ការស្ញប់ស្ញែង និងកោតសរសើរបានផ្ទុះឡើងជាខ្លាំង ចំពោះសមត្ថភាពក្រុមគ្រូពេទ្យនៃមន្ទីរពេទ្យគន្ធបុប្ផា បន្ទាប់ពីរួមគ្នាធ្វើការវះកាត់ទារកដែលកើតមកមានអវៈយវៈមិនប្រក្រតី រហូតទទួលបានជោគជ័យ
រាជធានីភ្នំពេញ ៖ ការស្ញប់ស្ញែង និងកោតសរសើរបានផ្ទុះឡើងជាខ្លាំង ចំពោះសមត្ថភាពក្រុមគ្រូពេទ្យនៃមន្ទីរពេទ្យគន្ធបុប្ផា បន្ទាប់ពីរួមគ្នាធ្វើការវះកាត់ទារកដែលកើតមកមានអវៈយវៈមិនប្រក្រតី រហូតទទួលបានជោគជ័យ ។
យោងតាមព័ត៌មានពីមន្ទីរពេទ្យបានឱ្យដឹងថា ទារកអាយុ២ថ្ងៃមកពីស្រុកសំពៅលូន ខេត្តបាត់ដំបង បានកើតមកមានដៃ៤ជើង៤ និងមានរន្ធគូទត្បៀតជិត(Anal imperforation) ។
ទារកនេះ បានចូលសម្រាកព្យាបាលនៅផ្នែកសង្គ្រោះទារក(NICU) ហើយត្រូវបានវះកាត់ដោយគ្រូពេទ្យឯកទេសវះកាត់នៃមន្ទីរពេទ្យកុមារជ័យវរ្ម័នទី៧(គន្ធបុប្ផាទី៣សៀមរាប) ដែលដឹកនាំការវះកាត់ដោយលោកសាស្ត្រាចារ្យ កែវ សុខា លោកវេជ្ជបណ្ឌិតឯកទេស ប៉ុន ឡាឌីន និងលោកវេជ្ជបណ្ឌិតឯកទេស អៀន សារិន ។
មន្ទីរពេទ្យបានបញ្ជាក់ថា ទារករូបនេះបានឆ្លងកាត់ការវះកាត់៤លើកដោយជោគជ័យ ។ ការវះកាត់លើកទី១ គឺការវះកាត់យកដៃ១គូចេញ ។ ការវះកាត់លើកទី២ គឺការវះកាត់ដោយចោះពោះវៀនធំ ដើម្បីឱ្យទារកបន្ទោបង់លាមកតាមចង្កេះ(colostomy)ជាបណ្តោះអាសន្ន ។ ការវះកាត់លើកទី៣ គឺការវះកាត់យកអវៈយវៈក្រោម១គូ(ជើង)ចេញ ។ ការវះកាត់លើកទី៤ គឺការវះកាត់យកឆ្អឹង pubis ដែលខូចទម្រង់ពីកំណើតចេញ ។
ក្រោយការព្យាបាល បន្ទាប់ពីវះកាត់ទាំង៤លើក ទារកមានសុខភាពល្អ មានការលូតលាស់និងធំធាត់ប្រក្រតី ដោយមានការជួយសង្គ្រោះដ៏ល្អ និងមានប្រសិទ្ធភាពពីក្រុមវេជ្ជបណ្ឌិតឯកទេសផ្នែកសង្គ្រោះទារក(NICU) ។
នៅព្រឹកថ្ងៃទី៧ ខែវិច្ឆិកា ឆ្នាំ២០២៣ ទារករូបនេះបានចេញទៅផ្ទះជាមួយនឹងស្នាមញញឹមរបស់ឪពុកម្តាយ ដោយមានការណាត់ជួបគ្រូពេទ្យវះកាត់នៅ៣ខែក្រោយ ដើម្បីបិទពោះវៀនវិញ និងកែលម្អរន្ធគូទ ៕
ចែករំលែកព័តមាននេះ