ADផ្ទាំងផ្សព្វផ្សាយពាណិជ្ជកម្ម

Picture

អ្នក​ចូល​ចិត្ត​ដើរ​លេង​ក្រៅប្រទេស ៖ វិធី​ទាំងនេះ អស់​លុយ​តិច តែ​សប្បាយ

6 ខែ មុន
  • ភ្នំពេញ

កាលណា​យើង​ចង់​សប្បាយ​នឹង​ការ​ដើរ​លេង​នៅ​ក្រៅប្រទេស ដឹង​តែ​ត្រូវ​អស់​លុយ​ហើយ ប៉ុន្តែ​ប្រសិន​បើ​រិះគិត​ចំណុច​ខាងក្រោម​នេះ វា​អាច​កាត់​បន្ថយ​ការ​ចំណាយ​បាន​ច្រើន ហើយ​ក៏​មានឈ្មោះ​ថា

កាលណា​យើង​ចង់​សប្បាយ​នឹង​ការ​ដើរ​លេង​នៅ​ក្រៅប្រទេស ដឹង​តែ​ត្រូវ​អស់​លុយ​ហើយ ប៉ុន្តែ​ប្រសិន​បើ​រិះគិត​ចំណុច​ខាងក្រោម​នេះ វា​អាច​កាត់​បន្ថយ​ការ​ចំណាយ​បាន​ច្រើន ហើយ​ក៏​មានឈ្មោះ​ថា «​បាន​​ដើរ​លេង​បរទេស​» មិនតែប៉ុណ្ណោះ​ក៏​អាច​នឹង​ទទួល​បទ​ពិសោធន៍​ល្អ​ៗ​ជា​ច្រើន​ផង​ដែរ ។

ចូរ​សាកល្បង​អនុវត្ត​តាម​កត្តា​ទាំងនេះ នោះ​អ្នក​នឹង​ទទួល​បាន​បទ​ពិសោធន៍​នៃ​ដំណើរ​ទេសចរណ៍​ពិត​ៗ​ជាមួយនឹង​ការ​ចំណាយ​ដែល​អស់​មិន​ច្រើន ដូច​ជា​ការ​ចំណាយ​តាម​ក្រុមហ៊ុន​ទេសចរណ៍​ឡើយ​។ ប៉ុន្តែ​មុន​នឹង​ធ្វើ​ដំណើរ អ្នក​ដាច់ខាត​ត្រូវ​តែ​សិក្សា​ស្វែង​យល់​ពី​គោលដៅ​ដែល​អ្នក​ចង់ទៅ ដោយ​រួម​ទាំង​ព័ត៌មាន​នៃ​ការ​ស្នាក់​នៅ ប្រពៃណី ទំនៀមទម្លាប់ មធ្យោបាយ ដឹក​ជញ្ជូន​ជា​ពិសេស​គឺ​ម្ហូបអាហារ​នៅ​គោលដៅ​នោះ​ជា​មុន ។

១- រៀបចំ​ផែនការ​ទុក​មុន ៖
ប្រ​សិន​អ្នកមាន​លុយ គឺ​គ្រាន់តែ​បោះ​លុយ​មួយ​កញ្ចប់​ទៅ​ក្រុមហ៊ុន​ទេសចរណ៍ នោះ​គេ​នឹង​ចាត់ចែង​ឲ្យ​អ្នក​សព្វបែបយ៉ាង​។ ប៉ុន្តែ​ប្រសិនបើ​អ្នក​ចង់​សន្សំ​លុយ អ្នក​ដាច់ខាត​ត្រូវ​តែ​គិត​ទុកជា​មុន ហើយ​ប្រសិនបើ​អាច​គួរតែ​ធ្វើ​ដំណើរ​ដោយ​មាន​គ្នា ។ ការ​ធ្វើ​ដំណើរ​មាន​គ្នា វា​ផ្តល់​ទំនុកចិត្ត ហើយ​ក៏​អាច​ជួយ​គ្នា​ទៅ​វិញ​ទៅ​មក​នៅ​ពេល​មាន​បញ្ហា ដូច្នេះ​ត្រូវ​តែ​បង្កើត​ផែនការ​ឲ្យ​ច្បាស់លាស់​ដោយ​ខ្លួនឯង ។ អ្នក​ត្រូវ​តែ​ស្វែងរក​ការ​កក់​សំបុត្រ​យន្តហោះ​នៅ​ក្នុងអំឡុងពេល​ដែល​គេ​ធ្វើ​កម្មវិធី​បញ្ចុះតម្លៃ កន្លែង​ស្នាក់​នៅ​តាម​បែប​ទេសចរណ៍​ផ្សងព្រេង ហើយ​ព្យាយាម​សន្សំ​លុយ​ទុក ។

