- ភ្នំពេញ
ប្រធានបទដែលនឹងលើកឡើងនៅក្នុងវេទិការាជរដ្ឋាភិបាល-ផ្នែកឯកជន ដែលគ្រោងនឹងរៀបចំឡើងនៅថ្ងៃទី១៣ ខែវិច្ឆិកា ឆ្នាំ២០២៣ខាងមុខនេះ គឺសុទ្ធតែក្តៅទាំងអស់ ប៉ុន្តែបញ្ហាដែលក្តៅបំផុតនោះ គឺទំនងជា
ប្រធានបទដែលនឹងលើកឡើងនៅក្នុងវេទិការាជរដ្ឋាភិបាល-ផ្នែកឯកជន ដែលគ្រោងនឹងរៀបចំឡើងនៅថ្ងៃទី១៣ ខែវិច្ឆិកា ឆ្នាំ២០២៣ខាងមុខនេះ គឺសុទ្ធតែក្តៅទាំងអស់ ប៉ុន្តែបញ្ហាដែលក្តៅបំផុតនោះ គឺទំនងជា
ប្រធានបទដែលនឹងលើកឡើងនៅក្នុងវេទិការាជរដ្ឋាភិបាល-ផ្នែកឯកជន ដែលគ្រោងនឹងរៀបចំឡើងនៅថ្ងៃទី១៣ ខែវិច្ឆិកា ឆ្នាំ២០២៣ខាងមុខនេះ គឺសុទ្ធតែក្តៅទាំងអស់ ប៉ុន្តែបញ្ហាដែលក្តៅបំផុតនោះ គឺទំនងជាទេសចរណ៍ អចលនៈទ្រព្យ ឧស្សាហកម្មកាត់ដេរ និងបញ្ហាផ្សេងៗនៅក្នុងផ្នែកកសិកម្ម។
ដូចដែលគ្រប់គ្នានៅក្នុងមជ្ឈដ្ឋានអ្នកដឹកនាំ និងវិស័យឯកជន ដឹងហើយថា វេទិការាជរដ្ឋាភិបាល-ផ្នែកឯកជន ដែលមានអាយុកាលប្រមាណជា ២៤ ឆ្នាំមកនេះ បានដើរតួនាទីយ៉ាងសំខាន់ ដើម្បីនិរន្តភាពសេដ្ឋកិច្ចកម្ពុជា ហើយនៅក្នុងវេទិកានេះ មានក្រុមការងារជាច្រើន ដែលមានដល់ទៅជាងដប់ក្រុម រាប់តាំងពីទេសចរណ៍ កសិកម្ម ផលិតកម្ម សេវាកម្ម ច្បាប់ ធនាគារនិងហិរញ្ញវត្ថុ ដឹកជញ្ជូន នាំចេញនាំចូល ឧស្សាហកម្មរ៉ែជាដើម។ ហើយវេទិកានេះ ត្រូវបានរៀបចំ ជារៀងរាល់ឆ្នាំ លើកលែងតែនៅក្នុងអំឡុងសម័យនៃការរីករាលដាលកូវីដ ១៩ ។
វេទិការាជរដ្ឋាភិបាល-ផ្នែកឯកជននេះ សំខាន់ណាស់នៅក្រោមរដ្ឋាភិបាលដឹកនាំដោយសម្តេច តេជោ ហ៊ុន សែន កន្លងមក ហើយមកដល់អាណត្តិដឹកនាំដោយសម្តេចធិបតី ហ៊ុន ម៉ាណែត ទំនងជានៅតែសំខាន់ ពីព្រោះថា នៅពេលដែលសម្តេចចូលកាន់តំណែងភ្លាម សម្តេចបាន ប្រកាសច្បាស់ៗថា «ខ្ញុំនឹងដឹកនាំវេទិការាជរដ្ឋាភិបាល-ផ្នែកឯកជន លើកទី១៩ ដែលនឹងប្រព្រឹត្តទៅនៅខែវិច្ឆិកា ខាងមុខនេះ ដើម្បីស្តាប់នូវមតិយោបល់ និងសំណូមពរផ្សេងៗ ក៏ដូចជាការដាក់ចេញនូវវិធានការមុតស្រួច និងជាក់ស្តែងមួយចំនួន ដើម្បីបន្តជំរុញគាំទ្រវិស័យឯកជន ដែលជាកម្លាំងចលករនៃកំណើនសេដ្ឋកិច្ច»។
នៅពេលដែលចូលកាន់ដំណែងភ្លាម សម្តេចបានប្រគល់ភារៈកិច្ចជូន លោក អូន ព័ន្ធមុនីរ័ត្ន ដែលជាឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការ គោលនយោបាយសេដ្ឋកិច្ច និងហិរញ្ញវត្ថុ សម្របសម្រួលជាមួយក្រសួង-ស្ថាប័ន, វិស័យឯកជន ព្រមទាំងភាគីពាក់ព័ន្ធដទៃទៀត ដើម្បីរៀបចំវេទិកានេះ។
ដោយសារតែវេទិការាជរដ្ឋាភិបាល-ផ្នែកឯកជនខានរៀបចំយូរគួរសមដែរ បញ្ហាសង្គម និងសេដ្ឋកិច្ចបច្ចុប្បន្នក៏ចាក់ស្រេះខ្លាំងដែរនោះ ប្រធានបទក្តៅនឹងមានច្រើនខ្លាំងណាស់ ប៉ុន្តែហេតុផល ដែលយើងខ្ញុំហ៊ានសន្និដ្ឋានថា ទេសចរណ៍ អចលនៈទ្រព្យ ឧស្សាហកម្មកាត់ដេរ និងកសិកម្មក្តៅខ្លាំង គឺដោយសារវិស័យទាំងនេះ សុទ្ធតែជាជន្ទុលសំខាន់សម្រាប់កំណើនសេដ្ឋកិច្ច ។
