ប្រធានកាយសម្ព័ន្ធអាណត្តិថ្មី ជំរុញដល់អ្នកបន្តវេនខិតខំពង្រឹងសមត្ថភាពបន្ថែមត្រៀមប្រកួតកីឡាយុវជនអាស៊ី២០២៩
- ភ្នំពេញ
រាជធានីភ្នំពេញ ៖ ឯកឧត្តមទេសរដ្ឋមន្ត្រីថោង ខុន ប្រធានគណៈកម្មាធិការជាតិអូឡាំពិកកម្ពុជា
រាជធានីភ្នំពេញ ៖ ឯកឧត្តមទេសរដ្ឋមន្ត្រីថោង ខុន ប្រធានគណៈកម្មាធិការជាតិអូឡាំពិកកម្ពុជា ដែលទើបតែត្រូវបានតែងតាំងជាប្រធានសហព័ន្ធកីឡាកាយសម្ព័ន្ឋអាណត្តិថ្មីឆ្នាំ២០២៣-២០២៧ បានធ្វើការក្រើនរម្លឺកទៅដល់សមាជិកសហព័ន្ធទាំងអស់ ក៏ដូចជាកីឡាករ កីឡាការិនីដែលជាយុវជនបន្តវេន ត្រូវខិតខំប្រឹងប្រែងហ្វឹកហាត់បន្ថែមទៀត ដើម្បីឈានឆ្ពោះទៅដណ្ដើមជ័យជម្នះ នៅលើឆាកអន្តរជាតិ ពិសេសការប្រកួតកីឡាយុវជនអាស៊ីឆ្នាំ២០២៩ដែលកម្ពុជាទទួលធ្វើជាម្ចាស់ផ្ទះ។
សហព័ន្ធកីឡាកាយសម្ព័ន្ធកម្ពុជា បានធ្វើមហាសន្និបាតបោះឆ្នោតបញ្ចប់អាណត្តិចាស់ទី៦ និងជ្រើសតាំងអ្នកបន្តវេនអាណត្តិថ្មីលើកទី៧ឆ្នាំ២០២៣-២០២៧នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីរសៀលថ្ងៃទី១៤ខែវិច្ឆិកា ឆ្នាំ២០២៣ ដោយឯកឧត្តមទេស រដ្ឋមន្ត្រីថោង ខុន ទទួលបានសំឡេងគាំទ្រ១០០%ដើម្បីបន្តធ្វើជាប្រធានសហព័ន្ធដឹកនាំ ។ ក្នុងនោះក៏មានវត្តមានសមាជិកគណៈកម្មាធិការប្រតិបត្តិទាំងអាណត្តិចាស់ និងថ្មី១០នាក់បន្ថែមទៀត។
លោកណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានលើកឡើងថា កាលពីអាណត្តិចាស់កន្លងទៅ គឺជាអាណត្តិដ៏ជោគជ័យ ដែលកម្ពុជាធ្លាប់ដណ្ដើមបានមេដាយប្រាក់និងសំរឹទ្ធនៅក្នុងព្រឹត្តិការណ៍ប្រកួតកីឡាស៊ីហ្គេមឆ្នាំ២០២៣ នៅពេលកម្ពុជាទទួលធ្វើជាម្ចាស់ផ្ទះ ។ ក្រោមការដឹកនាំរបស់ឯកឧត្តមបណ្ឌិតថោង ខុន ប្រធានសហព័ន្ធបានជំរុញទៅដល់កីឡាករ កីឡាការិនីកាយសម្ព័ន្ធកម្ពុជាខិតខំប្រឹងប្រែងហ្វឹកហាត់បន្ថែមរហូតឈានទៅដណ្ដើមបានមេដាយមាសជើងឯកអាស៊ីលើកទី៨នៅប្រទេសម៉ុងហ្គោលីកាលពីពេលថ្មីៗកន្លងទៅនោះ ។
ទន្ទឹមគ្នានេះដែរ ក្នុងនាមប្រធានសហព័ន្ធអាណត្តិថ្មី ឯកឧត្តមថោង ខុនបានជំរុញទៅដល់សមាជិកគណៈកម្មការប្រតិបត្តិអាណត្តិថ្មីទាំងអស់ ត្រូវរួមគ្នាធ្វើការបន្ថែមទៀតទាំងការបណ្ដុះបណ្ដាលធនធានមនុស្ស កីឡាករកីឡាការិនី គ្រូបង្វឹក មន្ត្រីបច្ចេកទេសឈានទៅដល់កម្រិតអន្តរជាតិ ។ ជាពិសេសក្នុងការស្វែងរកលទ្ធភាពប្រកួតជាលក្ខណៈអន្តរជាតិឱ្យបានច្រើន ដើម្បីបង្កើនសមត្ថភាព និងពង្រឹងបច្ចេកទេសកីឡាករ កីឡាការិនីក៏ដូចជាធនធានបន្តវេន សម្រាប់ត្រៀមប្រកួតនៅលើឆាកអន្តរជាតិនានា ពិសេសសម្រាប់ត្រៀមប្រកួតកីឡាយុវជនអាស៊ីឆ្នាំ២០២៩នៅកម្ពុជា៕
ចែករំលែកព័តមាននេះ