រាជធានីភ្នំពេញ ៖ ដើម្បីទាញយកផលប្រយោជន៍ពីការប្រើប្រាស់ប្រព័ន្ធបច្ចេកវិទ្យាព័ត៌មានឱ្យមានប្រយោជន៍ដល់យុវជនខ្មែរ និងអ្នកប្រើប្រាស់ប្រព័ន្ធបច្ចេកវិទ្យាព័ត៌មាន ជាពិសេសគឺបណ្តាញសង្គម «ហ្វេសប៊ុក» កម្មវិធីសប្បុរសធម៌មួយនឹងត្រូវរៀបចំឡើងនៅឯផ្សារទំនើបស៊ីធីម៉លក្នុងរាជធានីភ្នំពេញនាទិវាកុមារអន្តរជាតិថ្ងៃទី១ មិថុនាខាងមុខនេះ ក្នុងគោលបំណង ចែករំលែកចំណេះដឹងក៏ដូចជាផលប្រយោជន៍ដល់អ្នកចូលរួម និងដើម្បីប្រមូលវិភាគទានជួយដល់កុមារខ្វះខាត ។
លោក ស៊ីវ សុខឿន ស្ថាបនិកនៃក្រុមហ៊ុន SSK និងជាអ្នកផ្តួចផ្តើមគំនិតរៀបចំកម្មវិធីបាន ឱ្យដឹងពីគោលបំណងនៃការបង្កើតកម្មវិធីនេះឡើងថា «ដោយសារតែខ្ញុំបានមើលឃើញពីផលប្រយោជន៍យ៉ាងច្រើននៃប្រព័ន្ធបច្ចេកវិទ្យាព័ត៌មាន ដែលយុវជនខ្មែរភាគច្រើនមិនទាន់ទទួលបាននិងអាចប្រើប្រាស់ប្រព័ន្ធបច្ចេកវិទ្យាទាំងនោះមិនចំគោលដៅធ្វើឱ្យខាតបង់ប្រាក់កាសនិងពេលវេលាឥតប្រយោជន៍ ។ ដូច្នេះការបង្កើតកម្មវិធីនេះឡើងអាចនឹងចែកចាយផលប្រយោជន៍ដល់មិត្តភាពនិងការផ្សារភ្ជាប់មិត្តភាពទៅនឹងផលប្រយោជន៍នៃប្រព័ន្ធបច្ចេកវិទ្យាព័ត៌មាន ព្រមទាំងផលប្រយោជន៍ច្រើនទៀត»។
លោកបន្តថា៖«មិនតែប៉ុណ្ណោះ កម្មវិធីលើកនេះក៏នឹងត្រូវធ្វើឡើងដើម្បីឱ្យកុមារមានឱកាសកម្សាន្តសប្បាយជាមួយយើងនៅថ្ងៃទី១ ខែ មិថុនា ដោយអញ្ជើញមិត្តភក្តិហ្វេសប៊ុកដើម្បីឱ្យពួកគាត់មើលឃើញថា ពួកគាត់អាចជួយអ្វីខ្លះ ដល់កុមារកំព្រា និងសង្គម»។
តាមរយៈលោក ស៊ីវ សុខឿន ថ្វីដ្បិតតែនេះជាកម្មវិធីលើកទី៤ ហើយសម្រាប់ការជួបជុំមិត្តភក្តិហ្វេសប៊ុក ប៉ុន្តែវាជាកម្មវិធីសប្បុរសធម៌លើកទី១ដែលពួកគេអាចចូលរួមជួយដល់សង្គម ដែលកម្មវិធីលើកទី១ គឺ-(First Facebook Dinner Meeting) ដែលចាប់ផ្តើមរៀបចំនៅថ្ងៃ ទី១១ ខែវិច្ឆិកា ឆ្នាំ២០១០ ទី២-គឺ (Facebook Christmas Party) លើកទី៣-(Facebook Countdown New Year) ។
លោកស៊ីវ សុខឿន បានឱ្យដឹងទៀតថា កម្មវិធីលើកទី៤ដែលត្រូវបានដាក់ឈ្មោះថា Facebook Charity Event នឹងត្រូវបានរៀបចំ ឱ្យមានការស្វាគមន៍ស្គាល់គ្នារវាងមិត្តភក្តិហ្វេស ប៊ុក ការចែកចាយផលប្រយោជន៍តាមរយៈមិត្តភាព ការលើកទឹកចិត្តនៃការផ្សារភ្ជាប់មិត្តភាពទៅនឹងប្រយោជន៍និងភាពរីកចម្រើននៃប្រព័ន្ធបច្ចេកវិទ្យា ការប្រគំតន្រ្តីព្រមទាំងការចាប់រង្វាន់ និងលេងល្បែងកម្សាន្តសប្បាយៗទៀតផង។
