អតីតកីឡាកាសដ៏ល្បីម្នាក់ ប្រឈមជាប់ពន្ធនា គារ២៥ឆ្នាំ រឿងបង្កគ្រោះថ្នាក់ចរាចរណ៍
សហរដ្ឋអាមេរិក ៖ អតីតអ្នកកីឡាកាសដ៏ល្បីរបស់ WWE ម្នាក់ ប្រឈមមុខនឹងការជាប់ពន្ធនាគារ
សហរដ្ឋអាមេរិក ៖ អតីតអ្នកកីឡាកាសដ៏ល្បីរបស់ WWE ម្នាក់ ប្រឈមមុខនឹងការជាប់ពន្ធនាគារ
សហរដ្ឋអាមេរិក ៖ អតីតអ្នកកីឡាកាសដ៏ល្បីរបស់ WWE ម្នាក់ ប្រឈមមុខនឹងការជាប់ពន្ធនាគាររហូតដល់២៥ឆ្នាំ បន្ទាប់ពីបានសារភាពថា មានកំហុសក្នុងការសម្លាប់ជនចូលនិវត្តន៍ម្នាក់ នៅក្នុងគ្រោះថ្នាក់ចរាចរណ៍ដ៏រន្ធត់មួយ។ នេះបើយោងតាមប្រភពពី The Sun ចេញផ្សាយកាលពីថ្ងៃទី១៤ ខែវិច្ឆិកា ឆ្នាំ២០២៣។
អតីតអ្នកកីឡាកាស «Sunny» ដែលមានឈ្មោះពិតថា Tammy Lynn Sytch បានបុកពីក្រោយរថយន្តលោក Julian Lasseter កាលពីឆ្នាំមុន ដែលហេតុការណ៍នេះ កើតឡើងនៅរដ្ឋផ្លរីដា (Florida) ។ នៅពេលនោះ សាក្សីបានរាយការណ៍ថា Sunny បានបើកបររថយន្តម៉ាក Mercedes របស់ខ្លួនក្នុងល្បឿនលឿន ហើយបុកពីក្រោយរថយន្តលោក Julian ដែលឈប់ចាំភ្លើងស្តុបពេញទំហឹង។ លោក Julian អាយុ៧៥ឆ្នាំ ត្រូវបានបញ្ជូនទៅមន្ទីរពេទ្យភ្លាមៗ ប៉ុន្តែជាអកុសលលោកត្រូវបានបញ្ជាក់ថា ស្លាប់បាត់បង់ជីវិត។
ការធ្វើតេស្តពិនិត្យជាតិពុល (Toxicology Tests) បន្ទាប់ពីគ្រោះថ្នាក់បានរកឃើញថា Sunny មានជាតិអាល់កុលក្នុងឈាមដល់ .២៨០ ច្រើនជា៣ដងកន្លះ នៃដែនកំណត់ច្បាប់ .០៨ ដែលត្រូវបានកំណត់ដោយច្បាប់រដ្ឋផ្លរីដា ខណៈដែលជនល្មើសក៏បានបើកបរដោយគ្មានប័ណ្ណបើកបរត្រឹមត្រូវថែមទៀត។
ដំបូងឡើយ អតីតអ្នកកីឡាកាស WWE វ័យ៥០ឆ្នាំរូបនេះ បានបដិសេធរាល់កំហុស ប៉ុន្តែក្រោយមកបានសារភាពកំហុស ចំពោះការចោទប្រកាន់ជាច្រើន។ ការចោទប្រកាន់រួមមាន DUI Manslaughter បណ្តាលឱ្យមានអ្នកស្លាប់ពេលកំពុងប្រតិបត្តិការយានជំនិះ ដែលត្រូវដកហូតអាជ្ញាប័ណ្ណ ៤ ករណី DUI បណ្តាលឱ្យមានអ្នករងរបួស និង ៣ករណី DUI