- ភ្នំពេញ
ថ្ងៃនេះ ព្រះរាជាណាចក្រកម្ពុជា បានប្រារព្ធពិធិបុណ្យឯកជាតិខួបលើកទី៧០ ពីការទទួលបាន ឯករាជ្យជាតិពេញបរិបូណ៌ពីអាណានិគមន៍បារាំងនៅឆ្នាំ១៩៥៣។ ខុសពីឆ្នាំមុនៗ នៅឆ្នាំនេះ បន្ទាប់ពី
ថ្ងៃនេះ ព្រះរាជាណាចក្រកម្ពុជា បានប្រារព្ធពិធិបុណ្យឯកជាតិខួបលើកទី៧០ ពីការទទួលបាន ឯករាជ្យជាតិពេញបរិបូណ៌ពីអាណានិគមន៍បារាំងនៅឆ្នាំ១៩៥៣។ ខុសពីឆ្នាំមុនៗ នៅឆ្នាំនេះ បន្ទាប់ពីការប្រទានភ្លើងជ័យនៅវិមានឯករាជ្យពីសំណាក់ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាហើយនោះ គេបានរៀបចំអង្គមីន្ទិញមហាជនយ៉ាងអធិកអធមនៅមុខព្រះបរមរាជវាំងទៀត។
នៅក្នុងពិធីមីន្ទិញនោះ ព្រះមហាក្សត្រ បានមានព្រះបន្ទូលរំលឹកពីបូជនីយកិច្ចរបស់សម្តេចតា ក្នុងការទាមទារឯករាជ្យពីបារាំង នៅឆ្នាំ១៩៥៣។ ៧០ឆ្នាំក្រោយពីបានឯករាជ្យ តាមរយៈ មីទ្ទិញ រំលឹកខួបទី៧០នេះ ព្រះមហាសក្សត្រ លើកឡើងថា កម្ពុជាទទួលបាននូវសុខសន្តិភាព និងការអភិវឌ្ឍន៍។ ព្រះអង្គ បន្តថា មាតុភូមិ និងប្រជាជនកម្ពុជា នឹងទទួលបានអនាគតភ្លឺស្វាងក្នុងក្តីសង្ឃឹមខ្ពស់ រស់នៅក្រោមដំបូលរដ្ឋធម្មនុញ្ញតែមួយដែលធានាបានឯកភាពជាតិដ៏រឹងមាំ។
ព្រះអង្គ បានបញ្ជាក់ថា «តាមរយៈ មីទ្ទិញ យើងអាចសន្និដ្ឋានបានថា មាតុភូមិ និងប្រជាជនកម្ពុជាយើងពិតជានឹងទទួលបានអនាគតភ្លឺស្វាងក្នុងក្តីសង្ឃឹមខ្ពស់ រស់នៅក្រោមដំបូលរដ្ឋធម្មនុញ្ញតែមួយដែលធានា បានឯកភាពជាតិដ៏រឹងមាំ»។
ព្រះករុណា ព្រះបាទ សម្តេចព្រះបរមនាថ នរោត្តម សីហមុនី មានបន្ទូលបន្តថា ក្រោមទង់ ដ៏ជោគជ័យនៃមហាសាមគ្គីជាតិ ក្រោមទង់ដ៏សុខសាន្ត នៃព្រះពុទ្ធសាសនា និងក្រោមបារមី ព្រះមហាក្សត្រ ដែលជាបុព្វបុរសជាតិ ជាព្រះស្ថាបនិកដ៏ល្បាញល្បីនៃការកសាងប្រាង្គប្រាសាទដ៏ល្អប្រណីត ស្ថិតនៅស្កឹមស្កៃគ្រប់ទិសទីក្នុងទូទាំងព្រះរាជាណាចក្រកម្ពុជា មាតុភូមិ ដែលជាកេរមរតកជាតិដ៏មានតម្លៃពុំអាចកាត់ថ្លៃបានរបស់យើង ពិតជាពុំអាចមានសត្រូវណាមួយរំលោ.ភឈ្លានពានលើបូរណភាពទឹកដីបានឡើយ។
