ពិធីអុំទូក ដែលនឹងមកដល់នៅសប្តាហ៍ក្រោយនេះ ត្រូវគេរំពឹងថា នឹងធ្វើឱ្យចរន្តសាច់ប្រាក់នៅក្នុងសង្គមខ្មែរ មានចរន្តតាមរយៈការចាយវាយ លក់ដូរ និងការចំណាយរបស់រដ្ឋក្នុងការរៀបចំកម្មវិធី ជាផ្នែកមួយជួយដល់ដង្ហើមសេដ្ឋកិច្ច
ពិធីអុំទូក ដែលនឹងមកដល់នៅសប្តាហ៍ក្រោយនេះ ត្រូវគេរំពឹងថា នឹងធ្វើឱ្យចរន្តសាច់ប្រាក់នៅក្នុងសង្គមខ្មែរ មានចរន្តតាមរយៈការចាយវាយ លក់ដូរ និងការចំណាយរបស់រដ្ឋក្នុងការរៀបចំកម្មវិធី ជាផ្នែកមួយជួយដល់ដង្ហើមសេដ្ឋកិច្ចផងដែរ។
មានការលើកឡើងថា ដោយសារជីវភាពមានការលំបាក ពលរដ្ឋឥឡូវមានការត្បិតត្បៀតរឿងចាយវាយ ធ្វើឱ្យកម្លាំងទិញនៅកម្ពុជាធ្លាក់ចុះ ពោលគឺតាមផ្សារមានតែអ្នកលក់ គ្មានអ្នកទិញ។ ការចរន្តសាច់ប្រាក់ធ្លាក់ចុះ គ្មានការចាយវាយ នោះវានឹងប៉ះពាល់ដល់សេដ្ឋកិច្ចផងដែរ។
ចរន្តសាច់ប្រាក់វិល ដោយសារពិធីបុណ្យប្រចាំឆ្នាំ ដែលបានអាកខានរៀបចំជាច្រើនឆ្នាំមកហើយនោះ ដោយសារមានពលរដ្ឋប្រមាណ៣លាននាក់ ត្រូវគេរំពឹងថា ដើរកម្សាន្តនៅភ្នំពេញ។ ជាមួយគ្នានេះ មានពលរដ្ឋមួយចំនួនទៀត បានចេញពីទីក្រុងទៅកម្សាន្តនៅតាមរមណីយដ្ឋាននានាក្នុងប្រទេស និងមានអ្នកខ្លះទៀត អាចធ្វើដំណើរចេញទៅក្រៅប្រទេសផងដែរ។
ពិធីបុណ្យប្រណាំងទូក អកអំបុក សំពះព្រះខែ និងបណ្តែតប្រទីប បានខកខាតជាច្រើនឆ្នាំជាប់គ្នាមកដោយសារកូវីដ១៩ និងកម្ពុជាជាប់រវល់រៀបចំព្រឹត្តិការណ៍អន្តរជាតិផ្សេងៗ ដូចជា កិច្ចប្រជុំកំពូលអាស៊ាន ជាដើម។ នៅឆ្នាំពិធីបុណ្យអុំទូក ចំថ្ងៃទី២៦ រហូតដល់ថ្ងៃទី២៨ ខែវិច្ឆិកា គឺត្រូវនឹងថ្ងៃអាទិត្យ ចន្ទ និងថ្ងៃអង្គារ បូកជាមួយថ្ងៃសៅរ៍មួយថ្ងៃថែមទៀត ឃើញថា ពលរដ្ឋមានថ្ងៃឈប់សម្រាកយ៉ាងតិច៤ថ្ងៃ ដូច្នេះពួកគេអាចនឹងធ្វើដំណើរទេសចរណ៍បានយ៉ាងងាយស្រួល។
លោក សុផល ពលរដ្ឋម្នាក់លក់ដូរតាមរទេះរុញក្នុងក្រុងភ្នំពេញ មានក្តីសប្បាយរីករាយ ដែល កម្ពុជារៀបចំបុណ្យអុំទូកឡើងវិញ។ បុរសវ័យ៤៦ឆ្នាំ អ្នកលក់ទឹកសុទ្ធ ភេជ្ជៈកំប៉ុង និយាយថា លោករំពឹងថា នឹងអាចរកប្រាក់ច្រើនជាងថ្ងៃធម្មតានៅពេលអុំទូក ដែលមានអ្នកដើរកម្សាន្តច្រើននោះ។ «ខ្ញុំធម្មតា ខ្ញុំអាចរកប្រាក់បាន៥ម៉ឺនរៀល ដល់ពេលអុំទូកសង្ឃឹមថា អាចរកបានជាង១០ម៉ឺនរៀលក្នុងមួយថ្ងៃ។ រាល់ថ្ងៃនេះ លំបាកណាស់ រកប្រាក់បានតិច ប៉ុន្តែចំណាយច្រើនទំនិញឡើងថ្លៃរហូត»។
លោកសុផល នៅភ្នំពេញជួលបន្ទប់ស្នាក់នៅជុំគ្នាក្នុងតម្លៃ៤០ដុល្លារ នៅម្តុំផ្លូវរទេះភ្លើង។ ចំណែកប្រពន្ធរបស់លោកទូលកញ្ជើផ្លែឈើលក់ ដែលអាចរកប្រាក់ប្រហាក់ប្រហែលលោកដែរក្នុងមួយថ្ងៃ។
