រាជធានីភ្នំពេញ ៖ ក្លិបអ្នកកាសែតកម្ពុជា (ក.អ.ក) នៅថ្ងៃទី ២៦ ខែធ្នូ ឆ្នាំ ២០២៥ នេះបានចែកអាវក្រោះ…
រាជធានីភ្នំពេញ ៖ ក្លិបអ្នកកាសែតកម្ពុជា (ក.អ.ក) នៅថ្ងៃទី ២៦ ខែធ្នូ ឆ្នាំ ២០២៥ នេះបានចែកអាវក្រោះ និងមួកសុវត្ថិភាពដល់អ្នកសារព័ត៌មានចំនួន ៥៧រូប មកពី ៣៦ស្ថាប័ន ដើម្បីជួយការពារសុវត្ថិភាពដល់អ្នកសារព័ត៌មានដែលកំពុងបំពេញការងារព័ត៌មាននៅតាមបណ្ដោយព្រំដែនកម្ពុជា-ថៃ និងទីកន្លែងងាយរងគ្រោះដទៃទៀតក្នុងអំឡុងពេលដែលទាហានថៃបានវាយប្រហារមកលើកម្ពុជា ។ អាវក្រោះ និងមួកសុវត្ថិភាពដោយមានស្លាកសញ្ញអ្នកសារព័ត៌មាន ឬ PRESS ជាសញ្ញាដ៏ចាំបាច់បំផុតសម្រាប់អ្នកសារព័ត៌មាននៅពេលកំពុងបំពេញការងារ ។
ក.អ.ក មើលឃើញថា ការចែកអាវក្រោះ និងមួកសុវត្ថិភាពនាពេលនេះមិនបានគ្រប់ចំនួនអ្នកសារ ព័ត៌មានដែលបាន និងកំពុងបំពេញបេសកកម្មយកព័ត៌មាននៅតាមបណ្ដោយព្រំដែនដែលមានជម្លោះ ឬទីកន្លែងងាយរងគ្រោះនោះឡើយ ។ ប៉ុន្តែ ក.អ.ក នឹងខិតខំស្វែងរកជំនួយពីសប្បុរសជនបន្ថែមទៀតដើម្បីបំពេញតម្រូវការចាំបាច់របស់អ្នកសារព័ត៌មាននៅកាលៈទេសៈនេះ ។ ក.អ.ក សូមថ្លែងអំណរគុណដល់សប្បុរសជន ដែលបានគាំទ្រដល់សកម្មភាពរបស់អ្នកសារព័ត៌មាន កម្ពុជានៅក្នុងបេសកកម្មយកព័ត៌មាននៅតាមទីកន្លែងដូចបានរៀបរាប់ខាងលើ ។
អ្នកសារព័ត៌មានដែលចុះយកសារព័ត៌មានក្នុងអំឡុងពេលមានសង្គ្រាម ត្រូវបានការពារដោយច្បាប់
អន្តរជាតិថា ជាជនស៊ីវិល ព្រោះពួកគាត់ដើរតួនាទីជាអ្នកផ្ដល់ព័ត៌មានដល់ពិភពលោកឱ្យដឹងពីហេតុការណ៍ ដែលបានកើតឡើង និងកំពុងកើតឡើង ដោយមិនជាប់ពាក់ព័ន្ធនឹងតួនាទីជាកងទ័ព ឬកាន់អាវុធឡើយ ហើយក៏ត្រូវបានហាមមិនឱ្យផ្ដល់ព័ត៌មានទាក់ទងនឹងលេណដ្ឋាន ការចល័តទ័ព ផ្ដល់ព័ត៌មានបែបជាយុទ្ធសាស្ត្រទ័ព ឬបែបចារកម្ម និងព័ត៌មានទាំងឡាយណាដែលនាំឱ្យប៉ះពាល់ដល់ជនស៊ីវិល។ ល។
ក្នុងពិធីចែកអាវក្រោះ និងមួកសុវត្ថិភាពដល់អ្នកសារព័ត៌មាននេះ លោក ពុយ គា ប្រធានក្លិបអ្នកកាសែតកម្ពុជា បានឱ្យដឹងថា រហូតមកដល់ពេលនេះយោងតាមទិន្នន័យរបស់ក្រសួងមហាផ្ទៃ ចាប់តាំងពីថ្ងៃទី ៧ មកដល់ថ្ងៃទី ២៥ ខែធ្នូ ឆ្នាំ ២០២៥ មានជនស៊ីវិល ៣០រូបបានបាត់បង់ជីវិត និងចំនួនជិត ១០០នាក់ផ្សេងទៀតបានរងរបួស ដែលក្នុងនោះក៏មានបងប្អូនអ្នកសារព័ត៌មាន ១រូបដែរដែលរងគ្រោះដោយសារតែអំបែងគ្រាប់ផ្លោងរបស់ទាហានថៃ ។
លោក ពុយ គា បញ្ជាក់ទៀតថា យើងដឹងហើយថា អ្នកសារព័ត៌មានជាអ្នកប្រឈមគ្រោះថ្នាក់ខ្លាំងខ្លាណាស់ដែរបន្ទាបើពីកងទ័ពនៅជួរមុខ ដោយសារអ្នកសារព័ត៌មានបានដើរតួនាទីទៅទីតាំងប៉ះទង្គិច ទីតាំងជនរងគ្រោះ និងទីតាំងកងទ័ពថៃផ្លោងដាក់ និងយន្តហោះរបស់ថៃទម្លាក់គ្រាប់ ។ ដូច្នេះហើយបានជាក្លិបអ្នកកាសែតកម្ពុជា ព្យាយាមប្រឹងប្រែងធ្វើយ៉ាងណាជួយគិតគូរទៅដល់សុវត្ថិភាពរបស់បងប្អូនអ្នកសារព័ត៌មាន ។
លោកប្រធានក្លិបអ្នកកាសែតកម្ពុជា ក៏បានបញ្ជាក់ផងដែរថា អ្នកសារព័ត៌មាននៅក្នុងសម័យសង្គ្រាមត្រូវបានគេចាត់ទុកថា ជាជនស៊ីវិលមួយរូបដែរដែលតួនាទីរបស់គាត់គ្រាន់តែទៅសមរភូមិ ហើយនិងទីកន្លែងដទៃទៀតដែលងាយរងគ្រោះ ដើម្បីយកព័ត៌មានមកផ្តល់ជូនដល់ប្រជាពលរដ្ឋដែលមិនត្រឹមនៅតែកម្ពុជាទេ គឺនៅទូទាំងពិភពលោក ។ ដូច្នេះតួនាទីរបស់អ្នកសារព័ត៌មានសំខាន់ណាស់ ប៉ុន្តែទន្ទឹមនឹងនេះសុវត្ថិភាពរបស់ពួកគាត់ក៏សំខាន់ដែរ ៕
ចែករំលែកព័តមាននេះ