ផ្ទុះហិ.ង្សាតាមដងវិថីនៅរដ្ឋធានីអៀរឡង់ ក្រោយការវា.យប្រហារដោយកាំបិ.តលើមនុស្សច្រើននាក់
ប្រទេសអៀរឡង់ ៖ ផ្ទុះការប៉ះទង្គិចគ្នាហិ.ង្សាតាមដងវិថីនានានៃរដ្ឋធានីអៀរឡង់ ក្រុងឌុយប្លាំង
ប្រទេសអៀរឡង់ ៖ ផ្ទុះការប៉ះទង្គិចគ្នាហិ.ង្សាតាមដងវិថីនានានៃរដ្ឋធានីអៀរឡង់ ក្រុងឌុយប្លាំង កាលពីយប់ថ្ងៃទី២៣ វិច្ឆិកា កន្លងទៅនេះ ក្រោយការវាយប្រហារដោយកាំបិតនាថ្ងៃនោះ បណ្ដាលឲ្យមនុស្សច្រើននាក់រងរបួសក្នុងនោះមានកុមារ៣នាក់មក។ ការផ្ទុះហិង្សានោះគេទម្លាក់ការទទួលខុសត្រូវលើពួកស្ដាំនិយមជ្រុល ហើយប៉ូលិសបានបដិសេធថាការវាយប្រហារដោយកាំបិតនេះមិនមែនដោយមូលហេតុភេរវកម្មឡើយ។
តាមAFPថារថយន្តច្រើនគ្រឿងក្នុងនោះមានរថយន្តប៉ូលិសមួយគ្រឿងនិងរថយន្កបឺស១គ្រឿង បានត្រូវដុតបំផ្លាញហើយហាងទំនិញនានាត្រូវគេលុកលុកប្រមូលយកឥវ៉ាន់។ ពួកបាតុករបានលើកបង់កាតនានាដែលថា ត្រូវគិតដល់អាយុជីវិតពលរដ្ឋអៀរឡង់។ បាតុករក៏នាំគ្នាលើកទង់ជាតិអៀរឡង់ផងដែរ។ បាតុកម្មហិង្សានោះពុំធ្លាប់មានឡើយក្នុងប្រទេសនេះចាប់តាំងពីច្រើនឆ្នាំមកហើយ និងមានការចូលរួមរបស់មនុស្សច្រើនពាន់នាក់។
អំពើហិង្សាទាំងនេះកើតមានក្នុងសង្កាត់មួយដែលរស់នៅជាពិសេសដោយប្រជាជនជាពួកអន្តោប្រវេសន៍ ក្រោយមានពាក្យចចាមអារ៉ាមនានាដែលថា ពួកនោះជាប្រភពនៃការវាយប្រហារដោយកាំបិត។ ប៉ូលិសគ្រាន់តែនិយាយថាជនវាយប្រហារជាបុរសម្នាក់មានអាយុខ្ទង់៥០ឆ្នាំ។ គ្នុងអំពើហិង្សាប៉ូលិសរងការគប់ ដោយកាំជ្រួចដបសាំងដុតនិងកាំជ្រួចភ្លើង។
អ្នកទទួលខុសត្រូវម្នាក់របស់ប៉ូលិសនិយាយថា ការផ្ទុះហិង្សានេះមកពីពួកក្រុមស្ដាំនិយមជ្រុល ដែលបំប៉ោងពាក្យចចាមអារ៉ាមអុជអាលនានា ក្នុងគោលបំណងអាក្រក់បំបែកបំបាក់។ ពួកជ្រុលនិយមបានហៅបណ្ដាជនអន្តោប្រវេសន៍ថាពួកសម្រាម។ បាតុករម្នាក់ស្រែកថា ពលរដ្ឋអៀរឡង់រងការវាយប្រហារដោយពួកសម្រាមទាំងនេះ។ ចំណែកបាតុករដទៃៗទៀតលើកពីការសម្លាប់អ្នកគ្រូវ័យក្មេងម្នាក់ដោយជនមានដើមកំណើតស្លូវ៉ាកម្នាក់ ដែលនាពេលថ្មីៗនេះទទួលការកាតទោសដាក់គុកអស់មួយជីវិត។
ប្រឈមមុខនឹងវិបត្តិលំនៅឋាន នៅអៀរឡង់ កំពុងមានការកើនឡើងនៃគំនិតស្ដាំនិយមជ្រុល ដែលលើកពីការប្រឆាំងនឹងពួកអន្តោប្រវេសន៍ដោយនិយាយថា អៀរឡង់មានពលរដ្ឋពេញហើយ។ បុរសដែលចាក់មនុស្សច្រើននាក់ត្រូវចាប់ខ្លួននិងកំពុងស្ថិតក្នុងមន្ទីរពេទ្យ៕
ចែករំលែកព័តមាននេះ