ទីក្រុងតូក្យូ៖ ថ្ងៃនេះ រដ្ឋាភិបាលជប៉ុនអនុម័តកញ្ចប់ថវិកាជាតិដ៏ច្រើនសន្ធឹកសន្ធាប់សម្រាប់ប្រើប្រាស់ឆ្នាំ២០២៦។ ក្នុងនោះ ជប៉ុនបានបង្កើនខ្ទង់ចំណាយលើវិស័យការពារជាតិកាន់តែច្រើនជាងមុន។ ថវិកានេះត្រៀមដោះស្រាយបញ្ហាសន្តិសុខសង្គមដោយសារអតិផរណាហក់ឡើងខ្ពស់។ ខ្ទង់ថវិកា១២២,៣ទ្រីលានយ៉េន ឬស្មើនឹង៧៨២ពាន់លានដុល្លារអាមេរិកនឹងចាប់ផ្ដើមចំណាយពីខែមេសា ឆ្នាំ២០២៦តទៅ។
ជប៉ុនត្រៀមចំណាយ៩ទ្រីលានយ៉េន (ជាង៥៨ពាន់លានដុល្លារ) ទៅលើវិស័យការពារជាតិ។ រដ្ឋាភិបាលក្រោមការដឹកនាំរបស់លោកស្រីតាកាអ៊ីឈិចង់អភិវឌ្ឍយោធារបស់ជប៉ុនឱ្យកាន់តែទំនើបនៅក្នុងស្ថានភាពដែលចិន និងជប៉ុនកំពុងមានជម្លោះការទូតជាមួយគ្នា។ ក្រសួងការពារជាតិថ្លែងថានៅពេលនេះ ជប៉ុនប្រឈមនឹងស្ថានការណ៍ដែលធ្ងន់ធ្ងរ និងស្មុគស្មាញខ្លាំងបំផុតមិនធ្លាប់មានចាប់តាំងពីក្រោយសង្គ្រាមលោកលើកទី២។
ជប៉ុនចង់ផ្ដោតសំខាន់ទៅលើការពង្រឹងសមត្ថភាពការពារខ្លួន។ ចំណុចស្នូលនៃការការពារខ្លួននោះគឺប្រព័ន្ធស៊ីល (SHIELD) សម្រាប់ការពារតំបន់ឆ្នេរសមុទ្រ ជាពិសេសចាត់ការដ្រូនរបស់បច្ចាមិត្តដែលបញ្ជូនទៅវាយប្រហារជប៉ុន។ ជប៉ុនសង្ឃឹមថាប្រព័ន្ធស៊ីល (SHIELD) នឹងស្ថាបនារួចរាល់ត្រឹមខែមីនា ឆ្នាំ២០២៨។ ប៉ុន្តែគេមិនទាន់ដឹងច្បាស់ថាតើជប៉ុននឹងដាក់ពង្រាយប្រព័ន្ធនេះនៅទីតាំងណាខ្លះទេ។
ការបង្កើនខ្ទង់ចំណាយថវិកាជាតិដ៏ច្រើនសម្បើមដល់ថ្នាក់នេះធ្វើឱ្យគេព្រួយបារម្ភព្រោះបំណុលសរុបរបស់ជាតិកំពុងតែកើនឡើងស្រាប់ទៅហើយ ហើយរដ្ឋាភិបាលរបស់លោកស្រីតាកាអ៊ីឈិចំណាយរឹតតែច្រើន។ ដូច្នេះមិនដឹងថាយកអ្វីមកទប់ទេបើសិនប្រទេសជាតិមានបញ្ហាហិរញ្ញវត្ថុ។ ជប៉ុនសព្វថ្ងៃនេះគ្មានសមាមាត្ររវាងបំណុល និងជីឌីភីនោះទេ។ ពោលគឺទំហំបំណុលកើនឡើងដល់២៣២,៧%នៃជីឌីភីប្រចាំឆ្នាំ។ នេះបើយោងតាមរបាយការណ៍របស់មូលនិធិរូបិយវត្ថុអន្តរជាតិ៕
ចែករំលែកព័តមាននេះ