កែសម្រួលដោយ