តូបលក់ដូរជាង២០០តូប នៅក្នុងផ្សារបុរីសន្តិភាព២ រួមជាមួយទំនិញ សម្ភារៈទាំងអស់នៅក្នុងតូចទាំងនោះ ត្រូវអណ្ដាតភ្លើងឆាបឆេះខ្ទេចអស់ទាំងស្រុងនៅក្នុងថ្ងៃបុណ្យអុំទូកទី៣ ខណៈពេលដែលម្ចាស់កំពុងតែ
រាជធានីភ្នំពេញ ៖ តូបលក់ដូរជាង២០០តូប នៅក្នុងផ្សារបុរីសន្តិភាព២ រួមជាមួយទំនិញ សម្ភារៈទាំងអស់នៅក្នុងតូចទាំងនោះ ត្រូវអណ្ដាតភ្លើងឆាបឆេះខ្ទេចអស់ទាំងស្រុងនៅក្នុងថ្ងៃបុណ្យអុំទូកទី៣ ខណៈពេលដែលម្ចាស់កំពុងតែដេកលង់លក់តាមផ្ទះរៀងៗខ្លួន ហើយការឆាបឆេះនោះ ត្រូវបានសមត្ថកិច្ចរកឃើញថា បណ្ដាលមកពីឆ្លងចរន្តអគ្គិសនី។
ហេតុការណ៍ខាងលើនោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង១និង១០នាទីយប់រំលងអធ្រាត្រ ឈានចូលថ្ងៃទី២៨ ខែវិច្ឆិកា ឆ្នាំ២០២៣ នៅក្នុងផ្សារបុរីសន្តិភាព២ ស្ថិតក្នុងភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មាន បានប្រាប់ឲ្យដឹងថា អណ្ដាតភ្លើងបានចាប់ផ្ដើមឆាបឆេះដំបូងចេញពីតូបនៅកណ្ដាលផ្សារតែម្ដង រួចទើបឆេះរាលដាលទៅដល់តូបខាងៗជាបន្តបន្ទាប់យ៉ាងសន្ធោសន្ធៅ។ ម្យ៉ាងទៀត នៅពេលកំពុងតែឆេះតិចៗនោះ គឺពុំមាននរណាបានដឹងភ្លាមៗនោះទេ ព្រោះខណៈពេលនោះពុំមានអ្នកលក់ដូរឡើយ ហើយតូបទាំងអស់ ត្រូវបានបិទទ្វារ ដោយម្ចាស់តូបនីមួយៗបាននាំគ្នាទៅដេកនៅផ្ទះរៀងៗខ្លួនអស់ទៅហើយ។
ប្រភពដដែលបន្តថា លុះរហូតដល់ភ្លើងឆេះកាន់តែខ្លាំងឡើង ទើបដឹង ហើយនាំគ្នាមកពន្លត់ ប៉ុន្តែពុំអាចពន្លត់ទាន់នោះទេ។ ក្រោយមក កម្លាំងអាជ្ញាធរមូលដ្ឋានបានចេញអន្តរាគមន៍ ហៅរថយន្តពន្លត់អគ្គិភ័យជាច្រើនគ្រឿងមកពីបណ្ដាអង្គភាព និងក្រុមហ៊ុននានា ទៅជួយពន្លត់ភ្លើងនោះ។
ប្រភពដដែលបានឲ្យដឹងបន្តទៀតថា ក្រុមពន្លត់អគ្គិភ័យបានធ្វើការពន្លត់ភ្លើងតាំងពីពេលឆេះ រហូតដល់វេលាម៉ោងជាង៨ព្រឹកថ្ងៃដដែល ទើបអណ្ដាតភ្លើងរលត់ទៅវិញទាំងស្រុង ដោយប្រើប្រាស់ទឹកអស់ជាច្រើនរថយន្ត ហើយចំពោះមូលហេតុនៃការឆាបឆេះនោះ គឺបណ្ដាលមកពីឆ្លងចរន្តអគ្គិសនី។
គួរបញ្ជាក់ផងដែរថា នៅក្នុងគ្រោះមហន្តរាយបង្កឡើងដោយអគ្គិភ័យខាងលើនោះ បានបំផ្លាញតូបលក់ដូររបស់អាជីវករអស់ចំនួន២២០តូប រួមទាំងអីវ៉ាន់ និងសម្ភារៈនៅក្នុងតូបទាំងអស់ផងដែរ។ ប៉ុន្តែពុំមានមនុស្សណាម្នាក់ស្លា.ប់ ឬរងរបួសឡើយ ដោយសារតែពេលភ្លើងឆេះនោះ ពុំមានការលក់ដូរ ឬមានមនុស្សស្ថិតនៅទីនោះឡើយ គឺតូបត្រូវបានបិទទ្វារអស់ទៅហើយ៕
ចែករំលែកព័តមាននេះ