ម៉ូតូចំនួន៤៨គ្រឿង និងជនសង្ស័យចំនួន៨នាក់ ក្នុងនោះមានជនជាតិចិន២នាក់ផង បានត្រូវនគរបាលក្រុងព្រះសីហនុ ធ្វើការបង្ហាញមុខជាសាធារណៈនៅចំពោះមុខ
ខេត្តព្រះសីហនុ ៖ ម៉ូតូចំនួន៤៨គ្រឿង និងជនសង្ស័យចំនួន៨នាក់ ក្នុងនោះមានជនជាតិចិន២នាក់ផង បានត្រូវនគរបាលក្រុងព្រះសីហនុ ធ្វើការបង្ហាញមុខជាសាធារណៈនៅចំពោះមុខឯកឧត្តមអភិបាលខេត្ត និងលោកស្នងការនគរបាលខេត្ត ។
ថ្លែងក្នុងឱកាសអញ្ជើញទៅពិនិត្យវត្ថុតាងដែលកម្លាំងសមត្ថកិច្ចបង្ក្រាបបាន ឯកឧត្តម គួច
ចំរើន អភិបាលខេត្ត បានថ្លែងកោតសរសើរកម្លាំងសមត្ថកិច្ច ដែលបានខិតខំការពារ រក្សាសុខសុវត្ថិភាពជូនប្រជាពលរដ្ឋ ដោយស្រាវជ្រាវ និងបង្ក្រាបបទល្មើសបានទាន់ពេលវេលា ។ ឯកឧត្តមក៏បានអំពាវនាវដល់បងប្អូនប្រជាពលរដ្ឋ សូមមេត្តារក្សាទ្រព្យសម្បត្តិផ្ទាល់ខ្លួន ដោយចាក់សោឲ្យបានត្រឹមត្រូវ ចៀសវាងក្រុមឆ្លៀតឱកាសធ្វើសកម្មភាពចោ.រកម្មផ្សេងៗ ។
ឯកឧត្តមអភិបាលខេត្ត ក៏បានប្រកាសដល់ប្រជាពលរដ្ឋដែលបាត់ម៉ូតូនាពេលកន្លងមក សូមមកទាក់ទងនៅអធិការដ្ឋាននគរបាលក្រុងព្រះសីហនុ ដើម្បីពិនិត្យរកមើលម៉ូតូដែលខ្លួនបាត់ថា តើមានម៉ូតូរបស់បងប្អូនដែរឬទេ? បើមាន សូមយកឯកសារពាក់ព័ន្ធមកប្រគល់ជូនកម្លាំងសមត្ថ
កិច្ច ដើម្បីពិនិត្យនិងប្រគល់ជូន ។
លោកវរសេនីយ៍ឯក តី វិសាល អធិការនគរបាលក្រុងព្រះសីហនុ បានថ្លែងក្នុងកិច្ចសម្ភាសន៍ជាមួយអ្នកសារព័ត៌មាន នាព្រឹកថ្ងៃទី៩ ខែវិច្ឆិកា ឆ្នាំ២០២៣ថា កាលពីព្រឹកថ្ងៃទី៧ ខែវិច្ឆិកា ឆ្នាំ២០២៣ វេលាម៉ោង៣ទៀបភ្លឺ មានករណីលួ.ចម៉ូតូកើតឡើងនៅបន្ទប់ជួល ក្នុងភូមិ៥ សង្កាត់លេខ៤ ក្រុងព្រះសីហនុ ។ ជនសង្ស័យចំនួន៣នាក់ បានចូលក្នុងបរិវេណបន្ទប់ជួល រួចលួចយកម៉ូតូចំនួន៣គ្រឿង ហើយនាំគ្នាជិះគេចខ្លួនបាត់ ។
ម្ចាស់ម៉ូតូទាំង៣គ្រឿងនោះ មាន ៖ ១-ឈ្មោះ ភត់ ផុន ភេទប្រុស អាយុ៣៦ឆ្នាំ ជាសន្ដិសុខឯកជន ស្នាក់នៅកន្លែងកើតហេតុ បាត់ម៉ូតូ១គ្រឿងម៉ាកស៊ុយហ៊្សុយគីណិច ស៊េរីឆ្នាំ២០១៨ ពណ៌ខ្មៅ កាំបន្ទះខ្មៅ ។ ២-ឈ្មោះ អុង សារុន ភេទប្រុស អាយុ៣៧ឆ្នាំ មុខរបររត់ម៉ូតូកង់បី ស្នាក់នៅកន្លែងកើតហេតុ បាត់ម៉ូតូ១គ្រឿងម៉ាកស៊ុយហ៊្សុយគីណិច ពណ៌ទឹកប្រាក់ ស៊េរីឆ្នាំ២០២០ ពាក់ផ្លាកលេខ កណ្ដាល ១AH-៦៤៤៧ ។ ៣-ឈ្មោះ សុខ ប៊ុណ្ណារ៉ាត់ ភេទប្រុស អាយុ១៨ឆ្នាំ មុខរបរលក់ដូរ ស្នាក់នៅកន្លែងកើតហេតុ បាត់ម៉ូតូ១គ្រឿងម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៣ ឡើងតែមប្រិ៍ឆ្នាំ២០១៩ កាំបន្ទះពណ៌ស ពាក់ផ្លាកលេខ ស្វាយរៀង ១C-៨២៥៨ ។