២- ត្រូវ​ជ្រើសរើស​ពេល​ដែល​គេ​មិន​និយម​ដើរ ៖
ជា​ធម្មតា​តែ​ពេល​មាន​តម្រូវការ​ច្រើន​នោះ តម្លៃនឹង​ឡើងថ្លៃ​តាំងពី​ការ​ដឹក​ជញ្ជូន ការ​ហូប​ចុក ការ​ស្នាក់​នៅ ។ ប៉ុន្តែ​ប្រសិនបើ​អ្នក​ជ្រើសរើស​ពេល​ដែល​គេ​មិនសូវ​និយម​ដើរ នោះ​តម្លៃ​នៃ​ការ​ចំណាយ​នឹង​ធូរស្រាល​ច្រើន ដោយសារ​តែ​សេវាកម្ម​គ្រប់​វិស័យ​នឹង​បញ្ចុះតម្លៃ ។ នៅ​ក្នុង​ឱកាស​បែប​នោះ ប្រសិនបើ​អ្នក​ដើរ អ្នក​អាច​នឹង​ទទួល​បាន​បទ​ពិសោធ​នៃ​សេវាកម្ម​ឥត​ខ្ចោះ​ក៏​ថា​បាន ជាមួយនឹង​អត្រា​តម្លៃ​ដ៏​សមរម្យ​បំផុត ។

៣- ភាព​វៃឆ្លាត​ក្នុង​ការ​ស្នាក់​នៅ ៖
នៅ​ពេល​នេះ តម្លៃ​នៃ​ការ​ស្នាក់​នៅ​តាម​គោលដៅ​ទេសចរណ៍ និង​ទីកន្លែង​នានា មិន​ថា​នៅ​ទីណា​នោះ​ទេ គឺ​ច្រើន​តែ​មាននៅ​តាម​បណ្តាញ​សង្គម​ធំ​ៗ ។ ដូច្នេះ​អ្នក​អាច​សម្រេចចិត្ត​ជ្រើសរើស​បាន​តាម​លទ្ធភាព​ដែល​អ្នក​ចង់ ហើយ​នៅ​ក្នុង​នោះ គឺ​មាន​តាំងពី​កម្មវិធី​បញ្ចុះតម្លៃ និង​ការ​អនុគ្រោះ​ផ្សេង​ៗ​ទៀត ដែល​អ្នក​អាច​ស្វែងរក​តាម​បណ្តាញ​សង្គម ឬ​អ៊ី​ន​ធើ​រ​ណេ​ត​។

៤- គួរ​សាកល្បង​ប្រើ​មធ្យោបាយ​ធ្វើ​ដំណើរ​សាធារណៈ​របស់​ប្រទេស​គេ ៖
ឡានក្រុង និង​រថភ្លើង​មាន​តម្លៃ​ថោក​ជាង​យន្តហោះ​។ ដូច្នេះ​វា​គឺជា​ជម្រើស​ដ៏​សមរម្យ​សម្រាប់​ជា​ជំរើស​នៃ​ដំណើរ​កំសាន្ត​តាម​បែប​សន្សំ​សំចៃ​របស់​អ្នក ។

