ក្រសួងអប់រំ យុវជននិងកីឡា បានដំណើរការប្រឡង សញ្ញាបត្រមធ្យមសិក្សាទុតិយភូមិ ឬបាក់ឌុប ក្នុងរយៈពេលពីរថ្ងៃនៅឆ្នាំ២០២៣នេះ។ ផ្តើមពីថ្ងៃទី៦ ខែវិច្ឆិកា ឆ្នាំ២០២៣ ការឡងបាក់ឌុបឆ្នាំ នេះ មានបេក្ខជនចំនួន ១៣៧ ៤១២ នាក់ ក្នុងនោះបេក្ខនារីចំនួន ៧៣ ២៧៨នាក់។ ក្នុងចំណោមបេក្ខជនទាំងអស់ មាន
ក្រសួងអប់រំ យុវជននិងកីឡា បានដំណើរការប្រឡង សញ្ញាបត្រមធ្យមសិក្សាទុតិយភូមិ ឬបាក់ឌុប ក្នុងរយៈពេលពីរថ្ងៃនៅឆ្នាំ២០២៣នេះ។ ផ្តើមពីថ្ងៃទី៦ ខែវិច្ឆិកា ឆ្នាំ២០២៣ ការឡងបាក់ឌុបឆ្នាំ នេះ មានបេក្ខជនចំនួន ១៣៧ ៤១២ នាក់ ក្នុងនោះបេក្ខនារីចំនួន ៧៣ ២៧៨នាក់។ ក្នុងចំណោមបេក្ខជនទាំងអស់ មានបេក្ខជនថ្នាក់វិទ្យាសាស្ត្រ មានចំនួន៤១ ៣៧៩នាក់ ស្មើនឹងប្រមាណ៣០,១ភាគរយ និងថ្នាក់វិទ្យាសាស្ត្រសង្គមមានចំនួន ៩៦ ០៣៣នាក់ ស្មើនឹងប្រមាណ ៦៩,៩ភាគរយ។
មណ្ឌលប្រឡងចំនួន២២៧ ដែលមាន ៥៥៤៣បន្ទប់ បានបើកទ្វារតាំងពីព្រលឹមនៅថ្ងៃទី៦ ខែវិច្ឆិកា នេះមក។ ដើម្បីសុក្រិត្យភាព និងដើម្បីធានាថា អ្នកចេះគឺជាប់ មុនអនុញ្ញាតឱ្យចូលមណ្ឌលប្រឡង បេក្ខជនទាំងអស់ត្រូវឆ្លងកាត់ការត្រួតពិនិត្យ និងឆែកឆេរយ៉ាងតឹងតែងមួយ ដែលមានសមាសភាពត្រួតពិនិត្យចម្រុះស្ថាប័ន ដើម្បីឱ្យប្រាកដថា គ្រប់បេក្ខជនចូលប្រឡងគ្មានសំណេរ ឬប្រ៊ុយយ៉ុងទុកមើល និងមានឧបករណ៍សម្ភារៈគិតគូរលេខ ជួយសម្រួលដល់ការប្រឡងនោះឡើយ។ បេក្ខជនមិនអាចយកអ្វីក្រៅពីប៊ិច បន្ទាត់ ចូលទៅក្នុងបន្ទប់ប្រឡងនោះទេ។
ក្រៅពីលោកគ្រូ អ្នកគ្រូ ដែលជាមេប្រយោគ និងអនុរក្ស នៅតាមមណ្ឌលប្រឡង មានក្រុមភា្នក់ងារសង្កេតការណ៍ និងកងកម្លាំងការពារសន្តិសុខ ក្រុមគ្រូពេទ្យ និងអ្នកស្មគ្រចិត្តជាច្រើន ទៀត ដូចជាភ្នាក់ងារអង្គភាពប្រឆាំងអំពើពុ.ករលួ.យជាដើម។ តាមក្រសួងអប់រំ យុវជន និងកីឡា នៅក្នុងដំណើរការប្រឡងនេះ មានស្ថាប័នចំនួន៦ ចូលរួម ដែលមានក្រសួងមហាផ្ទៃ ក្រសួងសុខាភិបាល កងរាជអាវុធហត្ថលើផ្ទៃប្រទេស អង្គភាពប្រឆាំងអំពើពុ.ករលួ.យ អគ្គិសនី កម្ពុជា និងសហភាពសហព័ន្ធយុវជនកម្ពុជា។ ការចូលរួមពីស្ថាប័នទាំងនេះ គឺក្នុងគោលបំណងរក្សាឱ្យបានសន្តិសុខ សុវត្ថិភាព សណ្តាប់ធ្នាប់ របៀបរៀបរយសាធារណៈ តាមមណ្ឌលប្រឡង និងធានាសុខភាពសម្រាប់គណៈមេប្រយោគ អ្នកពាក់ព័ន្ធនានា និងបេក្ខជនប្រឡង។
ការប្រឡងបាក់ឌុបជាការបញ្ចប់កម្រិតសិក្សា ចំណេះដឹងទូទៅ និងឈានទៅចាប់យកឱកាសសិក្សាជំនាញឯកទេសនានានៅថ្នាក់ឧត្តមសិក្សា។ បាក់ឌុប ជាស្ពានសម្រាប់ឱ្យសិស្សានុសិស្សឈានទៅកាន់ការសិក្សាឱ្យបានខ្ពង់ខ្ពស់ ក្រោយឧត្តមសិក្សាលើមុខជំនាញ ដែលខ្លួនស្រឡាញ់ និងចូលចិត្ត។ ការខិតខំប្រឹងប្រែងរៀនសូត្ររយៈពេល១២ឆ្នាំកន្លងមក ត្រូវកំណត់នៅថ្ងៃប្រឡងបាក់ឌុបនេះឯង។
