ឡាន៣គ្រឿងបុ.កគ្នាលើផ្លូវជាតិលេខ៤
- ព្រះសីហនុ
ខេត្តព្រះសីហនុ ៖ មនុស្ស២នាក់បានរករបួសស្រាលនិងមធ្យម ក្នុងករណីគ្រោះថ្នាក់ចរាចរណ៍រវាង
ខេត្តព្រះសីហនុ ៖ មនុស្ស២នាក់បានរករបួសស្រាលនិងមធ្យម ក្នុងករណីគ្រោះថ្នាក់ចរាចរណ៍រវាងរថយន្តបុកប៉ះគ្នាចំនួន៣គ្រឿងក្នុងទិសដៅបញ្ច្រាសគ្នា។
ហេតុការណ៍ខាងលើនេះបានកើតឡើងកាលពីថ្ងៃទី៧ វិច្ឆិកា ២០២៣ វេលាម៉ោង១១និង៥០នាទីព្រឹកលើដងផ្លូវជាតិលេខ៤ ចន្លោះគីឡូម៉ែត្រលេខ ១៥៨-១៥៩ ស្ថិតនៅភូមិមនោរម្យ ឃុំតានៃ ស្រុកព្រៃនប់ ខេត្តព្រះសីហនុ ។
អធិការដ្ឋាននគរបាលស្រុកព្រៃនប់បានឱ្យដឹងថា រថយន្តទាំង៣គ្រឿងខាងលើរួមមាន ១-រថយន្ដម៉ាក TOYOTA COASTER ពណ៌ស ពាក់ផ្លាកលេខ ភ្នំពេញ 3C-0498 (រថយន្ដដឹកអ្នកដំណើរ) បើកបរដោយឈ្មោះ ឡុង ប៉េងអៀង ភេទប្រុស អាយុ៤០ឆ្នាំ មានទីលំនៅភូមិកំពង់បឹង ឃុំកំពង់ហៅ ស្រុកកំពង់លែង ខេត្តកំពង់ឆ្នាំង ។ ២-រថយន្ដម៉ាក FUSO ពណ៌បៃតង ពាក់ផ្លាកលេខ កំពង់ស្ពឺ 3A-1700 និងសឺមីរ៉ឺម៉ក់ ពាក់ផ្លាកលេខ កំពង់ស្ពឺ 4A-0008 បើកបរដោយឈ្មោះ ថុន ចាន់ថង ភេទប្រុស អាយុ២៨ឆ្នាំ មានទីលំនៅភូមិព្រៃបេង ឃុំស្ដុះ ស្រុកសំរោងទង ខេត្តកំពង់ស្ពឺ និង៣-រថយន្ដម៉ាក TOYOTA HINGLANDER ពណ៌ប្រផេះ ពាក់ផ្លាកលេខ ភ្នំពេញ 2AK-6127 បើកបរដោយឈ្មោះ លី ចាន់ថេង ភេទប្រុស អាយុ៤១ឆ្នាំ មានទីលំនៅភូមិក្រាំងដូងទៃ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ និងអ្នករួមដំណើរ ០១នាក់ឈ្មោះ អោក ចិន្ដា ភេទស្រី អាយុ៣៥ឆ្នាំ មានទីលំនៅភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ ។
អធិការដ្ឋាននគរបាលស្រុកព្រៃនប់បានឱ្យដឹងបន្តថា មុនពេលកើតហេតុ រថយន្ដ១គ្រឿងម៉ាក TOYOTA COASTER ពណ៌ស បើកបរក្នុងទិសដៅពីរាជធានីភ្នំពេញ ឆ្ពោះទៅខេត្តព្រះសីហនុ
លុះមកដល់ចំណុចខាងលើ បានរេចង្កូតទៅខាងឆ្វេងដៃរបស់ខ្លួន រួចបានកៀររថយន្ដ១គ្រឿងចំពីចំហៀងខាងឆ្វេង ម៉ាក FUSO ពណ៌បៃតង ដែលមានទិសដៅផ្ទុយគ្នា ។ ក្រោយពីកៀររួច រថយន្ដម៉ាក TOYOTA COASTER ខាងលើ មិនទាន់អស់ល្បឿនក៏បន្ដទៅបុក រថយន្ដ ០១គ្រឿងទៀត ម៉ាក TOYOTA HINGLANDER ពណ៌ប្រផេះ ដែលមានទិសដៅផ្ទុយគ្នា (ខេត្តព្រះសីហនុ ឆ្ពោះទៅ រាជធានីភ្នំពេញ) បានបុកចំពីមុខខាងឆ្វេងតែម្ដង ។
ករណីគ្រោះថ្នាក់ចរាចរណ៍ខាងលើនេះបណ្ដាលឲ្យមានមនុស្សរងរបួសចំនួន២នាក់ ៖ ម្នាក់ឈ្មោះ ឡុង ប៉េងអៀង ភេទប្រុស អ្នកបើកបររថយន្ដម៉ាក TOYOTA COASTER (រងរបួសមធ្យម) និងម្នាក់ទៀតឈ្មោះ អោក ចិន្ដា ភេទស្រី អ្នករួមដំណើររថយន្ដម៉ាក TOYOTA HIGHLANDER (រងរបួសមធ្យម) ។
បច្ចុប្បន្ន ជនរងគ្រោះកំពុងតែសម្រាកព្យាបាលនៅគ្លីនិចឯកជន ក្នុងឃុំវាលរេញ រីឯវត្ថុតាង(រថយន្ដ) បានយកមករក្សាទុកជាបណ្ដោះអាសន្ននៅអធិការដ្ឋាននគរបាលស្រុកព្រៃនប់ ។ ដោយឡែកអ្នកបើកបររថយន្ដម៉ាក FUSO និងអ្នកបើកបររថយន្ដម៉ាក TOYOTA HIGHLANDER បាននាំមកធ្វើការសួរនាំនៅអធិការដ្ឋាននគរបាលស្រុកព្រៃនប់ ៕
ចែករំលែកព័តមាននេះ