នៅក្នុងឱកាសអញ្ជើញជាអធិបតីភាព ក្នុងពិធីបើកវិញ្ញាសារប្រឡងសញ្ញាបត្រទុតិយភូមិ នៅសាលាបឋមសិក្សា និងអនុវិទ្យាល័យគីរីសុវណ្ណវង្ស ស្ថិតក្នុងភូមិត្រោក ឃុំស្រែថ្មី ស្រុករលាប្អៀរ នាព្រឹកថ្ងៃទី៦ ខែវិច្ឆិកា ឆ្នាំ២០២៣នេះ ឯកឧត្តម
ខេត្តកំពង់ឆ្នាំង ៖ នៅក្នុងឱកាសអញ្ជើញជាអធិបតីភាព ក្នុងពិធីបើកវិញ្ញាសារប្រឡងសញ្ញាបត្រទុតិយភូមិ នៅសាលាបឋមសិក្សា និងអនុវិទ្យាល័យគីរីសុវណ្ណវង្ស ស្ថិតក្នុងភូមិត្រោក ឃុំស្រែថ្មី ស្រុករលាប្អៀរ នាព្រឹកថ្ងៃទី៦ ខែវិច្ឆិកា ឆ្នាំ២០២៣នេះ ឯកឧត្តម យិន សាវ៉េន អភិបាលរងខេត្តកំពង់ឆ្នាំង បានមានប្រសាសថា តាមទស្សនៈវិស័យរបស់ក្រសួងអប់រំ យុវជន និងកីឡា អាណត្តិទី៧ ដឹកនាំដោយសម្ដេចបវរធិបតី ហ៊ុន ម៉ាណែត ជានាយករដ្ឋមន្ត្រី ដែលមានឯកឧត្តមបណ្ឌិតសភាចារ្យ ហង្ស ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដាក់ចេញនៅខ្លឹមសារថា «អ្នកចេះ គឺប្រឡងជាប់» ។
អភិបាលរងខេត្តកំពង់ឆ្នាំង ឯកឧត្តម យិន សាវ៉េន បានបន្តថា សូមក្មួយៗតាំងចិត្ត តាំងស្មារតីឲ្យបានរឹងមាំក្នុងការប្រឡងយកនិទ្ទេសល្អ ដោយយកចំណេះដឹងដែលខ្លួនបានរៀនអស់រយៈពេល១២ឆ្នាំកន្លងទៅ មកប្រឡងក្នុងពេលនេះ។ ព្រោះថា បើយើងមិនតាំងចិត្ត តាំងស្មារតី មានការភ័យខ្លាចនោះ ចំណេះដែលយើងមានទាំងប៉ុន្មាន អាចនឹងត្រូវភ្លេចភ្លាំងជាពុំខាន។ មួយវិញទៀត ចូរក្មួយៗគោរពវិន័យក្នុងការប្រឡង មិនត្រូវមានលួ.ចលាក់ដាក់វិញ្ញាសារតាមខ្លួន បើមេប្រយោគចាប់បាននឹងត្រូវបញ្ឈប់មិនឲ្យប្រឡងតែម្ដង។ ជាចុងក្រោយ សូមជូនពរក្មួយៗដែលប្រឡងសញ្ញាបត្រសញ្ញាបត្រទុតិយភូមិឆ្នាំនេះ ជាប់និទ្ទេសល្អគ្រប់ៗគ្នា។
លោក សឹម ប្រឹម ប្រធានមន្ទីរអប់រំ យុវជន និងកីឡា ខេត្តកំពង់ឆ្នាំង បានបញ្ជាក់ថា បេក្ខជនប្រឡងសញ្ញាបត្រទុតិយភូមិឆ្នាំនេះ មានចំនួន ៤ ២៧៦នាក់ (ស្រី២៣៤២នាក់) ចែកជា៨ មណ្ឌល គឺមណ្ឌលបថមសិក្សាគំរូក្រុង, វិទ្យាល័យព្រះបាទសុរាម្រឹត, វិទ្យល័យប៊ុន រ៉ានី ហ៊ុនសែន រលាប្អៀរ, បថមសិក្សា ប៊ុន រ៉ានី ហ៊ុន សែន ព្រៃខ្មែរ, បថមសិក្សា និងអនុវិទ្យាល័យ គីរីសុវណ្ណវង្ស, បថមសិក្សា ខ្សាមមា្សច័ន្ទលាភ, វិទ្យាល័យក្រុងកំពង់ឆ្នាំង និងវិទ្យាល័យហ៊ុនសែនរលាប្អៀរ ដែលមានចំនួន ១៧២ បន្ទប់ ។ ហើយសម្រាប់ព្រឹកថ្ងៃដំបូង នៃការប្រឡងដែលមានបេក្ខជន ៤ ២៧៦នាក់ គឺបានអវត្តមានបេក្ខជនចំនួន ៧៦នាក់ ក្នុងនោះស្រី២៦នាក់។
ដោយឡែកទិដ្ឋភាព នៅតាមមណ្ឌលប្រឡងក្នុងក្រុងកំពង់ឆ្នាំង គេសង្កេតឃើញអាណាព្យាបាល មាតាបិតា និងក្រុមគ្រួសារជូនកូនៗ ក្មួយៗ ជាបេក្ខជនមកចូលរួមប្រឡង និងឈររង់ចាំ ដើម្បីលើកទឹកចិត្តដល់បេក្ខជននៅគ្រប់មុខមណ្ឌលប្រឡង ហើយដំណើរការប្រឡងនៅព្រឹកថ្ងៃដំបូង គឺបានប្រព្រឹត្តទៅដោយរលូន ពុំមានបាតុភាពណាកើតឡើងនោះទេ៕
ចែករំលែកព័តមាននេះ