ចំណែកលោក ម៉ានី មន្ត្រីរាជការម្នាក់ បាននិយាយថា ប្រសិនជាពលរដ្ឋដើរកម្សាន្តច្រើន ហើយពួកគាត់មានថវិកាចាយវាយនោះ ពិតជាប្រការមួយល្អ ដែលបានជួយដល់សេដ្ឋកិច្ចជាតិ។ មន្ត្រីរាជការរូបនេះ និយាយថា បច្ចុប្បន្ននេះ មិនថាលោក ឬអ្នកផ្សេងនោះទេ មានការរឹតត្បិតចាយវាយខ្លាំងណាស់ ដោយសារតម្រូវការចំណាយសំខាន់ៗចំពោះមុខច្រើនពេក ដូចជាត្រូវបង់ធនាគារជាដើមនោះ។ ដូច្នេះអ្វីមិនសំខាន់ គេមិនចំណាយនោះឡើយ។
«មិនថាខ្ញុំ គេនោះទេ ប្រាក់ខែបើកបានទុកគ្រាន់បង់ធនាគារប៉ុណ្ណោះ មិនហ៊ានចាយវាយផ្តេសផ្តាសនោះទេ។ ប្រាក់សល់ពីបង់ធនាគារ មានតិចតូច បើចាយវាយមិនគិត គ្មានលុយហូបបាយឡើយ។ ខ្ញុំក៏ឮមិនភ័ក្តិជាច្រើនត្អូញពីសេដ្ឋកិច្ច ហើយតាមទិដ្ឋភាពជាក់ស្តែង យើងឃើញ អាជីវកម្មជាច្រើនបានបិទទ្វារ ដូចជា ភោជនីយដ្ឋានជាដើម ដោយសារគ្មានអ្នកទិញ»។ នេះបើតាមលោកម៉ានី បានរៀបរាប់ប្រាប់ឱ្យដឹង។
អាជ្ញាធរ រាជធានីភ្នំពេញ បានកំពុងរៀបចំសណ្តាប់ធ្នាប់ និងត្រៀមទីតាំងតាមបណ្តោយទន្លេសាប សម្រាប់ពលរដ្ឋដើរកម្សាន្ត ស្តង់លក់ដូរ និងការសម្តែងសិល្បៈជាដើម។ តាមគម្រោងព្រះរាជពិធីឆ្នាំនេះ នឹងមាន ទូក.ង ចូលរួមប្រណាំងប្រមាណជាង៣០០ទូក និងមានកីឡាករ កីឡាការិនីចំណុះទូកប្រមាណជិត២ម៉ឺននាក់ ព្រមទាំងមានប្រទីបចូលរួមប្រមាណជាង២០ប្រទីបទៀតផង។
ចំពោះទីតាំងសម្រាប់ការស្នាក់នៅរបស់កីឡាករចំណុះទូកវិញ ត្រូវបានបែងចែកជា២ទីតាំង ក្នុងនោះនៅអតីតឃ្លាំងសាំង ស្ថិតក្នុងខណ្ឌឫស្សីកែវ មួយទីតាំង និងនៅខាងកើតទន្លេសាប ស្ថិតក្នុងដីអភិវឌ្ឍន៍ OCIC ខាងជើងរង្វង់មូលនាងមច្ឆា ខណ្ឌជ្រោយចង្វា មួយទីតាំងទៀត ហើយទីតាំងទាំង២នេះ នឹងរៀបចំបណ្តាញទឹក ភ្លើង ព្រមទាំន់បង្គន់អនាម័យផងដែរ។
តិច ឬច្រើន នៅពេលដើរកម្សាន្តពលរដ្ឋនឹងចំណាយថវិកា ហើយការរៀបចំកម្មវិធីរបស់រដ្ឋ ក៏គេរាប់ថា ជាការចំណាយផងដែរ។ រដ្ឋចំណាយលើការរៀបចំកម្មវិធីបុណ្យ មានដូចជា ចំណាយសម្រាប់មន្ត្រី បុគ្គលិក សន្តិសុខ ចំណាយលើការរៀបចំប្រទីប ចំណាយទិញកាំជ្រួច ចំណាយអគ្គិសនី ទឹក ការសំអាតទីក្រុង ចំណាយលើការផ្សព្វផ្សាយជាដើម សុទ្ធសឹងជាចរន្តសាច់ប្រាក់។ គេមិនដឹងថា រដ្ឋគ្រោងចំណាយថវិកាប៉ុន្មានសម្រាប់ការរៀបចំកម្មវិធីបុណ្យនេះនោះទេ ប៉ុន្តែបើតាមអ្នកសេដ្ឋកិច្ច ទាំងចំណាយរបស់រដ្ឋ និងចំណាយពលរដ្ឋ នឹងចូលរួមដល់ដង្ហើមសេដ្ឋកិច្ចអោយមានសកម្មភាព៕
អត្ថបទដោយ ៖ សា រ៉ាន់
ចែករំលែកព័តមាននេះ