រាជធានីភ្នំពេញ ៖ រឿងមិនគួរឱ្យជឿមួយដែលសូម្បីតែនិយាយប្រាប់នរណាក៏គេមិនជឿដែរ នោះគឺរឿងរ៉ាវដែលកើតមាននៅក្នុងមន្ទីរពេទ្យមិត្តភាពខ្មែរ-សូវៀត ហៅពេទ្យរុស្ស៊ីដោយផ្អើលថា មានមនុស្សប្រុសកើតកូន គឺវេជ្ជបណ្ឌិតប្រចាំមន្ទីរពេទ្យបានវះកាត់យកកូនចេញ។ ហេតុការណ៍នេះបង្កឱ្យមានការផ្អើលឆោឡោដល់មនុស្សម្នារាប់រយនាក់នាំ
រាជធានីភ្នំពេញ ៖ រឿងមិនគួរឱ្យជឿមួយដែលសូម្បីតែនិយាយប្រាប់នរណាក៏គេមិនជឿដែរ នោះគឺរឿងរ៉ាវដែលកើតមាននៅក្នុងមន្ទីរពេទ្យមិត្តភាពខ្មែរ-សូវៀត ហៅពេទ្យរុស្ស៊ីដោយផ្អើលថា មានមនុស្សប្រុសកើតកូន គឺវេជ្ជបណ្ឌិតប្រចាំមន្ទីរពេទ្យបានវះកាត់យកកូនចេញ។ ហេតុការណ៍នេះបង្កឱ្យមានការផ្អើលឆោឡោដល់មនុស្សម្នារាប់រយនាក់នាំគ្នាទៅចោមរោមមើលនៅមន្ទីរពេទ្យកាលពីវេលាម៉ោង១១ព្រឹក ថ្ងៃទី២០ ឧសភា។ បុរសដែលល្បីថា មានកូន និងចូលក្នុងបន្ទប់វះកាត់នោះឈ្មោះយ៉េន ចាន់នី អាយុ៣៩ឆ្នាំ ជាជាងក្រឡឹង មានទីលំនៅក្នុងភូមិជយោស្រុកចំការលើ ខេត្តកំពង់ចាម។
បុរសជាប្អូនឈ្មោះយ៉េន តុងនី អាយុ៣៣ឆ្នាំ រៀបរាប់ឱ្យដឹងថាបងប្រុសរបស់គេឈ្មោះយ៉េន ចាន់នី មានដុំពោះតាំងពីកំណើតមកម្ល៉េះ ប៉ុន្តែមិនមានការរំខានអ្វីក៏ចេះតែរស់នៅជាធម្មតា។ បងប្រុសរបស់គេបានរៀបការ និងមានប្រពន្ធឈ្មោះសុខ ឌី អាយុ២៧ឆ្នាំ និងមានកូនប្រុសម្នាក់ឈ្មោះយ៉េន វិចិត្រ អាយុ៤ឆ្នាំ។
ស្ត្រីជាម្តាយមីងឱ្យដឹងថា រយៈពេលប្រមាណ១០ឆ្នាំមកនេះ យ៉េន ចាន់នី តែងតែនិយាយថា «ចុកឆ្ងល់ក្នុងពោះ» ប៉ុន្តែមិនធ្ងន់ធ្ងរក៏ចេះតែធ្វើការងារធម្មតា ដោយទៅធ្វើជាងក្រឡឹងនៅផ្សារក្រឡាញ់ ខេត្តសៀមរាប។ នៅខែតុលា ឆ្នាំ២០១០ ដុំពោះបានធ្វើឱ្យចុកចាប់ខ្លាំងក៏ទៅពិនិត្យនៅមន្ទីរពេទ្យនៅខេត្តសៀមរាប ហើយគ្រូពេទ្យប្រាប់ថា ជាប់សរសៃឆ្អឹងខ្នង។ បន្ទាប់មកទៅមើលគ្រូខ្មែរទៀតក៏នៅតែមិនបានធូរស្រាលដដែល។ ពេលក្មួយគាត់ទៅពិនិត្យនៅមន្ទីរពេទ្យបង្អែកខេត្តកំពង់ចាមជួបជាមួយគ្រូពេទ្យជាជនជាតិបារាំងពីររូប។ បន្ទាប់ពីទៅថតអេកូហើយគ្រូពេទ្យបារាំង២នាក់នោះប្រាប់ថា «ទៅផ្ទះវិញដើម្បីរៀបចំសំរាលកូន»។ ការអះអាងរបស់ម្តាយមីងបែបនេះមិនដឹងថា គ្រូពេទ្យបារាំងនិយាយក្នុងន័យបែបណាទេ។
ស្ត្រីដដែលបន្តថា ដោយសារមិនអស់ចិត្តនិងមិនគួរឱ្យជឿទៀតនោះ ទើបនៅថ្ងៃទី១០ ឧសភា ក្មួយប្រុសគាត់បានទៅព្យាបាលនៅមន្ទីរពេទ្យរុស្ស៊ី។ រហូតដល់វេលាម៉ោង១០ព្រឹក ថ្ងៃទី២០ ឧសភា គ្រូពេទ្យបានវះកាត់ស្រាប់តែឃើញមានកូនក្នុងពោះរបស់ក្មួយគាត់មែន តែមិនមែនជាកូនពេញលក្ខណៈទេ គ្រាន់តែជាបំណែកខ្លះប៉ុណ្ណោះ និងជាដុំគីសដ៏ធំមួយ។
លោកវេជ្ជបណ្ឌិតដែលបានវះកាត់មានប្រសាសន៍ថា កន្លងមកការវះដុំពោះធ្លាប់ជួបប្រទះដែរ តែភាគច្រើនដុំពោះជាគីសតូចៗមិនធំដូចបុរសនេះទេ ។ ដុំប្រភេទនេះហៅថា «គីសខាំម៉ូអ៊ីត» មិនមានរូបរាងជាកូនមនុស្សពិតប្រាកដទេ គ្រាន់តែមានបំណែកខ្លះ ពេលវះកាត់ឃើញមានកំភួនដៃ ម្រាម៤ដុះក្រចក មានសក់ តែអត់លលាដ៍ក្បាល និងកំទេចឆឹ្អងដូចធ្មេញ។
ដុំសាច់នោះបន្ទាប់ពីវះកាត់រួចគ្រូពេទ្យបានយកចេញមកក្រៅដាក់នៅក្នុងកែវជ័រ ដើម្បីឱ្យអ្នកដែលទៅចោមរោមមើលឃើញផ្ទាល់ភ្នែក ព្រោះមិនចង់ឱ្យមានពាក្យចចាមអារ៉ាមផ្សេងទៀតឬចង់បញ្ជាក់ថា គ្មានមនុស្សប្រុសណាមានកូនឡើយ។ ពេលនេះបុរសឈ្មោះយ៉េន ចាន់នីកំពុងព្យាបាលនៅក្នុងបន្ទប់វះកាត់នៅឡើយ ៕
ចែករំលែកព័តមាននេះ