លំនៅដ្ឋានចំនួន២ខ្នង ត្រូវអគ្គិភ័យលេបត្របាក់អស់គ្មានសល់ ខណៈមួយខ្នងទៀត រងការខូចខាតអស់ប្រហែល១០% ដែលគេសង្ស័យថា បណ្ដាលមកពីការទុស្សេខ្សែភ្លើង
ខេត្តបាត់ដំបង ៖ លំនៅដ្ឋានចំនួន២ខ្នង ត្រូវអគ្គិភ័យលេបត្របាក់អស់គ្មានសល់ ខណៈមួយខ្នងទៀត រងការខូចខាតអស់ប្រហែល១០% ដែលគេសង្ស័យថា បណ្ដាលមកពីការទុស្សេខ្សែភ្លើង បង្កឱ្យមានការភ្ញាក់ផ្អើលកាលបិវេលាម៉ោង៤និង២០នាទីទៀបភ្លឺ ថ្ងៃទី២៦ ខែវិច្ឆិកា នៅចំណុចភូមិស្លាកែត ស្ថិតក្នុងសង្កាត់ស្លាកែត ក្រុងបាត់ដំបង។
បើតាមសេចក្ដីរាយការណ៍ពីសមត្ថកិច្ច បានប្រាប់ឲ្យដឹងថា អគ្គិភ័យខាងលើនេះ បានកើតឡើងស្របពេលម្ចាស់ផ្ទះមិនទាន់ងើបពីដំណេកនៅឡើយទេ ហើយជនរងគ្រោះខ្លះបានដឹងនៅពេលភ្លើងឆាបឆេះយ៉ាងសន្ធោសន្ធៅទៅហើយ។ ដូច្នេះហើយ ទើបផ្ទះខ្លះត្រូវភ្លើងឆេះអស់គ្មានសល់ ដោយសារតែពន្លត់មិនទាន់ រហូតខូចខាតអស់ផ្ទះចំនួន២ខ្នងទាំងស្រុង រីឯមួយខ្នងទៀតខូចខាតបន្តិចបន្ដួច»។
បើតាមរបាយការណ៍សមត្ថកិច្ច បានឲ្យដឹងថា លំនៅដ្ឋានទាំង៣ខ្នងរងគ្រោះដោយសារអគ្គិភ័យខាងលើនេះ រួមមាន ៖ ១- ផ្ទះធ្វើពីឈើប្រក់ស័ង្កសី ទំហំ៥ម៉ែត្រx៧ម៉ែត្រ ដែលមានម្ចាស់ឈ្មោះ រី ចាន់ធី ភេទស្រី អាយុ៥៥ឆ្នាំ (ឆេះអស់ទាំងស្រុក)។ ២- ផ្ទះធ្វើពីឈើប្រក់ស័ង្កសី ទំហំ៥ម៉ែត្រx៧ម៉ែត្រ មានម្ចាស់ឈ្មោះ សម សុស្ថាបនា ភេទប្រុស អាយុ៤២ឆ្នាំ (ឆេះអស់ទាំងស្រុង) និង៣- ផ្ទះធ្វើពីឈើប្រក់ស័ង្កសី ទំហំ៥ម៉ែត្រគុណ៨ម៉ែត្រ ម្ចាស់ផ្ទះឈ្មោះ ម៉ី ម៉ៃ ភេទស្រី អាយុ៦៥ឆ្នាំ (ខូចខាត១០%)។
តាមរបាយការណ៍សមត្ថកិច្ច បានឲ្យដឹងបន្តថា នៅកន្លែងកើតហេតុ ពុំមានប្រភពណាមួយអះអាងពីចំណុចចាប់ផ្ដើមដែលនាំឲ្យមានអគ្គិភ័យនេះកើតឡើងឡើយ។ ប៉ុន្តែប្រភពក្រៅផ្លូវការបានសង្ស័យថា អគ្គិភ័យនេះ បានឆាបឆេះដំបូងនៅម្ដុំផ្ទះស្ត្រីឈ្មោះ ចាន់ធី ហើយក៏ឆេះរាលដាលយ៉ាងខ្លាំងត្រឹមមួយប៉ប្រិចភ្នែក សូម្បីតែរថយន្តពន្លត់អគ្គិភ័យរបស់សមត្ថកិច្ចមកជួយស្ទើរតែមិនចង់ទាន់ផង។ ចំណែកផ្ទះចំនួន២ខ្នង ក្នុងចំណោម៣ខ្នង ក៏បានក្លាយជាផេះទាំងស្រុង ដោយម្ចាស់ផ្ទះពុំអាចរំដោះទ្រព្យសម្បត្តិអ្វីបានឡើយ។
ប្រភពដដែលបន្តថា នៅក្នុងហេតុការណ៍ខាងលើនោះ គេឃើញស្ត្រីម្នាក់បានទ្រហោយំ ដែលមានអ្នកភូមិរាប់សិបនាក់ចោមរោមគាត់។ ហើយគាត់យំបណ្ដើរ ប្រឹងនិយាយទៅកាន់អ្នកសួរនាំបណ្ដើរថា «ខ្ញុំឈ្មោះ រី ចាន់ធី ជាស្ត្រីមេម៉ាយកូន៣នាក់។ ផ្ទះខ្ញុំ ត្រូវភ្លើងឆេះអស់ទៅហើយ ខ្ញុំរត់រួចត្រឹមមួយចង្កេះជាប់ខ្លួនតែប៉ុណ្ណោះ។ ខ្ញុំមិនបានដឹងថា មានភ្លើងឆេះពីដំបូងទេ តែពេលនោះខ្ញុំធំក្លិនផ្សែង លុះខ្ញុំភ្ញាក់ពីដំណេករកមើល ស្រាប់តែឃើញភ្លើងឆេះផ្ទះខ្ញុំទៅហើយ។ ខ្ញុំសង្ស័យទុស្សេខ្សែភ្លើង»។
គួរបញ្ជាក់ថា កម្លាំងសមត្ថកិច្ចជាច្រើននាក់ មានទាំងរថយន្តពន្លត់អគ្គិភ័យរបស់ស្នងការខេត្ត ចំនួន៤គ្រឿង បានព្យាយាមជួយបា.ញ់ទឹកពន្លត់អគ្គិភ័យដ៏សន្ធោសន្ធៅនោះ។ ប៉ុន្តែដោយសារតែអគ្គិភ័យឆាបឆេះលឿនពេក ទើបរថយន្តពន្លត់អគ្គិភ័យបានត្រឹមបា.ញ់ទឹកបង្ការទប់ស្កាត់កុំឲ្យឆេះឆ្លងបន្ត ខណៈផ្ទះ២ខ្នងត្រូវភ្លើងឆេះអស់ទាំងស្រុងតែម្ដង តែពុំមានគ្រោះថ្នាក់មនុស្សណាម្នាក់ទេ។
យ៉ាងណាក្ដី ពេលនេះមន្ត្រីជំនាញ និងអាជ្ញាធរ បាននិងកំពុងចុះត្រួតពិនិត្យ និងសួរនាំម្ចាស់ផ្ទះហើយ ដើម្បីធ្វើការស្រាវជ្រាវស្វែងរកមូលហេតុនៃអគ្គិភ័យនេះ និងតុល្យការនៃការខូចខាតទ្រព្យសម្បត្តិ ដើម្បីជួយសង្គ្រោះបឋមដល់គ្រួសាររងគ្រោះទាំងអស់៕
ចែករំលែកព័តមាននេះ