ក្រោយទទួលបណ្ដឹងពីជនរងគ្រោះរួច ដោយមានការចង្អុលដឹកនាំពីលោកស្នងការនគរបាលខេត្ត សមត្ថកិច្ចបានធ្វើការស្រាវជ្រាវយ៉ាងយកចិត្តទុកដាក់ ហើយរហូតដល់ថ្ងៃទី៧ ខែវិច្ឆិកា ឆ្នាំ២០២៣ ក៏ឃាត់ខ្លួនជនសង្ស័យបានចំនួន៤នាក់ ៖ ១-ឈ្មោះ រ៉ូ វាសនា ហៅ ទីន ភេទប្រុស អាយុ២៣ឆ្នាំ ស្នាក់នៅភូមិ២ សង្កាត់លេខ៤ ក្រុងព្រះសីហនុ ជាជនដៃដល់ក្នុងអំពើលួ.ច ។ ២-ឈ្មោះ ប៉ែន សំណាង ហៅ វីន ភេទប្រុស អាយុ១៨ឆ្នាំ ស្នាក់នៅភូមិ២ សង្កាត់លេខ២ ក្រុងព្រះសីហនុ ជាជនដៃដល់ក្នុងអំពើលួ.ច ។ ៣-ឈ្មោះ កែវ សុភី ហៅ ញ៉ាញ់ធំ ភេទប្រុស អាយុ៣២ឆ្នាំ មុខរបររត់ម៉ូតូកង់បី ស្នាក់នៅភូមិ៥ សង្កាត់លេខ៤ ក្រុងព្រះសីហនុ ជាមេខ្លោង ។ ៤-ឈ្មោះ ចាំង ហៃ ហៅ យួន ភេទប្រុស អាយុ៣៩ឆ្នាំ មុខរបរនិងកន្លែងស្នាក់នៅមិនពិតប្រាកដ ជាអ្នកសមគំនិត) ។
នៅចំពោះមុខសមត្ថកិច្ច ជនសង្ស័យសារភាពថា ពួកខ្លួនពិតជាបានធ្វើសកម្មភាពលួ.ចម៉ូតូនៅចំណុចខាងលើប្រាកដមែន ។ យោងតាមចម្លើយសារភាពរបស់ជនសង្ស័យ អធិការដ្ឋាននគរបាល
ក្រុងព្រះសីហនុ បន្តស្រាវជ្រាវទីតាំងទទួលបញ្ចាំម៉ូតូ ស្ថិតនៅភូមិ៣ សង្កាត់លេខ៤ ក្រុងព្រះសីហនុ និងបានរកឃើញម៉ូតូចំនួន៤៨គ្រឿង ក្នុងនោះ៩គ្រឿងពាក់ព័ន្ធនឹងអំពើលួ.ច ហើយក៏បានឃាត់ខ្លួនជនសង្ស័យជាបុរសជនជាតិចិនចំនួន២នាក់ទៀត នៅទីតាំងបញ្ចាំនោះនាំយកមកសាកសួរ ។
ជនសង្ស័យជាជនជាតិចិនទាំង២នាក់នេះ ជាអាជីវករ និងស្នាក់នៅកន្លែងទទួលបញ្ចាំ ហើយជាប់សង្ស័យក្នុងអំពើទទួលផលចោ.រក.ម្ម ដែលម្នាក់ឈ្មោះ Ye Yu Ming អាយុ៤៨ឆ្នាំ និងម្នាក់ទៀតឈ្មោះZhao Jian Lin អាយុ៥៤ឆ្នាំ ។ ចំពោះវត្ថុតាងចាប់យកមាន ម៉ូតូចំនួន៩គ្រឿង ដែលជាផលនៃអំពើលួ.ច និងម៉ូតូចំនួន៣៩គ្រឿង ដកហូតពីកន្លែងទទួលបញ្ចាំ ។ ម៉ូតូទាំងអស់ ត្រូវបានយកមករក្សាទុកនៅអធិការដ្ឋាននគរបាលក្រុងព្រះសីហនុ ដើម្បីធ្វើការស្រាវជ្រាវបន្តតាមនីតិវិធី និងស្វែងរកម្ចាស់ ។ ចំណែកជនសង្ស័យទាំង៦នាក់ ត្រូវបាននគរបាលក្រុងព្រះសីហនុ កសាងសំណុំរឿងរួមជាមួយវត្ថុតាងបញ្ជូនទៅសាលាដំបូងខេត្ត ដើម្បីផ្ដន្ទាទោសតាមច្បាប់ ៕
ចែករំលែកព័តមាននេះ