- ភ្នំពេញ
ខណៈដែលការបង្កបង្កើនផលស្រូវរដូវវស្សា កសិករកំពុងតែប្រមូលផល មានសេចក្តីរាយការណ៍ឱ្យដឹងថា អង្ករនៅលើទីផ្សារហាក់មានការកើនឡើង ដោយក្នុងមួយគីឡូក្រាមប្រមាណ៥០០រៀល
ខណៈដែលការបង្កបង្កើនផលស្រូវរដូវវស្សា កសិករកំពុងតែប្រមូលផល មានសេចក្តីរាយការណ៍ឱ្យដឹងថា អង្ករនៅលើទីផ្សារហាក់មានការកើនឡើង ដោយក្នុងមួយគីឡូក្រាមប្រមាណ៥០០រៀល ។ នេះបើតាមការឲ្យដឹងរបស់អាជីវករ។
កំពុងតែអង្គុយនៅតូបលក់អង្ករ ក្នុងផ្សារកណ្តាល រាជធានីភ្នំពេញ អ្នកស្រី ស វណ្ណា បានប្រាប់កម្មវិធីលុយឱ្យដឹងថា «អង្ករសឹងតែគ្រប់ប្រភេទទាំងអស់ឡើងថ្លៃ ក្នុងមួយគីឡូក្រាម៥០០រៀល ចាប់តាំងពីខែកញ្ញាមក»។ អ្នកស្រីបន្តថា «ការឡើងថ្លៃអង្ករនេះ គឺមកពីការប្រមូលទិញស្រូវរបស់ប្រទេសជិតខាងកម្ពុជាមួយចំនួន»។
អ្នកស្រី ស វណ្ណា បានបន្តថា «ឈ្មួញបរទេសគេមកប្រមូលទិញពីប្រទេសយើងទៅតែម្តង។ ក្នុងមួយគីឡូក្រាមឡើង៥០០រៀល កាលពីលើកមុនវាឡើងតែ១០០រៀលសន្សឹមៗ ប៉ុន្តែពេលខែ៩ហ្នឹង វាឡើងគ្រឹបតែម្តង គឺវាឡើងដល់៥០០រៀលឯណោះ។ អ្នកណាក៏មិនដឹងថា អង្ករវាឡើងថ្លៃដល់ថ្នាក់ហ្នឹងដែរ»។
អ្នកស្រី ស វណ្ណា បន្តថា «នៅពេលអង្ករឡើងថ្លៃបែបនេះ អ្នកស្រីក៏ពិបាកក្នុងការលក់ដូរផងដែរ»។ អ្នកស្រីបន្តថា «នៅពេលទីផ្សារអង្ករឡើងថ្លៃអ៊ីចឹងហើយ យើងប្រាប់ម៉ូយតាមហ្នឹងទៅ ម៉ូយខ្លះទៅក៏យល់ចិត្តយើងក៏យកទៅ»។
អ្នកស្រី ស វណ្ណា បន្ថែមថា «មីងលក់អង្ករនេះរយៈពេល២០ទៅ៣០ឆ្នាំហើយ ដល់ពេលអង្ករហ្នឹងថោកយើងអាចទិញស្តុកខ្លះទៅ លុះពេលឡើងថ្លៃយើងក៏មិនហ៊ានឡើងថ្លៃម៉ូយខ្លាំងដែរ។ ហើយមីងលក់មួយថ្ងៃ បានចន្លោះចាប់ពី២០០ទៅ៣០០គីឡូក្រាម ទុកគ្រាន់តែចិញ្ចឹមគ្រួសារ»។
អ្នកលក់អង្កររូបនេះបន្តថា «ភាគច្រើនអង្ករនៅតាមទីផ្សារ ជាពិសេសក្នុងរាជធានីភ្នំពេញ មានការឡើងថ្លៃពីមួយកម្រិតទៅមួយកម្រិត»។ ប៉ុន្តែអ្នកស្រីថា «បើតម្លៃស្រូវរបស់កសិករវិញ ក៏ឡើងថ្លៃដូចគ្នាដែរ»។
អ្នកស្រី ស វណ្ណា បន្តទៀតថា «បច្ចុប្បន្ន អង្ករផ្កាម្លិះមួយគីឡូក្រាម តម្លៃ៤០០០រៀល ផ្កាខ្ញីតម្លៃ៣០០០រៀល ហើយបើជាអង្ករនាងមិញវិញគឺមិនមានទេ ព្រោះអង្ករថោកៗមិនសូវមានទេ មានតែអង្ករថ្លៃ ពេលនេះគឺចេញមកតែអង្ករថ្លៃៗតែម្តង។ ខ្ញុំទទួលពីគេមកលក់ គឺផ្សារអូរឬស្សី ប៉ុន្តែថៅកែខ្ញុំគេយកគ្រប់ខេត្តមាន ៖ ខេត្តកំពង់ស្ពឺ ខេត្តបាត់ដំបង ខេត្តកំពង់ចាម និងគ្រប់ខេត្តអង្ករណាល្អ គឺគេកុម្មង់ទៅ។ យើងអ្នកទទួលលក់បន្តធម្មតាៗ»។
គួរបញ្ជាក់ថា ក្នុងពិធីប្រកាសឱ្យអនុវត្តន៍ជាផ្លូវការនៅកម្មវិធី «គោលនយោបាយអាទិភាពទី៥ និងទី៦ របស់រាជរដ្ឋាភិបាល នីតិកាលទី៧ នៃរដ្ឋសភា» នាព្រឹកថ្ងៃទី២០ ខែវិច្ឆិកា ឆ្នាំ២០២៣ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ បានប្រាប់ឲ្យដឹងថា «គិតមកដល់ដើមខែវិច្ឆិកា ឆ្នាំ២០២៣នេះ ការដាំដុះស្រូវសម្រេចបានជាង ៣,៦លានហិចតា និងទទួលបានទិន្នផល ៦,២លានតោន ហើយក៏រំពឹងថា កម្ពុជានឹងបន្តទទួលបានទិន្នផល ៦,៣លានតោនបន្ថែមទៀត»។
លោកបានបន្តថា «នៅក្នុងរយៈពេលដូចគ្នានេះដែរ ការនាំចេញផលិតផលកសិកម្មនៅតែបន្តរក្សាបានតួរលេខខ្ពស់ គឺជាង ៦,២លានតោន គិតជាទឹកប្រាក់ជាង ៣,៥លានដុល្លារ ទៅកាន់ទិសដៅចំនួន៧៤ប្រទេស ។
អត្ថបទដោយ ៖ ស. នីត
ចែករំលែកព័តមាននេះ