ខេត្តកំពង់ឆ្នាំង ៖ តាមព័ត៌មានបឋមដែលកោះសន្តិភាពទទួលបាន គឺវេលាម៉ោងជាង១០យប់ ថ្ងៃទី០៣ ខែវិច្ឆិកា ឆ្នាំ២០២៣ មានករណីឃាតកម្មមួយបានកើតឡើង ដោយជនដៃដល់បានកាប់ទៅលើយុវជនម្នាក់បណ្ដាលឲ្យរងរបួសជាទម្ងន់ គ្រាដែលយុវជនរូបនោះ បានត្រឡប់ពីមើលការសម្តែងល្ខោន នៅវត្តថ្មកែវ ស្ថិតក្នុងភូមិកោះកែវ ឃុំស្វាយជ្រុំ ស្រុករលាប្អៀរ ។
ជនរងគ្រោះបានស្លាប់នៅក្នុងមន្ទីរពេទ្យ ហើយសពត្រូវបានដឹកត្រឡប់ទៅផ្ទះវិញ។ នៅព្រឹកថ្ងៃទី៤ខែវិច្ឆិកា នេះដែរ សមត្ថកិច្ចកំពុងតែពិនិត្យធ្វើកោសល្យវិច័យ។
ជុំវិញករណីកើតហេតុនេះ តាមប្រភពព័ត៌មានពេលមូលដ្ឋានបានឱ្យដឹងថា នៅយប់ថ្ងៃកើតហេតុ មានក្រុមល្ខោនមួយវង់ បានទៅសម្ដែងនៅវត្តថ្មកែវ ឃុំស្វាយជ្រុំ ស្រុករលាប្អៀរ ការសម្ដែងនេះគឺដោយលក់សំបុត្រ មិនមានការសំដែងក្នុងវិធីបុណ្យទាននោះទេ ។ ប៉ុន្តែនៅយប់ថ្ងៃកើតហេតុដោយសារការលក់សំបុត្របានតិចពេក ក្រុមសម្ដែងល្ខោនមិនបានសំដែងទេ ត្រូវលើកមកសម្តែងនៅយប់ថ្ងៃស្អែក គឺនៅយប់ថ្ងៃទី៤ខែ វិច្ឆិកា នេះ អ្នកបានទិញសំបុត្រ ក៏ត្រូវរង់ចាំមកទស្សនានៅយប់ថ្ងៃទី០៤ ខែវិច្ឆិកា ដែរ ។
ប្រភពដដែលបានបន្តថា ស្រាប់តែនៅម៉ោងប្រម៉ាណជាង១០យប់ ក៏មានករណីកាប់ទៅលើយុវជនម្នាក់ឈ្មោះសុន ខាត់ អាយុ១៨ឆ្នាំ មានទីលំនៅភូមិកោះកែវ ឃុំស្វាយជ្រុំ ស្រុករលាប្អៀរ បណ្ដាលឲ្យរងរបួសជាទម្ងន់ ខណៈយុជនរូបនោះត្រឡប់ពីមើលល្ខោនវិញ ។ ជនរងគ្រោះត្រូវបានដឹកមកសង្គ្រោះនៅមន្ទីរពេទ្យខេត្តកំពង់ឆ្នាំង។ ប៉ុន្តែដោយសាររបួសធ្ងន់ធ្ងរពេកក៏បានស្លាប់នៅក្នុងមន្ទីរពេទ្យ ហើយសពត្រូវបានដឹកត្រឡប់ទៅលំនៅដ្ឋានវិញ។
នៅព្រឹកថ្ងៃទី៤ ខែវិច្ឆិកា នេះដែរ សមត្ថកិច្ចកំពុងតែពិនិត្យធ្វើកោសលវិច្ច័យជនរងគ្រោះ ព្រមទាំងស្រាវជ្រាវរកមុខសញ្ញាជាជនដៃដល់ដើម្បីឈានដល់ការឃាត់ខ្លួនយកមកផ្ដន្ទាទោសតាមផ្លូវច្បាប់៕ ព័ត៌មានពិស្តាយើងនឹងផ្សាយជូននៅពេលក្រោយ ។
ចែករំលែកព័តមាននេះ