ADផ្ទាំងផ្សព្វផ្សាយពាណិជ្ជកម្ម

Picture

សម្រេច​ឃុំខ្លួន​ចិន៣១​នាក់ តៃវ៉ាន់​ម្នាក់ វៀតណាម​ម្នាក់ ដាក់​ពន្ធនាគារ​បណ្តោះអាសន្ន ករណី​ចាប់​បង្ខាំង​មនុស្ស​​ខុសច្បាប់

2 ខែ មុន

រាជធានី​ភ្នំពេញ ៖ ព័ត៌មាន​ចុង​ក្រោយ កាលពី​ល្ងាច​ថ្ងៃ​ទី​២៤ ខែវិច្ឆិកា ឆ្នាំ​២០២៣​នេះ លោក ប្លង់ សុផល ព្រះរាជអាជ្ញា​រង…

រាជធានី​ភ្នំពេញ ៖ ព័ត៌មាន​ចុង​ក្រោយ កាលពី​ល្ងាច​ថ្ងៃ​ទី​២៤ ខែវិច្ឆិកា ឆ្នាំ​២០២៣​នេះ លោក ប្លង់ សុផល ព្រះរាជអាជ្ញា​រង និង​ជា​អ្នកនាំពាក្យ​អយ្យការ​អម​សាលាដំបូង​រាជធានី​ភ្នំពេញ បាន​ឲ្យ​ដឹង​ថា សំណុំរឿង​ជនជាតិ​ចិនដីគោក ចំនួន​៣១​នាក់ ចិនតៃវ៉ាន់​ម្នាក់ និង​វៀតណាម​ម្នាក់ តំណាង​អយ្យការ បាន​បើក​ការ​ស៊ើបសួរ​រួច​ហើយ ពី​បទ ចាប់​ឃុំឃាំង និង​បង្ខាំង​មនុស្ស​ដោយ​ខុសច្បាប់ មាន​ស្ថាន​ទម្ងន់ទោស និង​បទ ប៉ុនប៉ង​ឆបោក មាន​ស្ថាន​ទម្ងន់ទោស និង​បទ ឆបោក​មាន​ស្ថាន​ទម្ងន់ទោស តាម​មាត្រា ២៥៣ មាត្រា​២៥៤ មាត្រា​២៧ មាត្រា​៣៧៧ និង​មាត្រា ៣៨០ នៃ​ក្រមព្រហ្មទណ្ឌ​។ ក្រោយ​ពី​តំណាង​អយ្យការ ធ្វើការ​ចោទប្រកាន់​ជា​ផ្លូវការ​ហើយ សំណុំរឿង​បាន​ចាត់​បញ្ជូន​ទៅ​ខាង​ចៅក្រម​ស៊ើបសួរ ទើប​កាលពី​ល្ងាច​ថ្ងៃខែ​នេះ ចៅក្រម​ស៊ើបសួរ​សម្រេច​ឃុំខ្លួន​ជនសង្ស័យ​ទាំង ៣៣​នាក់ ដាក់​ពន្ធនាគារ​ជា​បណ្តោះអាសន្ន ដើម្បី​រង់ចាំ​បើក​សវនាការ ផ្តន្ទាទោស​ទៅ​តាម​ផ្លូវច្បាប់​ជា​ធរមាន ។

សូម​ជម្រាប​ថា ដោយ​មានការ​ដឹកនាំ​បញ្ជា​ពី​លោក​ឧត្តមសេនីយ៍ឯក ជួន ណា​រិ​ន្ទ អគ្គស្នងការ​រង ជា​ស្នងការ​នគរបាល​រាជធានី​ភ្នំពេញ និង​លោក​វរៈសេនីយ៍ឯក ប៊ុ​ន សត្យា ស្នងការ​រង​ទទួល​ផែន​ការងារ​នគរបាល​ព្រហ្មទណ្ឌ កម្លាំង​សមត្ត​កិច្ច​ការិយាល័យ​នគរបាល​ព្រហ្មទណ្ឌ​កម្រិត​ធ្ងន់ ដឹកនាំ​ផ្ទាល់​ដោយ​លោក​វរៈសេនីយ៍ឯក អេ​ង សោភា ជា​នាយការិយាល័យ កាលពី​រសៀល​ថ្ងៃ​ទី​២០ ខែវិច្ឆិកា ឆ្នាំ​២០២៣ បាន​ចាប់​បញ្ជូន​ជនសង្ស័យ​ពាក់​ពន្ធ​ករណី​ចាប់​បង្ខាំង​មនុស្ស​ដោយ​ខុសច្បាប់ ក្នុង​ទិស​ដៅ​ដើម្បី​ជម្រិត​ទារប្រាក់ ទៅ​សាលាដំបូង​រាជធានី​ភ្នំពេញ ចំនួន​៣៣​នាក់ ក្នុង​នោះ​មាន​ជនជាតិ​ចិនដីគោក ៣១​នាក់ ចិនតៃវ៉ាន់​ម្នាក់ និង​វៀតណាម​ម្នាក់ ហើយ​សំណុំរឿង​ក៏​បាន​ដល់​ដៃ​តំណាង​អយ្យកា​របើក​ការ​ស៊ើបសួរ​តាម​នីតិវិធី ។

