យុវជន២ក្រុមសរុបចំនួន៣០នាក់ ក្នុងនោះស្រីម្នាក់ ត្រូវបានសមត្ថកិច្ចឃាត់ខ្លួន រួចនាំយកមកសួរនាំ និងធ្វើកិច្ចសន្យាអប់រំឱ្យឪពុកម្តាយធានាត្រឡប់ទៅផ្ទះវិញរៀងៗខ្លួន ខណៈពេលពួកគេបង្កអសន្តិសុខនៅក្នុងក្រុងសៀមរាប។ ការចុះប្រតិបត្តិការបង្ក្រាបករណីនេះ
ខេត្តសៀមរាប ៖ យុវជន២ក្រុមសរុបចំនួន៣០នាក់ ក្នុងនោះស្រីម្នាក់ ត្រូវបានសមត្ថកិច្ចឃាត់ខ្លួន រួចនាំយកមកសួរនាំ និងធ្វើកិច្ចសន្យាអប់រំឱ្យឪពុកម្តាយធានាត្រឡប់ទៅផ្ទះវិញរៀងៗខ្លួន ខណៈពេលពួកគេបង្កអសន្តិសុខនៅក្នុងក្រុងសៀមរាប។ ការចុះប្រតិបត្តិការបង្ក្រាបករណីនេះធ្វើឡើងនៅថ្ងៃទី១៤ ខែវិច្ឆិកា ឆ្នាំ២០២៣ វេលាម៉ោង០០និង៣០នាទីយប់ នៅត្រង់ចំណុចមុខសណ្ឋាគារយីហោ «ម៉ៅ ហ៊ាន» ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប។
បើតាមលោកវរសេនីយ៍ឯក ដា ចំរើន អធិការនគរបាលក្រុងសៀមរាប បានប្រាប់ឱ្យដឹងតាមទូរស័ព្ទនៅវេលាម៉ោង១១និង៣៣នាទី ថ្ងៃទី១៦ ខែវិច្ឆិកា ឆ្នាំ២០២៣នេះថា យុវជនទាំង២ក្រុមនោះបានបង្កហិ.ង្សា ដោយយកដុំថ្ម និងមួកសុវត្ថិភាពគប់គ្នាទៅវិញទៅមក បង្កឱ្យមានការភ្ញាក់ផ្អើល តែមិនបណ្តាលឱ្យភាគីណាម្នាក់រងរបួសស្នាមនោះទេ ក្រោយពីធ្វើសកម្មភាពរួចហើយ ក្រុមយុវជនទាំងនោះនាំគ្នារត់គេចខ្លួនបាត់អស់ស្រមោល។
លោកបន្តថា ក្រោយពីទទួលបានព័ត៌មានភ្លាម កម្លាំងនៃអធិការដ្ឋាននគរបាលក្រុងសៀមរាប ដោយចូលរួមសហការពីកម្លាំងនៃការិយាល័យព្រហ្មទណ្ឌកម្រិតស្រាល ព្រមទាំងកម្លាំងការិយាល័យអន្តរាគមន៍ និងតម្រួតបទបញ្ជា បានចុះស្រាវជ្រាវ និងឈានដល់នាំខ្លួនយុវជនទាំង០២ក្រុម ដែលមានចំនួនសរុប៣០នាក់ ក្នុងនោះស្រីម្នាក់ មកធ្វើការសួរនាំនៅអធិការដ្ឋាននគរបាលក្រុងសៀមរាប។
នៅចំពោះមុខសមត្ថកិច្ច យុវជនទាំង២ក្រុមខាងលើនេះ បានឆ្លើយសារភាពថា «ពួកខ្លួនមានជម្លោះពាក្យសម្តីជាមួយគ្នា ហើយក៏យកដុំថ្ម និងមួកសុវត្ថិភាពគប់គ្នាទៅវិញទៅមកពិតមែន»។ បច្ចុប្បន្ន យុវជនទាំង២ក្រុមនេះ ត្រូវបានកម្លាំងនគរបាលព្រហ្មទណ្ឌនៃអធិការដ្ឋាននគរបាលក្រុងសៀមរាប ឱ្យធ្វើកិច្ចសន្យាអប់រំណែនាំ និងឱ្យឪពុកម្តាយមកធានាត្រឡប់ទៅផ្ទះវិញរៀងៗខ្លួនអស់ហើយ៕
ចែករំលែកព័តមាននេះ