- ភ្នំពេញ
ឥឡូវនេះ យើងសង្កេតឃើញថា យុវជន និងយុវតីកម្ពុជាជាច្រើន ជាពិសេសនិស្សិតមកពីខេត្ត បានប្រឹងរៀនផង និងធ្វើការផង នៅពេលដំណាលគ្នា។ ការរៀនផង និងធ្វើការផង មានឥទ្ធិពលទាំងវិជ្ជមាន និងអវិជ្ជមានចំពោះនិស្សិត។ ដូច្នេះ
ឥឡូវនេះ យើងសង្កេតឃើញថា យុវជន និងយុវតីកម្ពុជាជាច្រើន ជាពិសេសនិស្សិតមកពីខេត្ត បានប្រឹងរៀនផង និងធ្វើការផង នៅពេលដំណាលគ្នា។ ការរៀនផង និងធ្វើការផង មានឥទ្ធិពលទាំងវិជ្ជមាន និងអវិជ្ជមានចំពោះនិស្សិត។ ដូច្នេះ អ្នកត្រូវគិតពិចារណាដោយថ្លឹងថ្លែងពី គុណសម្បត្តិ និងគុណវិបត្តិរបស់វា។
ខាងក្រោមនេះ គឺជាគុណសម្បត្តិ និងគុណវិបត្តិ នៃការសិក្សាផង និងធ្វើការផង ក្នុងពេលតែមួយ ៖
ក.គុណសម្បត្តិ នៃការធ្វើការងារផង និងសិក្សាផង
១- រកប្រាក់ចំណូលចាយអោយខ្លួនឯង ៖
ការរកប្រាក់ចំណូល គឺជាអត្ថប្រយោជន៍ទី១ នៃការធ្វើការក្រៅម៉ោងរបស់និស្សិត ដែលធ្វើអោយអ្នកមានឯករាជ្យភាពផ្នែកហរិញ្ញវត្ថុ ។ លុយ គឺជាហេតុផលដំបូងដែលមនុស្សត្រូវការ។ តែដើម្បីទទួលបានវា អ្នកក៏ត្រូវធ្វើការងារអោយគេផងដែរ ។ ភាគច្រើនស្ថានភាពហិរញ្ញវត្ថុរបស់និស្សិតមកពីខេត្ត ពិតជាលំបាកណាស់ ដោយពួកគេមានលុយតិចតួច ឬគ្មាននៅអំឡុងពេលសិក្សា ។
២- អនុវត្តការគ្រប់គ្រងពេលវេលា ៖
និស្សិតដែលធ្វើការមានទំនុកចិត្ត និងមានជំនាញគ្រប់គ្រងពេលវេលាបានល្អជាងសិស្ស ដែលមិនមានការងារធ្វើ។ ពួកគេរៀន និងធ្វើការក្នុងពេលតែមួយ ហើយដំណើរការនេះ ធ្វើអោយពួកគេត្រូវបែងចែកពេលវេលាទៅតាមផែនការពេលវេលារបស់ពួកគេ ហើយអាចផ្តល់ឱ្យពួកគេនូវអត្ថប្រយោជន៍រយៈពេលវែង។ អ្នកអាចធ្វើកាលវិភាគសំរាប់ធ្វើកិច្ចការងារសាលា និងការងារក្រៅម៉ោង ដោយបែងចែកពេលវេលាច្បាស់លាស់។ នោះអ្នកនឹងអាចសម្រេចបានកិច្ចការងារ២ក្នុងពេលតែមួយ។
៣- បង្កើតបទពិសោធន៍ការងារ ៖
សព្វថ្ងៃនេះ និន្នាការទីផ្សារការងារ ចូលចិត្តមនុស្សដែលមានបទពិសោធន៍ការងារស្រាប់។ ដូច្នេះ កាលណាអ្នករៀនផង អ្នកធ្វើការផង វានឹងផ្តល់អោយអ្នកនូវបទពិសោធន៍ការងារ។ នៅពេលអ្នករៀនចប់មហាវិទ្យាល័យ អ្នកនឹងមានទាំងចំណេះដឹង និងបទពិសោធន៍ការងារ។ ដូច្នេះ អ្នកនឹងមានប្រៀបជាងអ្នកដែលមិនមានបទពិសោធន៍ នៅពេលអ្នកស្វែងរកការងារល្អធ្វើ។
៤- បង្កើតបណ្តាញ ៖
ការទំនាក់ទំនងមានប្រយោជន៍សម្រាប់ការងារ ការរកស៊ី និងជីវិ.តរស់នៅ ។ នៅពេលដែលអ្នកធ្វើការផង រៀនផង អ្នកអាចនឹងបង្កើតបណ្តាញ ឬចងក្រងចង្កោមទំនាក់ទំនងបានល្អប្រសើរ និងច្រើនជាងអ្នកដែលរៀនសុទ្ធ ។
៥- ទទួលបានជំនាញ ៖
ការធ្វើការក្រៅម៉ោង ពិតជានឹងផ្តល់អត្ថប្រយោជន៍ដល់អាជីពរបស់អ្នក ដោយការទទួលបានជំនាញដែលសាកលវិទ្យាល័យមិនបង្រៀនអ្នក។ មកដល់ពេលនេះ សាកលវិទ្យាល័យមិនមែនជាស្ថាប័នអប់រំផ្តល់ចំណេះគ្រប់យ៉ាងបានឡើយ។ ពេលខ្លះសាកលវិទ្យាល័យបានត្រឹមតែផ្តល់ទ្រឹស្តី ប៉ុន្តែការអនុវត្តការងារ គឺជាអ្នកបង្រៀន ។
ខ. គុណវិបត្តិ នៃការធ្វើការងារផងសិក្សាផង
១- ងាយនឹងស្ត្រេស ៖
រៀននៅមហាវិទ្យាល័យ មិនងាយស្រួលនោះទេ។ អ្នកត្រូវទៅរៀនជារៀងរាល់ថ្ងៃ និងធ្វើកិច្ចការសាលា។ ដូច្នេះ នៅពេលអ្នកធ្វើការបន្ថែមទៀត វានឹងធ្វើអោយខ្លួនឯងកាន់តែស្ត្រេស។
២- សក្តានុពលក្នុងការសិក្សាធ្លាក់ចុះ ៖
ជាធម្មតា និស្សិតអាចសប្បាយចិត្តនៅកន្លែងធ្វើការជាងនៅសាលា ដោយសារលុយ។ ប៉ុន្តែពេលអ្នកប្រឹងធ្វើការ អ្នកនឹងមានការសិក្សាធ្លាក់ចុះ ដោយមិនទទួលបានចំណេះទាំងឡាយ ដែលសាលាផ្តល់អោយទេ។
៣- កង្វះពេលវេលា ៖
នេះជាសេចក្តីពិតនៃបញ្ហា។ ប្រសិនបើអ្នកមានទំនួលខុសត្រូវផ្សេងទៀត វាមានន័យថា អ្នកនឹងខ្វះពេលវេលា សម្រាប់ការសិក្សា។
ជាចុងក្រោយ អ្នកត្រូវចេះថ្លឹងថ្លែង គុណសម្បត្តិ និងគុណវិបត្តិនៃការសិក្សាផង និងធ្វើ ការងារផង។
អត្ថបទដោយ ៖ សា រ៉ាន់
ចែករំលែកព័តមាននេះ