រាជធានីភ្នំពេញ ៖ ព័ត៌មានផ្អើលឆោឡោថាមានបុរសកើតកូននៅមន្ទីរពេទ្យមិត្ដភាពខ្មែរ-សូវៀតនិងបានទទួលការវះកាត់នោះ រហូតមកដល់វេលាម៉ោង១២ថ្ងៃត្រង់ ថ្ងៃទី២១ ឧសភា បុរសនោះបានវិលត្រឡប់ទៅលំនៅដ្ឋានវិញហើយ ដោយសារក្រោយពេលវះកាត់មានសភាពធ្ងន់ធ្ងរពេក និងគ្មានសង្ឃឹម ទើបក្រុមគ្រួសារបានសុំយកទៅផ្ទះដោយនិយាយថា
រាជធានីភ្នំពេញ ៖ ព័ត៌មានផ្អើលឆោឡោថាមានបុរសកើតកូននៅមន្ទីរពេទ្យមិត្ដភាពខ្មែរ-សូវៀត «ផ្អើលបុរសកើតកូន មនុស្សម្នាទាំងប្រុស ទាំងស្រីនាំគ្នាទៅចោមរោមមើលនៅមន្ទីរពេទ្យរុស្ស៊ី» និងបានទទួលការវះកាត់នោះ រហូតមកដល់វេលាម៉ោង១២ថ្ងៃត្រង់ ថ្ងៃទី២១ ឧសភា បុរសនោះបានវិលត្រឡប់ទៅលំនៅដ្ឋានវិញហើយ ដោយសារក្រោយពេលវះកាត់មានសភាពធ្ងន់ធ្ងរពេក និងគ្មានសង្ឃឹម ទើបក្រុមគ្រួសារបានសុំយកទៅផ្ទះដោយនិយាយថា បើស្លាប់ក៏អាចធ្វើបុណ្យទាន់ពេលដែរ ។
បុរសកើតដុំពោះដែលបង្កឱ្យផ្អើលថា មានកូននេះឈ្មោះយ៉េន ចាន់នី អាយុ៣៩ឆ្នាំ ជាជាង ក្រឡឹង មានទីលំនៅក្នុងភូមិជយោ ឃុំជយោ ស្រុកចំការលើ ខេត្ដកំពង់ចាម ។ គេមានដុំពោះតាំងពីកំណើតមកម៉្លេះ ប៉ុន្ដែមិនមានការរំខានអ្វីក៏ចេះតែមិនចាប់អារម្មណ៍ពីការមានដុំពោះនោះទេ រហូតធំពេញវ័យរៀបការជាមួយនាងឈ្មោះ សុខ ឌី អាយុ២៧ឆ្នាំ និងមានកូនប្រុសឈ្មោះយ៉េន វិចិត្រ អាយុ៤ឆ្នាំ ។ ទាល់តែដុំពោះនោះធ្វើទុក្ខហូបអ្វីក៏មិនកើតទើបគ្រួសារនាំមកមន្ទីរពេទ្យ។
តាមប្រសាសន៍របស់លោកវេជ្ជបណ្ឌិតនៅមន្ទីរពេទ្យមិត្ដភាពខ្មែរ-សូវៀត សូមមិនបញ្ចេញឈ្មោះបានបញ្ជាក់បន្ថែមថា ដុំពោះ៣៩ឆ្នាំ ស្មើអាយុរបស់របុសនោះដែរ ។ ដុំពោះនោះមិនមែនជាគីសទេ វាជាកោសិការបស់មនុស្សពិតប្រាកដ ដោយផ្អែកតាមបច្ចេកវិទ្យាដែលបានពិសោធន៍។ បុរសនេះពេលដែលចាប់កំណើតក្នុងផ្ទៃរបស់ម្ដាយ គឺម្ដាយមានកូនភ្លោះដោយមានរូបគាត់និងកូនម្នាក់ទៀត ប៉ុន្ដែនៅពេលកកំណើតធំធាត់ជាសរីរាង្គមនុស្សបន្ដិចៗម្ដង ស្រោមទារករបស់គាត់បានស្រោបពីលើស្រោបទារកមួយទៀតនៅក្នុងពោះរបស់គាត់ ហើយមិនបានញែកដាច់ចេញពីគ្នាទេ ។ ហេតុដូច្នេះហើយទើបមានសរីរាង្គជាមនុស្សដូចជាកំភួនដៃ ម្រាម៤ដុះក្រចក មានសក់ តែអត់លលាដ៍ក្បាល និងកំទេចឆ្អឹងដូចធ្មេញ ។ ជាធម្មតានៅទូទាំងពិភពលោកមានកូនភ្លោះចម្លែកជាច្រើនដូចជា កូនភ្លោះជាប់ក្បាល កូនភ្លោះខ្លួនជាប់គ្នាឬហៅថាស្យាមនោះ។
លោកវេជ្ជបណ្ឌិតរៀបរាប់បន្ថែមថា ដោយឡែកបុរសនេះ ដែលកើតពីក្នុងផ្ទៃរបស់ម្ដាយមកគឺជាប់ទារកភ្លោះមួយទៀតក្នុងពោះតែម្ដង ហេតុនេះហើយទើបចេះតែមានពោះធំទៅៗពីមួយថ្ងៃទៅមួយថ្ងៃ ។ ទារកនោះរស់បានដោយសារធាតុចិញ្ចឹមរបស់បុរសនោះតាំងពីក្នុងផ្ទៃម្ដាយរហូតមកដល់អាយុ៣៩ឆ្នាំនេះ ទើបទារកនោះមិនមានលក្ខណៈគ្រប់គ្រាន់ ។
លោកវេជ្ជបណ្ឌិតបានឱ្យដឹងទៀតថា បន្ទាប់ពីធ្វើការវះកាត់យកកូនចេញកាលពីវេលាម៉ោង១០ព្រឹកថ្ងៃ២០ ឧសភា កន្លងមកពិតជាគ្មានសង្ឃឹមថារស់ទេ ដោយសារស្ថានភាពជំងឺធ្ងន់ធ្ងរឈាមហូរច្រើនធ្វើឱ្យសុខភាពកាន់តែដុនដាបទៅ ។ សភាពការណ៍បែបនេះតម្រូវឱ្យគ្រូពេទ្យធ្វើការវះកាត់ ត្រួតពិនិត្យការហូរឈាមនោះឡើងវិញនៅរយៈពេល ក្រោយ១២ម៉ោង។ ប៉ុន្ដែខាងក្រុមគ្រួសារអ្នកជំងឺបានទទូចសុំយកទៅផ្ទះវិញ ព្រោះតែការវះកាត់លើកទី២ ត្រូវគ្រូពេទ្យប្រាប់ថា មានសង្ឃឹមត្រឹម២០ភាគរយប៉ុណ្ណោះ ។
ដូច្នេះទើបគ្រួសារសម្រេចយកអ្នកជំងឺត្រឡប់ទៅផ្ទះវិញ មិនព្រមទុកឱ្យគ្រូពេទ្យវះកាត់បន្តទៀតឡើយ ព្រោះគិតថា បើគង់តែស្លាប់ដដែល យកទៅស្រុកបានធ្វើបុណ្យប្រសើរជាងស្លាប់នៅមន្ទីរពេទ្យ ៕
ចែករំលែកព័តមាននេះ