អ្នករៀបចំកម្មវិធីរូបនេះបានបន្ថែមថា៖«ដោយអ្នកចូលរួមត្រូវចំណាយថវិកាម្នាក់៣ដុល្លារ ដើម្បីចូលរួមកម្មវិធីទាំងនេះរួមទាំងការផ្តល់អាហារ និងភេសជ្ជៈផងដែរ។ យើងក៏នឹងមានប្រអប់បរិច្ចាគមួយសម្រាប់ការបរិច្ចាគរបស់សប្បុរសជនទៅតាមសទ្ធា ហើយថវិកាទាំងអស់ដែលបានមកពីការបរិច្ចាគនេះនឹងត្រូវបង្វែរជូនដល់មណ្ឌលកុមារUNICAS»។
លោក ប៊ុន សុខសិលា អ្នកដឹកនាំនៃមណ្ឌល កុមារ UNICAS ដែលមានទីតាំងស្ថិតក្នុងភូមិលិចវត្ត សង្កាត់កំបូល ខណ្ឌដង្កោ រាជធានីភ្នំពេញ បានបង្ហាញចំណាប់អារម្មណ៍ផ្ទាល់ខ្លួនរបស់លោកថា៖«តាមពិត មិត្តភក្តិហ្វេសប៊ុកយើងតែងតែបានជួបគ្នាក្នុងពិធីបុណ្យទានផ្សេងៗហើយយើងបានគិតគ្នាថា បើសិនជាយកឱកាសនេះចូលរួមជួយកុមារកំព្រាហ្នឹងទៅតាមការស្ម័គ្រចិត្តជាការល្អហើយយើងក៏ចង់ឱ្យខ្មែរយើងចេះជួយរួមចំណែកក្នុងបញ្ហាសង្គមកុមារកំព្រា ស្ត្រីមេម៉ាយជាដើម»។
តាមរយៈអ្នកដឹកនាំអង្គការរូបនេះ សព្វថ្ងៃមណ្ឌលកុមារ UNICAS មានកុមារកំព្រា កុមារ រងគ្រោះនិងត្រូវគេបោះបង់ចោលកំពុងស្នាក់អាស្រ័យចំនួន៩២នាក់ ដែលកុមារទាំងនេះ មានអាយុចាប់ពី៣ឆ្នាំរហូតដល់១៨ឆ្នាំ ដែលត្រូវបានផ្តល់នូវតម្រូវការជាមូលដ្ឋានផងដែរដូចជា ការផ្តល់ជម្រកស្នាក់ នៅម្ហូបអាហារ សម្លៀក បំពាក់ ការថែទាំសុខភាព ព្រមទាំងឱកាសអប់រំ ដូចជាកុមារទូទៅនៅក្នុងសហគមន៍ ។
លោកប៊ុន សុខសិលា បានបន្ថែមទៀតថា៖«ជារៀងរាល់ឆ្នាំ យើងតែងតែជ្រើសរើសយកថ្ងៃ ហ្នឹង (ទិវាកុមារអន្តរជាតិ)ដើម្បីឱ្យកុមារសប្បាយ ជាធម្មតាយើងតែងតែនាំកុមារទៅកម្សាន្តនៅកន្លែងកម្សាន្តផ្សេងៗទៅតាមលទ្ធភាព ដោយយើងមានមធ្យោបាយ និងម្ហូបអាហារវេច ខ្ចប់ខ្លះៗដែលបានមកពីដំណាំកសិកម្ម និងការ ចិញ្ចឹមសត្វដូចជាមាន់ទាផ្សេងៗនៅក្នុងមណ្ឌល ដោយកុមារខ្លួនឯងដាក់វេនគ្នាក្នុងការថែទាំដើម្បី កាត់បន្ថយការចំណាយផ្សេងៗនៅក្នុងមណ្ឌល»។
កម្មវិធីសប្បុរសធម៌សម្រាប់អ្នកប្រើប្រាស់ហ្វេសប៊ុក នឹងត្រូវរៀបចំឡើងនៅផ្សារទំនើបស៊ីធីម៉លជាន់ទី២ចាប់ពីម៉ោង៥ល្ងាចដល់ម៉ោង៨យប់ ដែលនឹងមានការចូលរួមពីបណ្តាមិត្តភក្តិគ្រប់ស្រទាប់នៃបណ្តាញសង្គម «ហ្វេសប៊ុក» ដែលអាចផ្តល់ផលប្រយោជន៍យ៉ាងច្រើនចេញពីការចូលរួមសំណេះសំណាលនិងផ្តល់យោបល់ឱ្យគ្នាទៅវិញទៅមកពាក់ព័ន្ធទៅនឹងការរីកចម្រើននៅក្នុងវិស័យការងារ ការអប់រំព្រមទាំងសកម្មភាពប្រចាំថ្ងៃរបស់ខ្លួន ៕
ចែករំលែកព័តមាននេះ