ខេត្តស្វាយរៀង ៖ នៅថ្ងៃទី១៧ ខែវិច្ឆិកា ឆ្នាំ២០២៣នេះ កម្លាំងជំនាញ នៃស្នងការដ្ឋាននគរបាលខេត្តស្វាយរៀង សហការជាមួយកម្លាំងនគរបាលខេត្តកំពត និងកម្លាំងនាយកដ្ឋានព្រហ្មទណ្ឌ នៃក្រសួងមហាផ្ទៃ ធ្វើការបង្ក្រាប និងឃាត់ខ្លួនម្នាក់ ក្នុងចំណោមជនសង្ស័យ០២នាក់ ដែលប្រព្រឹត្តបទល្មើសលួចមានស្ថានទម្ងន់ទោស ដោយប្រើប្រាស់អាវុធ (ប្លន់) នៅខេត្តកំពត ។
ក្រុមចោរប្លន់ប្រដាប់អាវុធទាំង២នាក់ កាលពីវេលាម៉ោង១៦ និង១៥នាទី ថ្ងៃទី០៥ ខែវិច្ឆិកា ឆ្នាំ២០២៣ បានធ្វើសកម្មភាពភ្ជង់ប្លន់យកគ្រឿងអលង្ការ លុយ និងទូរសព្ទ នៅក្នុងភូមិដើមពោធិ៍ ឃុំអង្គសុភី ស្រុកកំពង់ត្រាច ខេត្តកំពត រួចរត់គេចខ្លួន ។
ជនសង្ស័យចំនួន០២នាក់ ត្រូវបានចាប់ខ្លួនម្នាក់នៅខេត្តកំពត និងម្នាក់ទៀត ត្រូវតាមចាប់ដល់ខេត្តស្វាយរៀង រួមមាន ៖
ទី១-ឈ្មោះ អេង កុសល អាយុ៣១ឆ្នាំ នៅភូមិព្រៃតាព្រឹត ឃុំស្ដេចគង់ខាងលិច ស្រុកបន្ទាយមាស និងចាប់យកវត្ថុតាងទូរសព្ទ១គ្រឿងជារបស់ជនរងគ្រោះ ។
ទី២-ឈ្មោះ កៅ ផា ហៅណៃ អាយុ២៧ឆ្នាំ រស់នៅភូមិអង្គសុភី ឃុំអង្គសុភី ស្រុកកំពង់ត្រាច ដែលត្រូវចាប់ខ្លួននៅខេត្តស្វាយរៀង ។
ជនសង្ស័យឈ្មោះ អេង កុសល បានឆ្លើយសារភាពថា រូបគេពិតជាបានធ្វើសកម្មភាពប្លន់ទ្រព្យសម្បត្តិជនរងគ្រោះ ពិតប្រាកដមែន ។
បច្ចុប្បន្ន ជនសង្ស័យទាំង២នាក់ ត្រូវបាននាំខ្លួនមកកាន់ស្នងការដ្ឋាននគរបាលខេត្តកំពត ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