ដោយសារតែការប្រឡងនេះ មានសារៈសំខាន់ដូច្នេះហើយ ទើបនៅពេលប្រឡងម្តងៗ បេក្ខជនតែងតែព្រួយបារម្ភ និងមានអារម្មណ៍ភ័យព្រួយ។ រហូតដល់មានបេក្ខជន និងក្រុមគ្រួសាររបស់ពួកគេមួយចំនួនបាននាំគ្នាកូនចៅទៅបន់ស្រន់ និងទៅស្រោចទឹកមន្តពីព្រះសង្ឃជាដើម នៅមុនការប្រឡងមកដល់។ គ្រប់គ្នាបានដឹងថា ការបន់ស្រន់ និងអ្វីៗផ្សេងទៀត មិនអាចជួយពួកគេបាននោះទេ ក្រៅពីការខិតខំរៀនសូត្រ ប៉ុន្តែទំនងដើម្បីកុំឱ្យចិត្តភ័យព្រួយខ្លាំងពេក ពួកគេក៏ទៅពឹងរបស់ក្រៅខ្លួនដែលជាជំនឿ.តៗគ្នានោះ។
សិស្សានុសិស្សជាច្រើន នៅពេលឈានដល់ការសិក្សាថ្នាក់ទី១២ ដែលជាឆ្នាំប្រឡងនោះ ពួកគេបានខិតខំសិក្សាតាំងពីដើមឆ្នាំមក។ អ្នកខិតខំរៀនសូត្រ បែបនោះ តែងតែទទួលបានលទ្ធផលល្អនៅពេលប្រឡង ហើយពួកគេក៏មិនសូវព្រួយបារម្ភខ្លាំងពេកនោះទេ ក្នុងថ្ងៃប្រឡងនោះដែរ។
ជិត១០ឆ្នាំដែលក្រសួងអប់រំកម្ពុជា បានធ្វើកំណែទម្រង់នៅក្នុងការប្រឡងបាក់ឌុប ក្រោមពាក្សស្លោកថា «អ្នកចេះគឺជាប់» ក្រសួងបានខិតខំធ្វើយ៉ាងណាមិនឱ្យមានការធ្លាយវិញ្ញាសារនៅមុនថ្ងៃប្រឡង មិនឱ្យមានការបើកចម្លងក្នុងពេលប្រឡង និងមិនបណ្តោយឱ្យមានអំពើពុ.ករលួ.យ ដូចជាការសូកប៉ាន់ជាដើមនោះទេ។ ក្រោមការរឹតបណ្តឹងពេលប្រឡងបែបនេះ អ្នកប្រឡងបាក់ឌុបជាប់ម្នាក់ៗ មានកិត្តិយសខ្លាំងណាស់នៅក្នុងប្រវត្តិសិក្សារបស់ខ្លួន។ វាកាន់តែពិសេស និងនាំកិត្តិយសជូនក្រុមគ្រួសារផង ប្រសិនជាពួកគេបានជាប់និន្ទេស A ទៀតនោះ។
អ្នកជាប់និន្ទេស A នាឆ្នាំកន្លងៗមក ទទួលបានរង្វាន់ និងការលើកទឹកចិត្តពីសង្គម ជាពិសេសពីអាជ្ញាធរ និងថ្នាក់ដឹកនាំ។ នាយករដ្ឋមន្ត្រី តែងតែចំណាយពេលវេលាជួបជាមួយសិស្សជាប់ និន្ទេស A ហើយនៅក្នុងឱកាសនោះពួកគេទទួលបានរង្វាន់លើកទឹកចិត្តមួយចំនួនដូចជា ៖ ម៉ូតូ កុំព្យូទ័រ ពីថ្នាក់ដឹកនាទៀតផង។ ដោយឡែក អ្នកជាប់និន្ទេស A ត្រូវបានមហាវិទ្យាល័យជាច្រើនបើកទ្វារទទួលស្វាគមន៍ពួកគេឱ្យចូលសិក្សាដោយមិនគិតថ្លៃទៀតផង។
ដូច្នេះ ជាប់បាក់ឌុបនៅក្នុងកាលៈទេសៈនេះ មិនត្រឹមជាប់បានទៅចូលរៀននៅមហាវិទ្យាល័យនោះទេ តែជាឱកាសសម្រាប់កសាងកិត្តិយសឱ្យខ្លួន និងគ្រួសារក្នុងវត្តសិក្សារបស់បេក្ខជនផងដែរ។ ជាប់បាក់ឌុបជាមួយនិន្ទេសល្អ សិស្សមានឱកាសបានសិក្សានៅមហាវិទ្យាល័យ ដែលមានគុណភាព ហើយរៀននៅសាលាល្អ មិនថានៅក្នុង និងក្រៅប្រទេសនោះទេ ជាឱកាសសំខាន់សម្រាប់កម្ពុជា ក្នុងការទទួលបានយុវជនដែលជាទំពាងស្នងឬស្សី ពោលពេញទៅដោយសមត្ថភាពមកអភិវឌ្ឍន៍ប្រទេសជាតិ៕
ដោយ ៖ សា រ៉ាន់
ចែករំលែកព័តមាននេះ