ខេត្តពោធិ៍សាត់ ៖ កម្មករក្រុមហ៊ុនភាពីម៉ិចចំនួន២នាក់ដែលស្លាប់ដោយសាររន្ទះបាញ់កាលពីថ្ងៃទី១៤ ឧសភា ឆ្នាំ២០១១ នៅស្រុកក្រគរ កន្លងមកនេះ បានទទួលថវិកាពីក្រុមហ៊ុនក្នុងសពម្នាក់ទទួលបាន៤លានរៀល ដើម្បីចូលរួមធ្វើបុណ្យ និងចិញ្ចឹមកូនដែលនៅរស់ ។
នៅថ្ងៃទី២០ ឧសភា ឆ្នាំ២០១១ លោកទី គឹមតុក តំណាងឱ្យលោកជំទាវជឹង សុភាព នាយិកាក្រុមហ៊ុនភាពីម៉ិច បាននាំយកថវិកាទាំងនេះទៅប្រគល់ជូនក្រុមគ្រួសារសពទាំងពីរដល់លំនៅឋាន ដោយមានការចូលរួមពីអាជ្ញាធរភូមិ-ឃុំ ស្រុក និងក្រុមគ្រួសារសាច់ញាតិរបស់សពផងដែរ។ សពទី១-ឈ្មោះលី ហៀង ភេទស្រី អាយុ៥២ឆ្នាំ នៅភូមិអន្លង់ព្រិច ឃុំអន្លង់វិល ស្រុកកណ្តៀង ខេត្តពោធិ៍សាត់ ជាស្ត្រីមេម៉ាយមានកូនប្រុសពីរនាក់ ម្នាក់ទៅធ្វើកម្មករនៅប្រទេសថៃ និងម្នាក់ទៀតបួសជាសង្ឃនៅក្នុងស្រុកកណ្តៀងនោះ ។ សពទី ២-ឈ្មោះទួន រឿន ភេទប្រុស អាយុ៣២ឆ្នាំ នៅភូមិព្រៃព្រាល ឃុំអញ្ចាញរូង ស្រុកបរិបូរណ៌ ខេត្តកំពង់ឆ្នាំង មានកូន៣នាក់ (ប្រុសម្នាក់ និងស្រី២នាក់) រស់នៅជាមួយជីដូនក្រីក្រលំបាកវេទនា ឯប្រពន្ធទៅធ្វើកម្មករនៅប្រទេសម៉ាឡេស៊ី រយៈពេល៣ខែមកហើយ មិនទាន់ដឹងថា ប្តីស្លាប់នៅឡើយទេ ។
លោកទី គឹមតុក មានប្រសាសន៍ថា ថវិកាទាំងនេះគឺជារបស់លោកជំទាវ ជឹង សុភាព នាយិកាក្រុមហ៊ុនភាពីម៉ិច ដែលលោកជំទាវជួយឧបត្ថម្ភសម្រាប់ធ្វើបុណ្យសព និងផ្គត់ផ្គង់ចិញ្ចឹមកូនដែលនៅរស់ ព្រមទាំងបានពាំនាំនូវការចូលរួមរំលែកទុក្ខពីសំណាក់លោកជំទាវចំពោះគ្រួសារសពផងដែរ ។ ថវិកាទាំងនេះចំណាយធ្វើបុណ្យ២លានរៀល និង២លានរៀលទៀតផ្ញើនៅធនាគារ ពេលត្រូវការទើបបើកដើម្បីធានាសុវត្ថិភាព ។ លោកផ្តាំផ្ញើឱ្យគ្រួសារសពទាំងពីរ ដកយកថវិកាទៅប្រើប្រាស់ឱ្យបានចំទិសដៅក្នុងការបង្កើតមុខរបររកស៊ី ឬចិញ្ចឹមកូនចៅរបស់សពដែលនៅរស់ឱ្យរៀនសូត្រជាដើម ។
លោកទី គឹមតុក បានសូមឱ្យប្រជាពលរដ្ឋក្នុងភូមិដែលមានកូនប្រុសស្រីអត់ការងារធ្វើ នាំគ្នាចូលបម្រើការងារក្នុងក្រុមហ៊ុនភាពីមិុចដែលទទួលបានប្រាក់ខែក្នុងមួយខែ៣៦០.០០០រៀល អង្ករ៣០គីឡូក្រាម ហើយអ្នកសកម្មការងារបន្ថែមជូន៣០.០០០រៀលទៀត ។ លោកបានជម្រាបជូនថា ក្រុមហ៊ុនបានសង់អគារសម្រាប់កម្មករស្នាក់នៅយា៉ងសមរម្យ និងបំពាក់ដោយឧបករណ៍ការពាររន្ទះបាញ់គ្រប់ការដ្ឋានទាំង២៥ ដែលឧបករណ៍មួយតម្លៃ៦.០០០ដុល្លារ ។ ពេលភ្លៀងធ្លាក់ឱ្យកម្មករឈប់សម្រាកពីការងារចូលជ្រកកន្លែងមានសុវត្ថិភាពដើម្បីគេចផុតពីរន្ទះដែលលោកជំទាវនាយិកាមានការសោកស្តាយបំផុត ។ លោកឱ្យដឹងដែរថា ចំពោះកម្មករម្នាក់ទៀតឈ្មោះសម្បុក ភេទស្រី អាយុ៤៣ឆ្នាំ នៅស្រុកបសេដ្ឋ ខេត្តកំពង់ស្ពឺ ដែលរន្ទះបាញ់ស្លាប់ដែរនោះ ក្រុមហ៊ុនបានជួលរថយន្តដឹកសព៤០០ដុល្លារ និងឧបត្ថម្ភថវិកា៤លានរៀលកាលពីប៉ុន្មានថ្ងៃមុនរួចមកហើយដែរ ។
តំណាងគ្រួសារសពនីមួយៗ បានថ្លែងអំណរគុណចំពោះលោកជំទាវ ជឹង សុភាព នាយិកាក្រុមហ៊ុនភាពីម៉ិច ដែលបានឧបត្ថម្ភថវិកាក្នុងសពម្នាក់៤លានរៀលនាពេលនេះ គឺជាការយកចិត្តទុកដាក់ខ្ពស់បំផុតធ្វើឱ្យកម្មករគ្រប់គ្នាក្នុងក្រុមហ៊ុនមានភាពកក់ក្តៅ និងលែងធ្វើចំណាកស្រុកដូចមុនទៀត ៕
ចែករំលែកព័តមាននេះ