ADផ្ទាំងផ្សព្វផ្សាយពាណិជ្ជកម្ម

ប្រដឹសឫស្សីកោះប៉ែន តភ្ជាប់ហើយ ត្រៀមស្វាគមន៍ភ្ញៀវជាតិនិងអន្តរជាតិ ចូលឆ្នាំសកល

3 ខែ មុន

កំពង់ចាម
២៦ ខែ ធ្នូ ឆ្នាំ ២០២៥ ម៉ោង ១៦:៣៩

ខេត្តកំពង់ចាម: នៅក្រោមកម្ដៅថ្ងៃវេលាម៉ោងជាង២រសៀលថ្ងៃទី២៦ធ្នូឆ្នាំ២០២៥ ភ្ញៀវជនជាតិបរទេសម្នាក់អាចជាភ្ញៀវដំបូងគេ បានដើរលើប្រដឹសឬស្សីឬស្ពានឬស្សី ចេញពីឆ្នេរខ្សាច់តម្រង់មកត្រើយម្ខាងក្រុងកំពង់ចាម ដោយទឹកមុខស្រស់ញញឹម។ ជាមួយនោះក្រុមកម្មករកំពុងតែញាប់ដៃជើង ដើម្បីតភ្ជាប់ក្បាលប្រដឹសឬស្សីដែលនៅសល់បន្តិច សម្រាប់ងាយស្រួលដល់ភ្ញៀវទេសចរណ៍ជាតិនិងអន្តរជាតិដើរឆ្លងទៅលេងឆ្នេរខ្សាច់កោះប៉ែន ស្ថិតក្នុងឃុំកោះមិត្ត…

អ្នកស្រីសាវឿនអាយុ៥១ឆ្នាំ បានរៀបរាប់ឲ្យដឹងថា: គាត់បានប្រកបរបរលក់ទឹកអំពៅ ទឹកដូង បាយឆា ព្រមទាំងភេសជ្ជៈនៅចំណុចមាត់ទន្លេមុខវត្តដីដុះក្រុងកំពង់ចាម ជារៀងរាល់ថ្ងៃត្រូវធ្វើដំណើរចេញពីផ្ទះមកពេលព្រឹកព្រលឹមដើម្បីរៀបចំដាក់របស់របរដើម្បីលក់ដូរដូចសព្វមួយដង។

អ្នកលក់ដូររូបនេះបានបន្តឲ្យដឹងទៀតថាក្នុងពេលដែលគាត់កំពុងលក់ដូរនារសៀលថ្ងៃទី២៦ធ្នូឆ្នាំ២០២៥ គឺមានភ្ញៀវបានមកអង្គុយលេងលើកៅអីជ័រដោយហូបទឹកដូង ខ្លះហូបទឹកអំពៅខ្លះទៀតកម្មង់បាយឆា បើសិនជាមានភ្ញៀវមកអង្គុយលេងស្រូយកខ្យល់អាកាសបរិសុទ្ធមាត់ទន្លេច្រើន គាត់ឯករកចំណូលបានក្នុងចន្លោះ២០ទៅ៣០ ម៉ឺនរៀល របរមួយនេះបានជួយផ្គត់ផ្គង់ជីវភាពគ្រួសារដោយឱ្យកូនប្រុសស្រីចំនួន៥នាក់បានរៀនសូត្រដូចជាឯងនៅសាលារៀន។

លោកជុំ អុល អាយុជាង៦០ឆ្នាំជាកម្មករធ្វើប្រដឹសឬស្សី បានរៀបរាប់ថា ក្រុមការងាររបស់គាត់មានសរុបទាំងអស់ជាង១០នាក់កំពុងតែនាំគ្នាញាប់ដៃជើងដើម្បីធ្វើប្រដឹសឬស្សីដែលមានប្រវែង ៩២០ម៉ែត្រ សម្រាប់តភ្ជាប់ពីត្រើយក្រុងកំពង់ចាមទៅឆ្នេរខ្សាច់កោះប៉ែន។ក្នុងមួយថ្ងៃគាត់ទទួលបានប្រាក់កម្រៃ៤ម៉ឺនរៀល សម្រាប់យកទៅដោះស្រាយជីវភាពគ្រួសារ ។ជារៀងរាល់ឆ្នាំក្រោយពីទឹកទន្លេមេគង្គស្រក ក្រុមរបស់គាត់បាននាំគ្នាមកធ្វើប្រដឹសឬស្សីឬស្ពានឬស្សីកោះប៉ែន ដើម្បីសម្រាប់ជាមធ្យោបាយភ្ញៀវជាតិនិងអន្តរជាតិដើរឆ្លងកាត់ទៅវិញទៅមកហើយក្នុងមនុស្សម្នាក់យកតម្លៃ២០០០រៀល។

សូមបញ្ជាក់ថាប្រដឹសឬស្សីនេះអាចឱ្យភ្ញៀវជាតិនិងអន្តរជាតិមកពីគ្រប់ទិសទីដើរឆ្លងកាត់បានតែក្នុងរដូវប្រាំងប៉ុណ្ណោះ។លុះរដូវវស្សាចូលមកដល់រដូវនេះនឹងត្រូវកម្មកររុះរើ ដើម្បីយកឬស្សីទុកប្រើបន្តទៀតនឹងមួយផ្នែកធំត្រូវទិញពីស្រុកលើដើម្បីយកមកធ្វើសសរទម្រដែលមានរាប់ពាន់ដើម។ ចំពោះឆ្នេរខ្សាច់កោះប៉ែនគឺមានអាហារដ្ឋានសម្រាប់បម្រើសេវាជូនដល់ភ្ញៀវដោយលក់ក្នុងតម្លៃសមរម្យទៅតាមការណែនាំរបស់មន្ទីរទេសចរណ៍ខេត្ត ។លោកប៊ុន ដារាអ្នកគ្រប់គ្រងរមណីយដ្ឋានឆ្នេរខ្សាច់កោះប៉ែនធ្លាប់លើកឡើងថាចំពោះភ្ញៀវដែលចង់ងូតទឹកទន្លេលេងមិនថាក្មេងឬចាស់គឺតម្រូវឲ្យពាក់អាវពោងដើម្បីធានាសុវត្ថិភាព ៕