ខេត្តកំពង់ចាម ៖ ពិតជាគួរឱ្យអាណិតអាសូរណាស់ ដោយសារក្មេងប្រុសតូចទើបតែអាយុ១៨ខែប៉ុណ្ណោះ ត្រូវបានបុរសដែលជាអ៊ំបង្កើតស្រវឹងស្រាក៏ចាប់ទះកំផ្លៀងពេញទំហឹង ជាហេតុបណ្ដាលឱ្យក្អួតរហូតដល់ស្លា.ប់ ។ ហេតុការណ៍រន្ធត់នេះ កើតឡើងនៅភូមិទួលខ្ពស់ ឃុំក្រូច…
ខេត្តកំពង់ចាម ៖ ពិតជាគួរឱ្យអាណិតអាសូរណាស់ ដោយសារក្មេងប្រុសតូចទើបតែអាយុ១៨ខែប៉ុណ្ណោះ ត្រូវបានបុរសដែលជាអ៊ំបង្កើតស្រវឹងស្រាក៏ចាប់ទះកំផ្លៀងពេញទំហឹង ជាហេតុបណ្ដាលឱ្យក្អួតរហូតដល់ស្លា.ប់ ។ ហេតុការណ៍រន្ធត់នេះ កើតឡើងនៅភូមិទួលខ្ពស់ ឃុំក្រូច ស្រុកព្រៃឈរ ហើយភ្លាមៗត្រូវបានកម្លាំងប៉ុស្តិ៍មូលដ្ឋានអន្តរាគមន៍ចាប់ខ្លួនបញ្ជូនទៅអធិការដ្ឋាននគរបាលស្រុកដើម្បីសួរនាំ ។
ប្រភពព័ត៌មានសុំមិនបញ្ចេញអត្តសញ្ញាណបានប្រាប់ឱ្យកាលពីព្រឹកថ្ងៃទី៨ វិច្ឆិកា នេះថា នៅមុនកើតហេតុ បុរសឈ្មោះសឿង សុភា អាយុ៣៣ឆ្នាំ ត្រូវជាអ៊ំបង្កើតបានផឹកស្រាថ្នាំនៅផ្ទះរបស់ខ្លួនអស់កន្លះលីត្រនាពេលថ្ងៃ ។ លុះមកដល់ពេលល្ងាច ក៏បានផឹកបន្តទៀតអស់កន្លះលីត្រទៀតបណ្ដាលឱ្យស្រវឹង ។ ដោយសារតែខ្លួនខឹងក្មួយប្រុសរបស់ខ្លួនឈ្មោះវីន ម៉េងលាង អាយុ១៨ខែ
យំ ក៏បានចាប់ក្មួយទះកំផ្លៀងទាំងសងខាងដោយពេញទំហឹងដៃមនុស្សចាស់ ជាហេតុបណ្ដាលឱ្យក្មេងតូចនោះសន្លប់រហូតដល់វេលាម៉ោង៩ និង៣០នាទីយប់ថ្ងៃទី៦ វិច្ឆិកា២០២៣ ទើបកម្លាំងប៉ុស្ត៍មូលដ្ឋានទទួលបានព័ត៌មាននេះ។ បើតាមសាក្សីផ្ទះនៅក្បែរកន្លែងកើតហេតុដំបូងគេឮសូរសំឡេងក្មេងប្រុសតូចនោះយំបន្ទាប់មកក៏ស្ងាត់មាត់តែម្ដង ។
ប្រភពព័ត៌មានដដែលបន្តថា ភ្លាមៗនោះ ដោយសារតែផ្ទះកើតហេតុនៅចម្ងាយប្រមាណ២០០ម៉ែត្រពីប៉ុស្តិ៍រដ្ឋបាលឃុំក្រូច កម្លាំងប៉ុស្តិ៍បានចុះទៅដល់អន្តរាគមន៍ឃាត់ខ្លួនបុរសឈ្មោះសឿងសុភា បញ្ជូនមកប៉ុស្តិ៍រដ្ឋបាល និងប្រញាប់ប្រញាល់នាំខ្លួនទៅកាន់អធិការដ្ឋាននគរបាលស្រុកព្រៃឈរ ។