នៅក្នុងសម័យកូវីដ ទេសចរណ៍រងរបួសធ្ងន់ធ្ងរសឹងតែស្លា.ប់ខ្លួន ហើយទោះបីជាឥឡូវនេះ រៀងងើបៗឡើងវិញបន្តិចមែន ប៉ុន្តែហាក់មិនទាន់មានគោលនយោបាយដុំកំភួនណាមួយចេញនៅឡើយទេ ខណៈដែលប្រទេសជិតខាង គេបានដាក់ចេញគោលនយោបាយជាបន្តបន្ទាប់រួចហើយ ដូចជា ៖ ថៃ និង វៀតណាមជាដើម ។
វិស័យអចលនទ្រព្យ និងសំណង់នេះ ក៏ជាចំណុចស្នូលមួយដែរ ពីព្រោះនៅពេលនេះ អ្នកវិភាគ និងអ្នកនៅក្នុងវិស័យនេះ ស្ងាត់មាត់អស់ហើយ ដោយសារតែគ្នាពិបាកនឹងវិភាគស្ថានភាពពិតប្រាកដដែលកំពុងតែកើតមាន ។
ហើយនៅលើវិស័យអចលនទ្រព្យ និងសំណង់នេះ កាលពីចុងសប្តាហ៍កន្លងទៅ សម្តេចធិបតី បានលើកឡើងច្បាស់ៗថា សម្តេចនឹងនិយាយអំពីបញ្ហានេះនៅថ្ងៃទី១៣ ខែវិច្ឆិកា ឆ្នាំ២០២៣ ខណៈដែលមកដល់ពេលនេះ ខាងវិស័យឯកជន បានកំពុងតែជំរុញអោយរាជរដ្ឋាភិបាលអនុញ្ញាតអោយជនបរទេសអាចមានលទ្ធភាពទិញផ្ទះ និងសំណង់ចាប់ពីជាន់ផ្ទាល់ដីឡើង ដើម្បីជំរុញអាជីវកម្មនេះឡើងវិញ ។
វិស័យកាត់ដេរ ក៏កំពុងតែញាំញីដោយវិបត្តិច្រើនដែរ ខណៈពេលដែលការបញ្ជាទិញ ហាក់មិនខ្លាំងក្លា ប៉ុន្តែស្ថានភាពវិជ្ជមាននៃសេដ្ឋកិច្ចនៅអាមេរិកនៅត្រីមាសទី៣ កន្លងមកឃើញថា មានភាពវិជ្ជមាន ដែលអាចនឹងអោយវិស័យកាត់ដេរកម្ពុជាដាក់ចេញនូវយុទ្ធសាស្ត្រ ដើម្បីសុំការសម្រេចពីរាជរដ្ឋាភិបាលនៅក្នុងវេទិការាជរដ្ឋាភិបាល-ផ្នែកឯកជន ដើម្បីជំរុញកំណើន និងទ្រទ្រង់វិស័យនេះបន្តទៀត ។
ដោយឡែកវិស័យកសិកម្ម ទំនងក៏មានបញ្ហាពិភាក្សាតឹងសរសៃ.កខ្លះដែរ នៅក្នុងវេទិកាខាងមុខនេះ ទោះបីជាកន្លងមក ស្ថានភាពវិស័យនេះមានកំណើន និងជាមូលដ្ឋានទ្រទ្រង់សេដ្ឋកិច្ច កម្ពុជាខ្លាំងក្លាបំផុតនៅក្នុងអំឡុងកូវីដ១៩ ដោយការនាំចេញស្រូវ អង្ករ និងទំនិញកសិកម្ម ជាច្រើនសុទ្ធតែវិជ្ជមាន លើកលែងតែរឿងបញ្ហាចិញ្ចឹមសត្វមួយ ដែលពេលនេះ អ្នកចិញ្ចឹមសត្វ តាំងពីត្រី ជ្រូក មាន់ ទា គឺកំពុងតែរងា ដោយសារតែចរន្តនៃការនាំចូលសាច់ខុសច្បាប់ច្រើនពេក រហូតដល់អ្នកចិញ្ចឹមសត្វខ្លះកំពុងតែរកកលនឹងក្ស័យធន ដោយសារមិនអាចប្រកួតប្រជែងនឹងពពួកសាច់នាំចូលទាំងនោះបាន ។
សរុបមក យើងខ្ញុំសង្ឃឹមថា អង្គសមាជិក សមាជិកា នៅក្នុងវេទិការាជរដ្ឋាភិបាល-ផ្នែកឯកជននេះ នឹងអាចជជែកគ្នារកឃើញនូវដំណោះស្រាយជាក់ស្តែង និងមានប្រយោជន៍ ហើយអាចនឹងចាត់វិធានការសមស្រប ដើម្បីដោះស្រាយរាល់បញ្ហា ដើម្បីធ្វើយ៉ាងណាធានាយន្តការកំណើនសេដ្ឋកិច្ច និងរក្សា ក៏ដូចជាបន្តអភិវឌ្ឈន៍សង្គម ជីវភាពប្រជាពលរដ្ឋ កាន់តែរីកចម្រើនទៅមុខប្រកបដោយមោទនភាព និងឧត្តមភាព ។
ដោយ ៖ ហេង ចេស្តារ
ចែករំលែកព័តមាននេះ