បណ្តាលឱ្យខូចខាតទ្រព្យសម្បត្តិ។ DUI Manslaughter គឺជាបទឧក្រិដ្ឋកម្រិតទី៣ ដែលកាត់ទោសជាប់គុករហូតដល់១៥ឆ្នាំ នៅរដ្ឋផ្លរីដា។ វាក៏ត្រូវបានរាយការណ៍ថា Sunny ក៏រងការចោទប្រកាន់ DUI យ៉ាងហោច ៦ករណីផ្សេងទៀត មុនពេលកើតមានឧប្បត្តិហេតុគ្រោះថ្នាក់ចរចរាណ៍ ក្នុងនោះរួមទាំង ការចោទប្រកាន់នៅរដ្ឋញូវជឺស៊ី (New Jersey) សម្រាប់ការបើកបរខុសគន្លងផ្លូវ។
គិតចាប់តាំងពីឆ្នាំ ២០១៩ មក Sunny ត្រូវបានចាប់ខ្លួនពីបទបើកបរក្រោមស្ថានភាពស្រវឹងលើកទី៦។ នៅឆ្នាំ ២០១២ Sunny បានជាប់ពន្ធនាគាររយៈពេល១១៤ថ្ងៃ បន្ទាប់ពីត្រូវបានចាប់ខ្លួន៥ដងក្នុងរយៈពេល៤សប្តាហ៍។ Sunny ថែមទាំងបានរត់គេចពីប៉ូលិសអស់រយៈពេលកន្លះឆ្នាំ ពេលធានានៅក្រៅឃុំ បន្ទាប់ពីមិនបានចូលខ្លួនបំភ្លឺសំណុំរឿងរបស់តុលាការ ដែលពាក់ព័ន្ធនឹងការចោទប្រកាន់ពីបទបើកបរក្នុងស្ថានភាពស្រវឹង។
អតីតអ្នកកីឡាកាសរូបនេះ ក៏ត្រូវបានចាប់ខ្លួនជាច្រើនដងក្នុងរយៈពេលប៉ុន្មានឆ្នាំចុងក្រោយនេះ ដោយបទចោទប្រកាន់ផ្សេងទៀត ហើយធ្លាប់ក៏ត្រូវបានចោទប្រកាន់ពីបទកាន់កាប់អាវុធខុសច្បាប់ និងការគំរាមកំហែងភេរវកម្ម។ Sunny ត្រូវបានគេជឿថា ស្ថិតក្រោមឥទ្ធិពលគ្រឿងញៀន និងគ្រឿងស្រវឹង។
គួររំលឹកថា Sunny បានចាប់ផ្តើមអាជីពជាមួយ WWE ក្នុងនាមអ្នកអត្ថាធិប្បាយ ក្រោមឈ្មោះ Tamara Murphy ។ មិនយូរប៉ុន្មាន ក៏ត្រូវបានស្គាល់កាន់តែច្បាស់ថា Sunny ដោយធ្វើពិធីករកម្មវិធីផ្ទាល់ខ្លួន និងក្លាយជាអ្នកប្រកាសលើសង្វៀនផងដែរ។ Sunny បានក្លាយជាបុគ្គលដ៏ពេញនិយមបំផុតនៅ WWE ហើយត្រូវបានគេចាត់ទុកថា Diva ដំបូងបង្អស់របស់ក្រុមហ៊ុននេះ។ នៅឆ្នាំ ២០១១ Sunny ត្រូវបានបញ្ចូលឈ្មោះទៅក្នុង Hall of Fame សម្រាប់ផ្តល់កត្តិយកដល់បុគ្គលឆ្នើម និងលេចធ្លោរបស់ WWE។ យ៉ាងណាមិញ នៅខែតុលា ឆ្នាំ ២០១៨ Sunny បានប្រកាសចូលនិវត្តន៍ ដើម្បីរស់នៅក្នុងជីវិតឯកជន៕
ចែករំលែកព័តមាននេះ