រាជធានីភ្នំពេញ ៖ មានការភ្ញាក់ផ្អើលឆោឡោដល់អាណាព្យាបាលសិស្សវិទ្យាល័យទួលទំពូង នៅវេលាព្រឹកថ្ងៃទី២០ ឧសភា ២០១១ បន្ទាប់ពីមានយុវសិស្សប្រុសម្នាក់យកទូរស័ព្ទដៃលួចថតរូបភាពសិស្សស្រីដែលចូលក្នុងបង្គន់អនាម័យ ។ រឿងរ៉ាវអសីលធម៌នៅក្នុងសាលារៀនបែបនេះមិនមានការប្តឹងប្តល់គ្នាវែងឆ្ងាយឡើយ
រាជធានីភ្នំពេញ ៖ មានការភ្ញាក់ផ្អើលឆោឡោដល់អាណាព្យាបាលសិស្សវិទ្យាល័យទួលទំពូង នៅវេលាព្រឹកថ្ងៃទី២០ ឧសភា ២០១១ បន្ទាប់ពីមានយុវសិស្សប្រុសម្នាក់យកទូរស័ព្ទដៃលួចថតរូបភាពសិស្សស្រីដែលចូលក្នុងបង្គន់អនាម័យ ។
រឿងរ៉ាវអសីលធម៌នៅក្នុងសាលារៀនបែបនេះមិនមានការប្តឹងប្តល់គ្នាវែងឆ្ងាយឡើយ ដោយសារមាតាបិតារបស់សិស្សកំហូចម្នាក់ដែលយកទូរស័ព្ទទៅលួចថតសិស្សនារីនៅក្នុងបន្ទប់អនាម័យនេះបានសុំទោសទៅសិស្សនារីដែលរងការខ្មាសអៀន ព្រោះគេលួចថតរូបខ្លួននៅក្នុងបន្ទប់អនាម័យ ។ ជាងនេះទៅទៀត អាណាព្យាបាលទាំងសងខាងក៏បានសុំទោសគ្នាទៅវិញទៅមក ហើយមានលោកនាយកវិទ្យាល័យទួលទំពូងជួយផ្សះផ្សាផងដែរ ។
ជុំវិញបញ្ហាខាងលើនេះ មានលិចឮព័ត៌មានធ្លាយចេញពីក្រុមយុវសិស្សរៀននៅវិទ្យាល័យទួលទំពូងថា មានកូនសិស្សប្រុសៗ ខូចៗ ជាកូនអ្នកមានប្រាក់ ឬក៏ជាកូនអ្នកមានបុណ្យស័ក្តិក្នុងសង្គម លួចដាក់កាមេរ៉ាចាប់រូបភាពក្នុងបន្ទប់ទឹករបស់យុវសិស្សនារី។ សមត្ថកិច្ចនគរបាលប៉ុស្តិ៍ទួលទំពូងទី១ បានបង្ហើបថា ពិតជាមានការលួចថតរូបសិស្សស្រីនៅក្នុងបន្ទប់ទឹកពិតប្រាកដមែន ប៉ុន្តែខាងសាលា (នាយក) សុំផ្សះផ្សានៅត្រឹមសាលាបានហើយ ។ ហេតុដូច្នេះទើបសមត្ថកិច្ចពុំមានចាត់វិធានការអ្វីទាំងអស់ ។ ចំពោះបញ្ហានេះមានការរិះគន់ថា មិនគួរអនុញ្ញាតឱ្យសិស្សខិលខូចរួចខ្លួនស្រួលនោះទេ គួរទុកអប់រំតាមផ្លូវច្បាប់ ដើម្បីកុំឱ្យសិស្សឯទៀតយកគំរូតាម ៕
ចែករំលែកព័តមាននេះ