ការ​ធ្វើ​ដំណើរ​តាម​មធ្យ​បាយ​ដឹក​ជញ្ជូន​នៅ​ក្នុងស្រុក​ជា​ទូទៅ វា​អាច​ងាយស្រួល​ធ្វើ​អោយ​អ្នក​វង្វេង ប៉ុន្តែ​ក៏​ជា​បទ​ពិសោធន៍ និង​ជា​ឱកាស​ដែល​អ្នក​អាច​នឹង​ស្វែង​យល់​អំពី​ស្ថានភាព​ពិតប្រាកដ​នៃ​គោលដៅ ប្រសើរ​ជាង​ពេល​អ្នក​កាន់​លុយ​មួយ​កញ្ចប់​ទម្លាក់​អោយ​ក្រុមហ៊ុន​ទេសចរណ៍​រៀបចំ ដូច្នេះ​ហើយ​បានជា​យើង​ឧស្សាហ៍​ឃើញ​ភ្ញៀវ​បរទេស​ខ្លះ​ធ្វើ​រួច​មក​ហើយ នៅ​ពេល​ពួក​គេ​មក​លេង​កម្ពុជា​យើង ។

៥- ការ​ទទួលទាន ៖
បើ​និយាយ​អំពី​អាហារ គឺ​មាន​តម្លៃ​កប់​ពពក ប្រសិនបើ​អ្នក​ទៅ​ទទួលទាន​នៅ​តាម​ភោជនីយដ្ឋាន​នានា ប៉ុន្តែ​ប្រសិនបើ​អ្នក​ជ្រើសរើស​ការ​ទទួលទាន​ជាមួយនឹង​អ្នកស្រុក​នោះ វា​ពិតជា​ចំណាយ​តិច​មែនទែន​។ ប៉ុន្តែ​ពេល​ខ្លះ យើង​ក៏​ត្រូវ​តែ​រៀន​អត់ធ្មត់ ពីព្រោះ​អ្នក​គ្មាន​ជម្រើស​ច្រើន​ទេ ប៉ុន្តែ​ពេល​ខ្លះ អ្នក​ក៏​អាច​នឹង​រីករាយ ហើយ​ទទួល​បាន​គុណ​តម្លៃ​មិន​នឹង​ស្មាន​ដល់​ពី​អាហារ​ទាំងនោះ ខណៈ​ដែល​តម្លៃ​ខុស​គ្នា​រាប់​សិប​ដង​ក៏​មាន ។

ជាក់ស្តែង​ត្រឹមតែ​កាហ្វេ​ប្រេ​ន នៅ​រាជធានី​ភ្នំពេញ មួយ​កែវ កន្លែង​ខ្លះ​ត្រូវ​អស់​ជិត​៥​ដុល្លារ ទាំង​អត្រាពន្ធ​តម្លៃបន្ថែម ប៉ុន្តែ​កាហ្វេ​នៅ​តាម​ផ្សារ​នៅ​ក្នុងស្រុក​ខ្លះ​ត្រឹម ២០០០ រៀល ក៏​អាច​បាន​កាហ្វេ​ដ៏​ឈ្ងុយ​​មួយ​កែវ ផង​ដែរ ។

ទោះជា​យ៉ាងណា​ក៏​ដោយ​ចុះ អ្នក​ក៏​ត្រូវ​បរយ័ត្ន​អាហារ​មិន​មាន​អនាម័យ ព្រោះ​វា​អាច​ធ្វើ​អោយ​អ្នក​ឈឺ​បាន​។ ដូច្នេះ​អាហារ​ត្រូវ​តែ​ថោក ហើយ​មាន​អនាម័យ​៕

អត្ថបទ​ដោយ ៖ ស ផាត់

អត្ថបទសរសេរ ដោយ

កែសម្រួលដោយ