សូមបញ្ជាក់ថា នៅផ្ទះកើតគឺមានអ្នករស់នៅ ក្នុងនោះរួមមាន ទី១-គឺជនបង្ក ទី២-ស្ត្រីឈ្មោះសឿងចន្ធូ អាយុ៣១ឆ្នាំ ជាស្ត្រីមេម៉ាយមានកូនពីរនាក់ នៅក្នុងបន្ទប់ ក្នុងនោះ មានកូនស្រីច្បង និងកូនប្រុសពៅអាយុ១៨ខែនេះ ចំណែកប្អូនប្រុសម្នាក់ទៀតបានចេញទៅធ្វើការបាត់ ។
នៅចំពោះមុខសមត្ថកិច្ច ជនបង្កជាអ៊ំប្រុសបង្កើតបានឆ្លើយសារភាពថា ដំបូងគឺក្មួយប្រុសរបស់ខ្លួនយំ ហើយខ្លួនខឹងពេក ក៏បានចាប់ទះកំផ្លៀងលើថ្ពាល់ទាំងសងខាង បណ្ដាលឱ្យក្មេងនោះក្អួតឱ្យនិងសន្លប់ រហូតដល់វេលាម៉ោង៩ និង ៣០នាទីយប់ថ្ងៃទី៦វិច្ឆិកា ទើបមានហេតុការណ៍ភ្ញាក់ផ្អើលថា ក្មេងប្រុសតូចអាយុ១៨ខែស្លាប់ ដោយសារស្នាដៃរបស់អ៊ំប្រុស ។
ពេលទទួលបានព័ត៌មាននេះ នាយប៉ុស្តិ៍ក្រូចបានដឹកនាំកម្លាំងចុះមកដល់កន្លែងកើតហេតុ និងបានឃាត់ខ្លួនបុរសជាឃាតករភ្លាមៗបញ្ជូនទៅប៉ុស្តិ៍និងបាននាំខ្លួនបន្តទៅអធិការដ្ឋាននគរបាលស្រុកព្រៃឈរ ។
គួរបញ្ជាក់ថា បុរសជាអ៊ំប្រុសដែលក្លាយខ្លួនជាឃាតករនេះ កន្លងទៅធ្លាប់ត្រូវបានសមត្ថកិច្ចមូលដ្ឋានចាប់ខ្លួនម្ដងពីបទប្រើប្រាស់គ្រឿងញៀន ដោយជាប់ពន្ធនាគាររយៈពេល៦ខែ ។ ក្រោយមក ក៏បានដោះលែងមានសេរីភាពឡើងវិញ វិលត្រឡប់មកផ្ទះ តែបុរសនេះហាក់បីដូចជាមិនរាងចាលនៅតែបន្តលួចប្រើប្រាស់គ្រឿងញៀនដដែល ។
សមត្ថកិច្ចមូលដ្ឋានបញ្ជាក់ថា ឪពុកម្ដាយរបស់ស្ត្រីឈ្មោះចន្ធូបានចំណាកស្រុកចេញទៅរកស៊ីនៅប៉ោយប៉ែត ខេត្តបន្ទាយមានជ័យ ជាប់ព្រំដែនថៃ ដើម្បីរកថវិកាមកផ្គត់ផ្គង់ជីវភាពគ្រួសារ។ដោយនៅផ្ទះឯស្រុកកំណើត គឺមានមនុស្សរស់នៅតែ៣នាក់បងប្អូន ។ ក្មេងតូចពីរនាក់ទៀត សរុប៥នាក់ តាមប្រភពចុងក្រោយ ឪពុកម្ដាយរបស់ជនសង្ស័យក៏ដូចជាម្ដាយរបស់ក្មេងប្រុសតូចបានឲ្យសមត្ថកិច្ចចាត់វិធានការបុរសឈ្មោះសឿង សុភា ទៅតាមនីតិវិធីច្បាប់ ។
ចែករំលែកព័តមាននេះ