ADផ្ទាំងផ្សព្វផ្សាយពាណិជ្ជកម្ម

Picture

FIFA បើក​ការិយាល័យ​នៅ​ប្រទេស​ឥណ្ឌូ​នេ​ស៊ី​ដាក់​ឈ្មោះ​ថា «​មជ្ឈមណ្ឌល​អាស៊ី​»

8 ខែ មុន

ឥណ្ឌូ​នេ​ស៊ី ៖ សហព័ន្ធ​កីឡាបាល់ទាត់​ពិភពលោក ដែល​ហៅ​កាត់​ថា FIFA សហការ​ជាមួយនឹង​

ឥណ្ឌូ​នេ​ស៊ី ៖ សហព័ន្ធ​កីឡាបាល់ទាត់​ពិភពលោក ដែល​ហៅ​កាត់​ថា FIFA សហការ​ជាមួយនឹង​រដ្ឋាភិបាល​ប្រទេស​ឥណ្ឌូ​នេ​ស៊ី បាន​បើក​សម្ពោធ​ការិយាល័យ​ដែល​មានឈ្មោះ​ថា Asia Hub ឬ មជ្ឈមណ្ឌល​អាស៊ី នៅ​ទីក្រុង​ហ្សា​កា​តា កាលពី​ថ្ងៃ​ទី​១០ ខែវិច្ឆិកា កន្លង​ទៅ​។

ថ្លែង​នៅ​ក្នុង​ពិធី​សម្ពោធ​នោះ ប្រធានាធិបតី​ឥណ្ឌូ​នេ​ស៊ី លោក Joko Widodo បាន​លើក​ឡើង​ថា ការ​សម្រេចចិត្ត​របស់ FIFA ក្នុង​ការ​សាងសង់​ការិយាល័យ​នៅ​ទីក្រុង​ហ្សា​កា​តា​បាន​បង្ហាញ​ថា ឥណ្ឌូ​នេ​ស៊ី​មាន​សក្តានុពល​ដ៏​ធំ​ក្នុង​ការ​ជំរុញ​ការ​អភិវឌ្ឍន៍​កីឡាបាល់ទាត់​របស់​ខ្លួន​នៅ​កម្រិត​ពិភពលោក​។

ជាមួយ​គ្នា​នោះ លោក​ប្រធានាធិបតី​ក៏​បាន​បញ្ជាក់​ពី​ការ​ប្តេជ្ញា​ចិត្ត​របស់​រដ្ឋាភិបាល​ចំពោះ FIFA ក្នុង​ការ​តែងតែ​គាំទ្រ និង​សម្រួល​ដល់​សហព័ន្ធ​ក្នុង​ការ​ធ្វើ​ឱ្យ​ប្រសើរ​ឡើង​នូវ​សុចរិត​ភាព និង​គុណភាព​នៃ​កីឡាបាល់ទាត់​ឥណ្ឌូ​នេ​ស៊ី​។ បន្ថែម​ពី​នេះ​ទៀត លោក​ប្រធានាធិបតី​បាន​បន្ទរ​ពី​ការ​ត្រៀមខ្លួន​របស់​ប្រទេស​ឥណ្ឌូ​នេ​ស៊ីក្នុង​ការ​ធ្វើការ​រួម​គ្នា ដើម្បី​ការ​អភិវឌ្ឍ​ហេដ្ឋារចនាសម្ព័ន្ធ​កីឡា ក៏​ដូច​ជា​បណ្តុះបណ្តាល ការ​អប់រំ និង​ការ​អភិវឌ្ឍ​កីឡាករ​បាល់ទាត់​វ័យក្មេង​របស់​ឥណ្ឌូ​នេ​ស៊ី​។

លោក Gianni Infantino ប្រធាន FIFA បាន​ថ្លែង​ថា ការិយាល័យ​មួយ​ជាន់​នេះ អាច​ផ្ទុក​មនុស្ស​បាន​ប្រហែល ២០-៣០​នាក់ ប៉ុន្តែ​ទោះជា​យ៉ាងណា​ក៏​ដោយ ការិយាល័យ​នេះ គ្រោង​នឹង​ពង្រីក​បន្ថែម​ទៀត ព្រោះ​ឥណ្ឌូ​នេ​ស៊ី​ក៏​ជា​ប្រទេស​ដ៏​ធំ​មួយ​ផង​ដែរ​។ ឥណ្ឌូ​នេ​ស៊ី ក៏​ត្រូវ​បាន​ចាត់​ទុក​ថា​ជា​តំបន់​ដ៏​សំខាន់​មួយ​នៅ​ក្នុង​តំបន់​អាស៊ី​អាគ្នេយ៍ និង​អាស៊ី​បូព៌ា ដោយ​សង្ឃឹមថា អាច​មាន​ឥទ្ធិពល​លើ​ការ​អភិវឌ្ឍន៍​បាល់ទាត់​ក្នុង​តំបន់​។

ក្រៅពី​ការ​បើក​ការិយាល័យ​នៅ​ឥណ្ឌូ​ណេ​ស៊ី FIFA ក៏​បាន​ជួយ​រដ្ឋាភិបាល​ឥណ្ឌូ​នេ​ស៊ីក្នុង​ការ​សាងសង់​មជ្ឈមណ្ឌល​ហ្វឹកហាត់​ក្រុមបាល់ទាត់​ជម្រើសជាតិ​នៅ​រដ្ឋធានី​ថ្មី ដែល​មានឈ្មោះ​ថា នូ​សាន​តា​រ៉ា ជាមួយនឹង​ថវិកា​ប្រមាណ​៥.៤​លាន​ដុល្លារ​។ មជ្ឈមណ្ឌល​ហ្វឹកហាត់​នេះ មាន​គោលបំណង​សម្រុះសម្រួល និង​ពង្រឹង​ជំនាញ​របស់​កីឡាករ​បាល់ទាត់​វ័យក្មេង​ឥណ្ឌូ​នេ​ស៊ី ដើម្បី​ចូលរួម​ប្រកួត​លំដាប់​អន្តរជាតិ ដោយ​ត្រូវ​បាន​សាងសង់​នៅ​លើ​ផ្ទៃដី ៣៤.៥​ហិ​កតា ជាមួយ​ទីលាន​ចំនួន​៨ និង​ឧបករណ៍​ជំនួយ​ទំនើប​ផ្សេង​ៗ​ជា​ច្រើន​ទៀត​៕ (​ប្រភព​ពី ANTARA News)

អត្ថបទសរសេរ ដោយ

កែសម្រួលដោយ