សូម​បញ្ជាក់​ថា កាលពី​ថ្ងៃ​រំលង​អា​ធ្រា​ត្រ​យប់​ឈាន​ចូល​ថ្ងៃ​ទី​១៧ ខែវិច្ឆិកា ឆ្នាំ​២០២៣ កម្លាំង​ន​សមត្ថកិច្ច​គ​របាល​ព្រហ្មទណ្ឌ​កម្រិត​ធ្ងន់ រាជធានី​ភ្នំពេញ បាន​សហការ​ជាមួយ​កម្លាំង​មូលដ្ឋាន ចុះ​ធ្វើការ​ឡោម​ព័ទ្ធ និង​ឃាត់ខ្លួន​មនុស្ស​ចំនួន ៤១​នាក់ នៅ​ចំណុច​មុខ​សាលា​អូស្ត្រាលី ស្ថិត​នៅ​តាម​បណ្តោយ​ផ្លូវ​បុរី​អង្គរ ក្នុងភូមិ​បឹង​រាំង សង្កាត់​ទួល​សង្កែ​ទី​១ ខណ្ឌឫស្សីកែវ រាជធានី​ភ្នំពេញ ពាក់ព័ន្ធ​ករណី​បង្ខាំង​មនុស្ស ជំរិត​ទារប្រាក់ និង បើក​ល្បែងស៊ីសង​អន​ឡាញ ដោយ​ខុសច្បាប់​។ ការ​ចុះ​បង្ក្រាប​នោះ គឺ​សមត្ថកិច្ច ធ្វើ​ឡើង​តាម​ពាក្យបណ្តឹង​របស់​នារី​ម្នាក់​ជា​ជនជាតិ​វៀតណាម ដែល​ចេះ​និយាយ​ភាសា​ខ្មែរ ដោយ​អះអាង​ថា ប្អូនប្រុស​របស់​នាង ត្រូវ​បាន​ជន​មួយ​ក្រុម​ចាប់​បង្ខាំង និង​ជំរិត​ទារប្រាក់​ចំនួន​២,៥០០​ដុល្លារ​អា​មេ​រិ​ក ក្រោយ​ពី​ពួក​គេ​ល្បួងលួងលោម​ឱ្យមក​ធ្វើការ​នៅ​ក្រុង​បា​វិត ខេត្តស្វាយរៀង ប៉ុន្តែ​ក្រុម​ឧក្រិដ្ឋជន​ទាំង​អស់នោះ បែរជា​ចាប់​ប្អូនប្រុស​គាត់​(​ដើមបណ្តឹង​) បញ្ជូន​មក​កាន់​រាជធានី​ភ្នំពេញ កាលពី​យប់​ថ្ងៃ​ទី​១៥ ខែវិច្ឆិកា ឆ្នាំ​២០២៣ ដើម្បី​បង្ខាំង​ជំរិត​ទារប្រាក់​ទៅ​វិញ​។

បងស្រី​ជន​រង​គ្រោះ ប្រាប់​សមត្ត​កិច្ច​ថា ប្អូនប្រុស​របស់​គាត់​បាន​ផ្ញើ​សារ​តាម​រយៈ​ទូរ​សព្ទ​បញ្ជាក់​ពី​ទីតាំង ដែល​ក្រុម​ជនសង្ស័យ​ចាប់​យក​ទៅ​បង្ខាំង​ជំរិត​ទារប្រាក់​នោះ ទើប​គាត់​បាន​ទៅ​រាយការណ៍ និង​ប្តឹង​សមត្ថកិច្ច​ឲ្យ​ជួយ​អន្តរាគមន៍ និង​រំដោះ​ប្អូនប្រុស​គាត់​ពី​កណ្តាប់ដៃ​ជនឧក្រិដ្ឋ​ដល់ទី​តាំង​នោះ ។

ក្នុង​រង្វង់​ប្រតិបត្តិការ កម្លាំង​សមត្ត​កិច្ច​នគរបាល បាន​ឡោម​ព័ទ្ធ​ទីតាំង​មួយ​កន្លែង ដែល​មាន​អគារ​កម្ពស់ ៣​ជាន់ ឃាត់ខ្លួន​មនុស្ស​ចំនួន​៤១ នាក់ ក្នុង​នោះ​មាន​ជនជាតិ​បរទេស ចំនួន​៣៣​នាក់ ស្រី​ម្នាក់ ។

ក្រោយ​ប្រតិបត្តិការ​កម្លាំង​សមត្ថកិច្ច​បាន​ធ្វើការ​ដកហូត​រថយន្ត​ចំនួន ០៤​គ្រឿង រួម​មាន ៖
-​រថយន្ត ម៉ាក​រ៉ូ​ស​រ៉ូ​យ​មួយ​គ្រឿង
-​រថយន្ត ម៉ាក​ធន់​ត្រា មួយ​គ្រឿង
-​រថយន្ត ម៉ាក​អាល់​ហ្វា​ត មួយ​គ្រឿង
-​រថយន្ត ម៉ាក​ឡង់​គ្រី​ស័​រ មួយ​គ្រឿង
-​ទូរ​សព្ទ​ដៃ ចំនួន ១៧​គ្រឿង និង​ម៉ូតូ​០២​គ្រឿង ។

បន្ទាប់​មក​ជនសង្ស័យ និង​វត្ថុ​តាង ត្រូវ​បាន​សមត្ថកិច្ច​នាំ​កាន់​ការិយាល័យ​នគរបាល​ព្រហ្មទណ្ឌ​កម្រិត​ធ្ងន់ រាជធានី​ភ្នំពេញ ដើម្បី​បន្ត​នីតិវិធី​៕

អត្ថបទសរសេរ ដោយ

កែសម្រួលដោយ