- ភ្នំពេញ
មានការសង្កេតឃើញថា បុណ្យកឋិនទាននៅឆ្នាំនេះ មិនសូវមានភាពអធិបអធមនោះទេ ស្របពេលដែលសេដ្ឋកិច្ចពលរដ្ឋជាទូទៅបានជួបការលំបាក
មានការសង្កេតឃើញថា បុណ្យកឋិនទាននៅឆ្នាំនេះ មិនសូវមានភាពអធិបអធមនោះទេ ស្របពេលដែលសេដ្ឋកិច្ចពលរដ្ឋជាទូទៅបានជួបការលំបាក។
បុណ្យកឋិនទាន ពលរដ្ឋខ្មែរមានជំនឿថា ទទួលបានផលបុណ្យច្រើន។ បុណ្យកឋិនទាន ត្រូវបានគេចាត់ទុកថា ជាបុណ្យមួយត្រូវចំណាយថវិកាច្រើន។ ចំណាយទាំងការរៀបចំកម្មវិធីបុណ្យ ដូចជាពិធីទទួលភ្ញៀវចូលរួម ដោយមានបាយទឹកចំណីអាហារ និងត្រូវចំណាយថវិកាសម្រាប់ទិញស្បង់ជីវ ទេយ្យទាន ដើម្បីប្រគេនព្រះសង្ឃ និងត្រូវមានបច្ច័យភ្ជាប់ជាមួយសម្រាប់ទ្រទ្រង់ដល់ការកសាងសមិទ្ធផលនានានៅក្នុងវត្ត ដែលអ្នករៀបចំពិធីបុណ្យត្រូវហែអង្គកឋិនទានចូល។
មានការលើកឡើងថា ដើម្បីរៀបចំបុណ្យកឋិនទាន គេត្រូវការថវិកាមិនតិចជាង១ម៉ឺនដុល្លារ នោះទេ។ ការចំណាយខ្ពស់បែបនេះ ទើបមានមជ្ឈដ្ឋានខ្លះបានហៅបុណ្យកឋិនទាន ជាបុណ្យ សម្រាប់អ្នកមាន។ នៅក្នុងរយៈពេលចុងក្រោយនេះ ដោយការរៀបចំបុណ្យនេះ ជាលក្ខណៈបុគ្គលក៏មានការចំណាយខ្ពស់ ទើបពលរដ្ឋបានរួមរួមគ្នាធ្វើបុណ្យកឋិនទានសាមគ្គី។ រូបភាពបុណ្យសាមគ្គី បានកាត់បន្ថយការចំណាយរបស់ពលរដ្ឋ និងបានបើកឱកាសឱ្យពលរដ្ឋសម្រេចបានបំណងប្រាថ្នារបស់ក្នុងខ្លួន តាមជំនឿ និងសទ្ធា។ ពលរដ្ឋជាច្រើនមានក្តីប្រាថ្នាថា ចង់រៀបចំបុណ្យកឋិនទាននៅក្នុងជីវិតរបស់ខ្លួន។
តាមការសង្កេតជាក់ស្តែងនៅរៀងរាល់ឆ្នាំ ឱ្យតែដល់រដូវធ្វើបុណ្យកឋិកទាននេះ ពលរដ្ឋដែលមានជីវភាពធូរធា នាំគ្នារៀបចំពិធីបុណ្យតាមគេហដ្ឋានខ្លួន។ បើនៅភ្នំពេញ នៅក្នុងរដូវបុណ្យប្រចាំឆ្នាំនេះមកដល់ មានរោងបុណ្យជាច្រើន បានសង់ឡើងនៅតាមបណ្តោយផ្លូវត.គ្នា ដែលបង្ហាញពីចំនួនពលរដ្ឋធ្វើបុណ្យមានច្រើន។ ប៉ុន្តែឆ្នាំនេះ មិនសូវឃើញមានរោងបុណ្យកឋិនទាន នោះទេ។
ពិធីបុណ្យកឋិនទាន ត្រូវប្រារព្ធធ្វើក្នុងរយៈពេល២៩ថ្ងៃ ខុសពីថ្ងៃកំណត់នេះ គេមិនបានរៀបចំធ្វើពិធីបុណ្យនេះបានឡើយ។ នៅឆ្នាំនេះ កឋិនទាន នឹងប្រព្រឹត្តទៅពីថ្ងៃ១រោច ខែអស្សុជ រហូតដល់ថ្ងៃ១៥កើត ខែកត្តិក ត្រូវនឹងថ្ងៃទី៣០ ខែតុលា រហូតដល់ថ្ងៃទី២៧ ខែវិច្ឆិកា ឆ្នាំ២០២៣។ រហូតមកដល់ពេលនេះ នៅសល់រយៈពេលប្រមាណ២០ថ្ងៃទៀត ដូច្នេះអាចថានៅចុងពេល ទើបពលរដ្ឋនាំគ្នាប្រារព្ធធ្វើបុណ្យច្រើន ក៏អាចថាបាន។
កាលពីពេលថ្មីៗនេះ ក្រសួងធម្មការ និងសាសនា បានចេញប្រកាសមួយពីបែបបទ នៃការរៀបចំចំបុណ្យកឋិនទាន ឱ្យដំណើរការ និងប្រព្រឹត្តទៅស្របតាមទំនៀមទម្លាប់ និងប្រពៃណីព្រះពុទ្ធសាសនា ។ ក្រសួងធម្មការ បានណែនាំដល់គ្រប់មន្ទីរធម្មការ និងសាសនា រាជធានី ខេត្ត នូវវិធានការមួយចំនួនដែលគេត្រូវរៀបចំនៅក្នុងរដូវកាលធ្វើបុណ្យកឋិនាទាននេះ ដូចជា ៖ គ្រប់វត្តអារាម ត្រូវរៀបចំសម្អាតទីតាំងវត្តអារាម ផ្លូវថ្នល់ បូជនីយដ្ឋាន ដោយតុបតែងលម្អ បំភ្លឺភ្លើងពណ៌ លើកទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក ពាក្យអប់រំ និងពុទ្ធភាសិតនានា ឱ្យបានច្រើន តាមដែលអាចធ្វើទៅបាន។ ជាមួយគ្នានេះ ក្រសួងក៏បានហាមដើររ៉ៃអង្គាសនៅតាមផ្លូវសាធារណៈ និងទីប្រជុំជនជាដើម ដែលធ្វើឱ្យបាត់បង់សណ្ដាប់ធ្នាប់ របៀបរៀបរយសង្គម និងកិត្តិយសព្រះពុទ្ធសាសនា ផងដែរ។
ពលរដ្ឋជាច្រើនបានកំពុងត្អូញត្អែរពីបញ្ហាសេដ្ឋកិច្ច ដូចជាការរកទទួលទានមិនសូវបាន ហើយ ទំនិញលើទីផ្សារឡើងថ្លៃ។ នៅពេលសេដ្ឋកិច្ចមានការលំបាក ពលរដ្ឋជាច្រើនបានកាត់បន្ថយការចំណាយនានា ដូច្នេះវិបត្តិសេដ្ឋកិច្ច អាចនឹងជះឥទ្ធិពលដល់ការធ្វើបុណ្យទាន ផងដែរ៕
ចែករំលែកព័តមាននេះ