ខេត្តព្រះវិហារ ៖ គណៈប្រតិភូខេត្តព្រះសីហនុដឹកនាំដោយលោកស្បោង សារ៉ាត់ ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អភិបាលខេត្តព្រះសីហនុ រួមដំណើរដោយអស់លោក លោកស្រី មេបញ្ជាការ មេបញ្ជាការរង តំបន់សឹករងខេត្ត ប្រធាន អនុប្រធានមន្ទីរ អង្គភាពជុំវិញខេត្តជាច្រើនរូបទៀត បានអញ្ជើញចុះសាកសួរសុខទុក្ខកងទ័ពដែលកំពុងឈរជើងការពារព្រំដែន ក្នុងភូមិសាស្ត្រតំបន់ចាក់ច្រែង ខេត្តព្រះវិហារ ដែលជាកងពលសម្ព័ន្ធមេត្រីភាពជាមួយខេត្តព្រះសីហនុ ។
នៅក្នុងឱកាសសាកសួរសុខទុក្ខនេះ លោក ជា តារា អគ្គមេបញ្ជាការរងនៃកងយោធពលខេមរភូមិន្ទ បានរាយការណ៍ជូនប្រតិភូពីសភាពការណ៍រួមនៅតាមបណ្តោយព្រំដែន ដែលកងពលតូចអន្តរាគមន៍លេខ៤ ចំណុះឱ្យកងពលធំលេខ២ បច្ចុប្បន្នកំពុងឈរជើងការពារព្រំដែនកម្ពុជា-សៀម ទិសព្រះវិហារ និងខេត្តឧត្តរមានជ័យ ។ ដោយឈរលើស្មារតីស្នេហាជាតិ នាយទាហាន ពលទាហានរបស់យើងបានបូជាសាច់ស្រស់ឈាមស្រស់ ដើម្បីការពារបូរណភាពទឹកដី មិនឱ្យពួកចោរសៀមឈ្លានពានរំលោភលើកម្ពុជាយើងបានឡើយ ។ លោកនាយឧត្តមសេនីយ៍ ជា តារា ក៏បានថ្លែងអំណរគុណយ៉ាងជ្រាលជ្រៅចំពោះលោកស្បោង សារ៉ាត់ អភិបាលខេត្ត និងប្រតិភូខេត្តព្រះសីហនុទាំងអស់ ដែលតែងតែបានគិតគូរយកចិត្តទុកដាក់ដល់ជីវភាព និងការរស់នៅរបស់កងទ័ពការពារព្រំដែនរបស់យើង ដោយបាននាំ យកអំណោយជាស្បៀងអាហារ សំភារប្រើប្រាស់ និងថវិកាជាបន្តបន្ទាប់មកឧបត្ថម្ភដើម្បីចូលរួមរំលែកនូវការលំបាកខ្វះខាតនៅក្នុងអង្គភាព ។
លោកស្បោង សារ៉ាត់ អភិបាលខេត្តព្រះសីហនុ បានកោតសរសើរដល់វីរភាពដ៏អង់អាចក្លាហានរបស់នាយទាហាន នាយទាហានរង និងពលទាហានទាំងអស់ ដែលបានកំពុងខិតខំការពារបូរណភាពទឹកដីមិនឱ្យពួកចោរឈ្លានពានសៀមរំលោភមកលើកម្ពុជាយើងបានឡើយពិសេស បានធ្វើឱ្យប្រជាជនយើងមានជំនឿទុកចិត្តនិងមានភាពកក់ក្តៅផងដែរ ។ វីរភាពដ៏អង់អាចក្លាហានរបស់វីរយុទ្ធជនយើងនាពេលនេះ គឺជាគំរូដ៏ល្អប្រពៃដែលសមរភូមិក្រោយតែងតែកោតសរសើរនិងផ្តល់កម្លាំងចិត្ត ហើយបេ្តជ្ញាផ្សារភ្ជាប់ជាមួយសមរភូមិមុខក៏ដូចជាឧបត្ថម្ភគាំទ្រជាបន្តបន្ទាប់ទៀតក្នុងសន្តានចិត្តគិតគូរដល់កងទ័ពយើងជានិច្ច ។
នៅក្នុងឱកាសនោះដែរ លោកអភិបាលខេត្តព្រះសីហនុ ក៏បានឧបត្ថម្ភនូវគ្រឿងឧបភោគបរិភោគ និងសំភារប្រើប្រាស់មួយចំនួនផងដែរ រួមមាន វិទ្យុទាក់ទង១៥ គ្រឿង ម៉ាស៊ីនភ្លើង៥គ្រឿង មីយើង១៩០កេស ត្រីខកំប៉ុង១០កេសធំ ត្រីចំហុយ២៤០គីឡូក្រាម ប៊ីដុងទឹក១០០ ត្រីងៀត១០០គីឡូក្រាម ទឹកបរិសុទ្ធ១០កេស ស្រាបៀរ២២កេស ថ្នាំពេទ្យគ្រប់មុខ៥កេស និងថវិកា៣១.៩៣៦.០០០រៀល ។ ដោយឡែកនៅព្រឹកថ្ងៃបន្ទាប់ ប្រតិភូខេត្តព្រះសីហនុក៏បានយកអំណោយទៅចែកជូនដល់ប្រជាជនភៀសសឹកនៅជាំ-សាង៉ាំចំនួន៥០០គ្រួសារ ដែលក្នុង១គ្រួសារទទួលបានអង្ករ២៥គីឡូក្រាម និងថវិកា១០.០០០រៀលផងដែរ ៕
ចែករំលែកព័តមាននេះ