អង្គមីទ្ទិញ នាពេលនេះ គឺជាមហាព្រឹត្តិការណ៍ជាតិដ៏មានអត្ថន័យឆ្លើយតបបានយ៉ាងសាកសមទៅនឹងបេសកកម្ម និងពលិកម្មប្រកបដោយមនសិការជាតិដ៏ខ្ពង់ខ្ពស់បំផុតរបស់ព្រះមហាវីរក្សត្រ ព្រះវររាជបិតាឯករាជ្យជាតិ «ព្រះករុណា ព្រះបរមរតនកោដ្ឋ» ជាទីគោរពសក្ការៈដ៏ខ្ពង់ខ្ពស់បំផុត។ ព្រះអង្គតែងតែស្ងើចសរសើរចំពោះភ័ព្វវាសនារបស់មាតុភូមិ និងប្រជារាស្តកម្ពុជាយើង ដែលបានរួចចាកផុតពីគ្រោះមហន្តរាយនៃសង្គ្រាម និងទទួលបានសេចក្ដីសុខ សន្តិភាព និងការរីកចម្រើនយ៉ាងឆាប់រហ័សលើគ្រប់វិស័យ ស្របតាមយន្តការនៃការគ្រប់គ្រងប្រកបដោយវិចារណញ្ញាណដ៏អស្ចារ្យ។
នៅក្នុងឱកាសនេះ ព្រះអង្គក៏មានព្រះបន្ទូល សូមអំពាវនាវបងប្អូនប្រជាពលរដ្ឋកម្ពុជា គ្រប់មជ្ឈដ្ឋាន សូមរួបរួមសាមគ្គីជាធ្លុងមួយ ស្ថិតក្រោមដំបូលរដ្ឋធម្មនុញ្ញ និងច្បាប់រដ្ឋ ដើម្បីចូលរួមចំណែកការពារ និងកសាងមាតុភូមិលើគ្រប់វិស័យ។
សាមគ្គីភាពគ្រួសារខ្មែរ ក៏ធ្លាប់បានអំពាវនាវដោយអតីតព្រះមហាក្សត្រ ព្រះបរមរតនកោដ្ឋ ផងដែរ។ កាលនៅមានព្រះជន្ម ព្រះអង្គតែងតែលើកឡើងពីសាមគ្គីភាព ឯកភាពជាតិខ្មែរ ដើម្បីជាតិរុងរឿង។ សម្តេចតា មិនត្រឹមទទួលបានការគោរព ស្ញប់ស្វែងពីពលរដ្ឋខ្មែរថា ជាបិតាឯករាជ្យជាតិ ជាអ្នកនាំរាជតិមកជូនជាតិ និងពលរដ្ឋនោះទេ ព្រះអង្គត្រូវបានប្រជារាស្ត្រប្រសិទ្ធភាពថា «បិតាបង្រួបបង្រួម និងផ្សះផ្សារជាតិផងដែរ»។
ចំណែក នាយករដ្ឋមន្ត្រីកម្ពុជាបច្ចុប្បន្ន សម្តេចធិបតី ហ៊ុន ម៉ាណែតវិញ បានអះអាងពីការបន្តថែរក្សាស្នាព្រះហស្ថ និងព្រះរាជសមិទ្ធផលដ៏ថ្លៃថ្លារបស់សម្តេចតា លើការពង្រឹងស្មារតីបង្រួបបង្រួមជាតិ, ឯកភាពជាតិ, ការការពាររក្សាសុខសន្តិភាព និងការអភិវឌ្ឍន៍។ សម្តេចសម្តែងនូវព្រះករុណាទិគុណ ថ្វាយព្រះករុណា ជាអម្ចាស់ ជីវិតលើត្បូង ដែលព្រះអង្គជានិច្ចកាលតែងតែប្រោសព្រះរាជទាននូវការគាំទ្រ និងសម្តែងព្រះហឫទ័យស្រលាញ់, លើកទឹកចិត្ត ចំពោះអង្គព្រឹទ្ធសភា, រដ្ឋសភា និងរាជរដ្ឋាភិបាល ក្នុងការបំពេញតួនាទី និងកាតព្វកិច្ចបម្រើជាតិមាតុភូមិ៕
ដោយ ៖ សា រ៉ាន់
ចែករំលែកព័តមាននេះ