រាជធានីភ្នំពេញ ៖ អគារតម្កល់សពនិងឧបករណ៍រក្សាសពដ៏ទំនើបមួយ ដែលទើបតែបង្កើតឡើងនៅក្នុងមន្ទីរពេទ្យមិត្តភាពខ្មែរ-សូវៀត ត្រូវបានសម្ពោធបើកឱ្យប្រើប្រាស់ជាផ្លូវការនាព្រឹកថ្ងៃទី២០ ឧសភា ក្រោមអធិបតីភាពលោកធា គ្រុយ រដ្ឋលេខាធិការក្រសួងសុខាភិបាល ដោយមានការអញ្ជើញចូលរួម ពីសំណាក់ភ្ញៀវជាតិនិងអន្តរជាតិ
រាជធានីភ្នំពេញ ៖ អគារតម្កល់សពនិងឧបករណ៍រក្សាសពដ៏ទំនើបមួយ ដែលទើបតែបង្កើតឡើងនៅក្នុងមន្ទីរពេទ្យមិត្តភាពខ្មែរ-សូវៀត ត្រូវបានសម្ពោធបើកឱ្យប្រើប្រាស់ជាផ្លូវការនាព្រឹកថ្ងៃទី២០ ឧសភា ក្រោមអធិបតីភាពលោកធា គ្រុយ រដ្ឋលេខាធិការក្រសួងសុខាភិបាល ដោយមានការអញ្ជើញចូលរួម ពីសំណាក់ភ្ញៀវជាតិនិងអន្តរជាតិ មានទាំងតំណាងស្ថានទូតសំខាន់ៗប្រចាំនៅព្រះរាជាណាចក្រកម្ពុជាចូលរួមផងដែរ ។
លោកវេជ្ជបណ្ឌិតសាយ សេងលី នាយកមន្ទីរពេទ្យមិត្តភាពខ្មែរ-សូវៀតបានមានប្រសាសន៍ថា អគារតម្កល់សពថ្មីដែលទើបនឹងបង្កើតនេះមានបន្ទប់ទទួលភ្ញៀវ បន្ទប់អប់ សាកសព បន្ទប់តម្កល់សព បន្ទប់ទុកដាក់ឱសថ។ នៅខាងក្រោយអគារ មានទូក្លាស្សេសពតាមលក្ខណៈបច្ចេកទេសថ្មីមួយ ដែលអាចដាក់សពបាន៨ ហើយរក្សាទុកបានយូររយៈពេលពី១សប្តាហ៍ទៅដល់មួយឆ្នាំ ។ ជាងនេះទៅទៀតទីធ្លា តម្កល់សពមានលក្ខណៈធំទូលាយអាចតម្កល់សពបានរាប់រយសម្រាប់ពេលមានគ្រោះអាសន្នផ្សេងៗកើតឡើង ។
លោកវេជ្ជបណ្ឌិតមានប្រសាសន៍បន្តថា ការរៀបចំកន្លែងតម្កល់សពនៅក្នុងមន្ទីរពេទ្យមិត្តភាពខ្មែរ-សូវៀត ក៏ជាផ្នែកមួយរបស់មន្ទីរពេទ្យដែលបានសហការជាមួយក្រុមហ៊ុនរក្សាសាកសពអន្តរជាតិនៃប្រទេសអូស្ត្រាលី ដោយសារក្រុមហ៊ុននេះមានបទពិសោធន៍ជាមួយបណ្តាប្រទេសផ្សេងៗ ដូចជាប្រទេសថៃ ហ្វ៊ីលីពីន ឡាវ អូស្ត្រាលី ម៉ាឡេស៊ី ។ល។ លោកវេជ្ជបណ្ឌិតសាយ សេងលី បន្តទៀតថា មុនពេលមន្ទីរពេទ្យចាប់ផ្តើមទទួលសេវាកម្មរៀបចំកន្លែងតម្កល់សព គឺមន្ទីរពេទ្យបានបញ្ជូនវេជ្ជបណ្ឌិត២រូបទៅបណ្តុះបណ្តាលនៅប្រទេសអូស្ត្រាលី ដើម្បីមានបទពិសោធន៍ថ្មីយកមកអនុវត្តនៅមន្ទីរពេទ្យមិត្តភាពខ្មែរ-សូវៀតយើងនេះ ។
លោក Clive Allison តំណាងក្រុមហ៊ុនដំឡើងឧបករណ៍តម្កល់សពមកពីប្រទេសអូស្ត្រាលី មានប្រសាសន៍ថា ក្រុមហ៊ុនរបស់លោកបានដំណើរការជាង១០០ឆ្នាំមកហើយ ហើយក្រុមហ៊ុននេះក៏មានឈ្មោះបោះសំឡេងនៅលើពិភពលោកផងដែរពាក់ព័ន្ធនឹងបញ្ហាតម្កល់សពនិងក្លាស្សេសពផ្ញើពីប្រទេសមួយទៅប្រទេសមួយទៀត ។
បន្ទាប់ពីស្តាប់របាយការណ៍របស់លោកនាយកមន្ទីរពេទ្យមិត្តភាពខ្មែរ-សូវៀតក៏ដូចជាស្តាប់នូវប្រសាសន៍រៀបរាប់របស់លោក Clive Allison រួចមក លោកធា គ្រុយ រដ្ឋលេខាធិការក្រសួងសុខាភិបាលមានប្រសាសន៍ថា ការដំឡើងឧបករណ៍ទំនើបសម្រាប់តម្កល់សពនៅមន្ទីរពេទ្យមិត្តភាពខ្មែរ-សូវៀតនេះគឺជាកន្លែងគំរូដ៏ល្អមួយដែលមានលក្ខណៈតាមស្តង់ដាអន្តរជាតិ ហើយនៅស្រុកខ្មែរយើងទើបតែមាននៅទីនេះទេ ។
ឆ្លៀតក្នុងឱកាសនេះផងដែរ លោកធា គ្រុយ ក៏បានមានប្រសាសន៍ថ្លែងអំណរគុណចំពោះក្រុមហ៊ុន ដែលបានមកវិនិយោគជួសជុលអគារតម្កល់សពនិងដំឡើងឧបករណ៍តម្កល់សពតាមបច្ចេកវិទ្យាទំនើប ។ នេះជាតម្រូវការចាំបាច់មួយរបស់កម្ពុជាយើង ដែលទើបតែមានឧបករណ៍តម្កល់សពទុកមានរយៈពេលយូរ ៕
ចែករំលែកព័តមាននេះ