ខេត្តព្រះសីហនុ ៖ សហព័ន្ធកីឡាទូកក្តោងកម្ពុជា ទទួលមជ្ឈមណ្ឌលជាតិហ្វឹកហ្វឺនកីឡាទូកក្តោង ដែលមានទីតាំងនៅខេត្តព្រះសីហនុ សម្រាប់ការបណ្តុះបណ្តាលមន្ត្រីបច្ចេកទេស ពិសេសគឺជាទីតាំងសម្រាប់បម្រើដល់ការរៀបចំការប្រកួតកីឡាទូកក្តោងទាំងកម្រិតថ្នាក់ជាតិ និងអន្តរជាតិ ព្រមទាំងការផ្សព្វផ្សាយអំពីប្រភេទកីឡាទូកក្តោង ទៅដល់ប្រជាជនកម្ពុជា…
ខេត្តព្រះសីហនុ ៖ សហព័ន្ធកីឡាទូកក្តោងកម្ពុជា ទទួលមជ្ឈមណ្ឌលជាតិហ្វឹកហ្វឺនកីឡាទូកក្តោង ដែលមានទីតាំងនៅខេត្តព្រះសីហនុ សម្រាប់ការបណ្តុះបណ្តាលមន្ត្រីបច្ចេកទេស ពិសេសគឺជាទីតាំងសម្រាប់បម្រើដល់ការរៀបចំការប្រកួតកីឡាទូកក្តោងទាំងកម្រិតថ្នាក់ជាតិ និងអន្តរជាតិ ព្រមទាំងការផ្សព្វផ្សាយអំពីប្រភេទកីឡាទូកក្តោង ទៅដល់ប្រជាជនកម្ពុជា និងបរទេស ដើម្បីមកសាកល្បង និងចូលរួមហ្វឹកហាត់កីឡាទូកក្តោង ។
ពិធីប្រគល់-ទទួលមជ្ឈមណ្ឌលជាតិហ្វឹកហ្វឺនកីឡាទូកក្តោងនេះ ធ្វើឡើងនារសៀលថ្ងៃទី១០ ខែវិច្ឆិកា ឆ្នាំ២០២៣ ក្រោមអធិបតីភាពលោក សោម សុទ្ធរិទ្ធិពង្ស អគ្គលេខាធិការសហព័ន្ធកីឡាទូកក្តោងកម្ពុជា តំណាងលោក ថាង ហ្គោដុន ប្រធានសហព័ន្ធ និងលោក ថោង រដ្ឋសក្តិ អនុប្រធានអចិន្ត្រៃយ៍ នៃសហព័ន្ធកីឡាទូកក្តោងកម្ពុជា លោក Edward Lee នាយកប្រតិបត្តិក្រុមហ៊ុន Prince Real Estate Group និងលោក Jimmy He ប្រធានគ្រប់គ្រងក្រុមហ៊ុន Canopy Sand Development ជាបុត្រសម្ពន្ធរបស់ក្រុមហ៊ុន Prince Holding Group ។
មជ្ឈមណ្ឌលជាតិហ្វឹកហ្វឺនកីឡាទូកក្តោងនេះ គឺជាការឧបត្ថម្ភរបស់ក្រុមហ៊ុន CANOPY SAND Development ជូនដល់សហព័ន្ធកីឡាទូកក្តោងកម្ពុជា ដោយបានចាប់ផ្តើមសាងសង់ ឡើងនៅថ្ងៃទី១ ខែកក្កដា ឆ្នាំ២០២៣ លើផ្ទៃដីទំហំ៥០០ម៉ែត្រការ៉េ ដោយសំណង់អាគារនេះ មានកំពស់មួយជាន់មាន៤បន្ទប់ និងមានឃ្លាំងសម្រាប់ទុកសម្ភារៈ ទូកក្តោងចំនួន១ ស្ថិតនៅក្នុងតំបន់អភិវឌ្ឍន៍ Bay of Light ស្ថិតក្នុងឃុំរាម ស្រុកព្រៃនប់ ខេត្តព្រះសីហនុ និងបានសាងសង់រួចរាល់ជាស្ថាពរ នៅថ្ងៃទី៥ ខែវិច្ឆិកា ឆ្នាំ២០២៣ ។
សមិទ្ធផល នៃមជ្ឈមណ្ឌលជាតិហ្វឹកហ្វឺនកីឡាទូកក្តោងនេះ គឺជាការអភិវឌ្ឍបោះជំហានទៅមុខដ៏ធំមួយរបស់សហព័ន្ធកីឡាទូកក្តោងកម្ពុជា ក្នុងការអភិវឌ្ឍ និងបណ្តុះបណ្តាលវិស័យកីឡាទូកក្តោងនៅកម្ពុជា ដោយទីតាំងនេះ នឹងក្លាយទៅជាទីតាំង នៃការបណ្តុះបណ្តាលក្រុមកីឡាករ កីឡាការិនីទូកក្តោងកម្រិតខ្ពស់ និងកីឡាករ កីឡាការិនីថ្នាល ហើយក៏ជាទីតាំងសម្រាប់ការបណ្តុះបណ្តាល មន្ត្រីបច្ចេកទេសរៀបចំការប្រកួត ចៅក្រម និងគ្រូបង្វឹកកម្រិតជាតិ និងអន្តរជាតិផងដែរ ជាពិសេស គឺជាទីតាំងសម្រាប់បម្រើដល់ការរៀបចំការប្រកួតកីឡាទូកក្តោង ទាំងកម្រិតថ្នាក់ជាតិ និងអន្តរជាតិ ព្រមទាំងការផ្សព្វផ្សាយអំពីប្រភេទកីឡាទូកក្តោង ទៅដល់ប្រជាជនកម្ពុជា និងបរទេស ដើម្បីមកសាកល្បង និងចូលរួមហ្វឹកហាត់កីឡាទូកក្តោង ។
មជ្ឈមណ្ឌលហ្វឹកហ្វឺនកីឡាទូកក្តោងនេះ ក៏ជាផ្នែកមួយដ៏សំខាន់សម្រាប់កីឡាទេសចរណ៍ ដោយអាចទាក់ទាញភ្ញៀវទេសចរជាតិ និងអន្តរជាតិឱ្យចូលមកកម្សាន្ត និងមើលឃើញពីការអភិវឌ្ឍន៍ នៃហេដ្ឋារចនាសម្ព័ន្ធថ្មីរបស់ខេត្តព្រះសីហនុ ។
នេះគឺជាជោគជ័យថ្មីមួយរបស់សហព័ន្ធកីឡាទូកក្តោងកម្ពុជា បន្ទាប់ពីការធ្វើជាម្ចាស់ផ្ទះ ក្នុងការរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ នៅទីលានតេជោ ក្រុងព្រះសីហនុ ខេត្តព្រះសីហនុ ដោយទទួលបានមេដាយចំនួន២គ្រឿង គឺមេដាយប្រាក់១គ្រឿង លើវិញ្ញាសា Windsurfing RS:One និងមេដាយសំរិទ្ធ១គ្រឿងលើវិញ្ញាសា Windsurfing RS:X។
សូមបញ្ជាប់ថា សហព័ន្ធកីឡាទូកក្តោងកម្ពុជាគ្រោង នឹងរៀបចំព្រឹត្តិការណ៍ប្រកួតកីឡាទូកក្តោង ជ្រើសរើសជើងឯកថ្នាក់ជាតិ ឆ្នាំ២០២៣ និងពិធីសម្ពោធដាក់ឱ្យដំណើរការមជ្ឈមណ្ឌលជាតិហ្វឹកហ្វឺនកីឡាទូកក្តោងផ្លូវការ នៅក្នុងខែធ្នូ ឆ្នាំ២០២៣ខាងមុខ ៕
ចែករំលែកព័តមាននេះ